Luk 24 | ZmbSC | STEP | Mɛkyɛɔ yee lusu lwe yinga baa babakachi na koyaka ko manda, kwasie malasi masangya abɔ.

Luke 24

Yɛsu usuubuka

(Mat 28:1-10; Mali 16:1-8; Yɔa 20:1-10)

1 Mɛkyɛɔ yee lusu lwe yinga baa babakachi na koyaka ko manda, kwasie malasi masangya abɔ. 2 Bakee njɔɔ na kɔmɔa iwɛ lwachiba abɔ ko manda lisusukwewa mɔsɛɛsɛ mwe mukinda. 3 Abɔ na kwingea monda, ndebabanga mobee wa Mwaame Yɛsu. 4 Abɔ bakee mu kwibocha lee ikomo, bando babee babwaa ngubɔ chakɛnya na koemaa kombaa kwabɔ. 5 Abɔ basɛ na kuungwa bɔɔba na kɔlɔla ase. Baa bando na kobasaolea: «Ko booni kotoenga baanu oe mwɛchɔ mwingya mwe bakwo? 6 Ndaekee ana, usuubuka. Mwitunduche bia bya basaoleaya awɛ alya okee Kalilaya: 7 Bitokoka ne Mwaana we Mondo oochiwe mo mabɔkɔ me bando babea, ɔmɔɛ manɛnɛ me kokwa, ne uubuke mo masu masato.» 8 Abɔ na koeyoka mɛɔcha ya Yɛsu. 9 Abɔ na kɔɔtɔka, na koyasaola maa makomo masɛ ko baa ikumi na ɔmɔɔsa, ne ko ndomwa chikinɛ. 10 Babɛchaya ne: Malia we Makitala, Sanɛ, Malia, ina Yakɔbɔ, na baa babakachi bakinɛ, babɛchaya naakɛ, na koolecha bwakaɛ ilɔngɔ ko ndomwa. 11 Alakini baninga itɛ bitɔɔcha abɔ bie ne byebokata, na baba ndebaimenya. 12 Pɛtɛlɔ na kobangoa mbeo koya ko manda. Koyaingea, kyayasanga awɛ ne ngubɔ chabweka abɔ ketomba, awɛ na kɔɔtɔka mo kokanakana biisɛ byaeteka.

Yɛsu ɔsɔmɔɛka ko baeyechwa bamɔchi

(Mali 16:12-13)

13 Lwakaɛ loa lusu, ndomwa chibee chaeyechaya ko kalya kaitanewaya Emausi, ilɛba le ɔbɛɛ bilomɛtɛlɛ ikumi na bibee ne Yɛlusalɛma. 14 Abɔ na bae mɔ kɔchɔbɔa makomo masɛ maeteka. 15 Bakee mɔ kɔchɔbɔa ne kochombya ngani chabɔ, Yɛsu mwɛɛnɛ na kobaisɛnɛa na kosambea nabɔ njea. 16 Miisɔ mabɔ mamɔmɔa alakini keemo kɛmɔɔsa kyabachibea baamochebaya. 17 Yɛsu na kobabocha: «Mɔtɔchɔbɔa ko leke ikomo?» Abɔ na kwimana mo koemoka. 18 Ɔmɔ waabɔ we chiina lya Kɛlɛɔpa, na komosaolea: «Oe ne ingaa mɔ Yɛlusalɛma metondoo, otaasi kocheba ikomo lesoeteka mano masu?» 19 Awɛ na kobabocha itɛ: «Bike bisoeteka?» Mae ne makomo maetekee Yɛsu we Nasalɛti. Wabɛchaya ndɛnda mekoo ya Kakua, wabɛchaya nɛ bɔkɛtɛ mɔ mɛɔcha ne mo bikete kombaa kwa Kakua ne kombaa kwe bando. 20 Bakoo be basia ne bakoo biito bɛ mɔsɛngɛ bamolamboa kɔ kɔbɛmba makomo maakɛ me kokwa. Kubɔngɛɛ na komosongeeka ko mote we maakanu. 21 Bae twabɛɛ tosobaela itɛ awɛ ne otaolose Baisilaɛli. Alakini, leno masu masato maokoka, aetekee elya myanda. 22 Kabee bye kokanyakanya ne, bamɔ baabakachi be ketongo kiito batukuumunyee. Bayee ko manda mɛkyɛɔ, 23 alakini ndebasanga ketomba. Abɔ na kɔɔtɔka kwatosaolee itɛ bakumbakanee ne molendo we kɔmɔa meombo, ebasaolee kiinɛkinɛ itɛ oe mwɛchɔ. 24 Kusia boa, bamɔ ko baa babɛɛ niito, na koya bwakaɛ ko manda, na koyasanga makomo bwakaɛ boa bo saolee baa babakachi; alakini abɔ ndɛbamɔmɔa.

25 Yɛsu na kobasaolea: «Banu bando bataasi ne lokani, batɔtɛa metema ku kwimenya biisɛ byaɔcha ndɛnda cha Kakua. 26 Bitokoka Kilisito okonje mama manɛnɛ kombaa kwe awɛ kwingea mo boombe bwakɛ.»

27 Kusia Yɛsu na kobasaolea makomo makunyewa ko mbanga yaakɛ mu Tuchimba tɔɔsɛ twa Ama. Kobangoea ko mekanda ya Musa, ne koolea ko mekanda yee Ndɛnda chisɛ cha Kakua.

28 Aba abɔ bangaolea mo kalya kayeela abɔ, awɛ Yɛsu na kɔmɔɛka boe oe mo koya njɔɔ. 29 Baa baeyechwa na kumwisingea itɛ: «Chikaa niito chooba lesoya, ne butu bungaila.» Awɛ na kwingea mo ndabo na kuchikaa nabɔ. 30 Basɛ na kuchikaa na Yɛsu mo kolya. Awɛ na kotomba mukati, na koocha mosao kwa Kakua, kusia na kubuka na kɔbaɛcha. 31 Akaɛ alya miisɔ mabɔ na kobooloka na batomocheba! Alakini Yɛsu na kobachimbea, ndebamɔmɔa kabee. 32 Abɔ na kobangoa kwiɔchɛa: «Bieko! Abɛɛ awɛ mɔ kɔɔcha niito mo njea, ne kotosaolea makomo me Tuchimba twa Ama, metema yiito na kochaa nɛ kɛmɛmɔ!»

33 Abɔ na kotaoka ko kyakaɛ kea kyanya, ne kɔɔtɔka ko Yɛlusalɛma. Na batoyasanga baa ndomwa ikumi cha Yɛsu ɔmɔɔsa ne bando bakinɛ be ndongo yaabɔ. 34 Baa basɛ basangwa ne kosaolea baa baeyechwa babee: «Bieko kiinɛkinɛ, Mwaame wiito usuubuka! Omoolee Simɔni.»

35 Baa baeyechwa babee na abɔ, na kosaolea banjinabɔ maɔngɔ mauungwee abɔ ne booni bochebee abɔ Yɛsu abɛɛ awɛ mu kubuka mikati.

Yɛsu osobaolea baeyechwa bakɛ

(Mat 28:16-20; Mali 16:14-18; Yɔa 20:19-23; Ndo 1:6-8)

36 Bakee mɔ kɔchɔbɔa maa makomo, Yɛsu mwɛɛnɛ na kɔmɔɛka mwingya mwabɔ, na kobasaolea: «Nyaa iongwe niinu!» 37 Abɔ na kuungwa bɔɔba ne kamiona, mu kuninga itɛ bamoɛchi ne kesemboelwa. 38 Yɛsu na kobasaolea: «Ko booni kutuungwa baanu ne keangaa nɛ kwikakanya? 39 Mɔtalɔla manja maanɛ nɛ tɔbɛya twanɛ, mee na oono kiinɛkinɛ! Mɔngɔbɔchɛ nɛ kɔndɔla. Kesemboelwa kiisi ne misunɛ ne makua, mee nae nabyo.» ^{▼▼Yɛsu waocha bɔbɔ kokoenga baeyechwa bamɔɛ bibangwa bye misumali mo manja nɛ mɔ tɔbɛya twakɛ. Wakonda waimenye ne awɛ kiinɛkinɛ.}

40 Asia Yɛsu koocha bia, na kɔbamɔɛsa manja maakɛ nɛ tɔbɛya. 41 Baa baeyechwa baba ne banaimenya kɔ kɔmɔa baba nɛ kɛmɛmɔ ne kokanakana Ko boa awɛ kobabocha: «Moe ne byekolya?» 42 Na batɔmɔɛcha kyunda kye mwɛa kɛ kɔɛkɛlwa. 43 Na kukibunda, na kokelya mu miisɔ mabɔ. 44 Kusia ne otobasaolea: «Abɛchaya mee niinu amɔsa, nabamosaolea itɛ, makomo maochiwa ko mbanga yaanɛ mo Salia ya Musa ne mo mekanda yee Ndɛnda cha Kakua, ne mo mokanda wa Nembo, biitowaena kokoka biisɛ.»

45 Ko boa Yɛsu na kobachiboa ngani chabɔ, kɔmɔa bachebe Tuchimba twa Ama. 46 Na kobasaolea: «Bitukunyiwa mu tuchimba twa Kakua, itɛ Kilisito okonje manɛnɛ ne kuubuka lusu lwa sato kɔmɔngɔ kwe kokwa kwakɛ. 47 Byakunyiwa bwakaɛ boa, ku chiina lyaakɛ batasaolee bando maɔngɔ, kobangoa Yɛlusalɛma, kɔmɔa batuuke kotoka ko bwabea bwabɔ ne koboebeela. 48 Baanu ne batasaolaye bitocheba banu ko eena meanda ɛsɔmɔa banu. 49 Mee mwɛɛnɛ ndamotomee byamolaa Isanɛ. Motaendeche mo kalya ke Yɛlusalɛma ɛka atachekwe manu nɛ bɔkɛtɛ kotokea kwiyoo.»

Yɛsu osoendwa mwiyoo

(Mali 16:19-20; Ndo 1:9-11)

50 Kusia Yɛsu na koola ne baeyechwa bakɛ mo kalya kɛ Yɛlusalɛma, na kobachaa mɔsɛɛsɛ mwe kalya ke Bɛtania. Aolea abɔ alya, awɛ na koendoa mabɔkɔ mwiyoo, na kɔbatɛchɛa kaowe. 51 Awɛ mo kɔbatɛa kauwe ne otosambokana nabɔ ne koendwa kwiyoo. 52 Ko mbanga yaabɔ na kwisingea nɛ batɔɔtɔka Yɛlusalɛma, metema bɛɛ ne kɛmɛmɔ. 53 Alya, masu masɛ ne bae mɔ Ɛkalu mo koseka Kakua.