Luk 5 | ZmbSC | STEP | Lɔmɔ lusu, awɛ Yɛsu waba mo mweema mɔ mɔkɔngɛ we kichibachiba kye Kɛnɛsalɛti ne ndongo yee bando, na kumwisɛnɛnɛa itɛ baungwe ikomo lya Kakua.

Luke 5

Yɛsu ɔsɔsɔbɔa baeyechwa

(Mat 4:18-22; Mali 1:16-20)

1 Lɔmɔ lusu, awɛ Yɛsu waba mo mweema mɔ mɔkɔngɛ we kichibachiba kye Kɛnɛsalɛti ^{▼▼kichibachiba kye Kɛnɛsalɛti Kɛkyɔ kichibachiba kitwitaniwa kabee, kichibachiba kye Kalilaya.} ne ndongo yee bando, na kumwisɛnɛnɛa itɛ baungwe ikomo lya Kakua. 2 Na kɔmɔa, bwato chibee, chabɛchaya mɔ mɔkɔngɛ we kichibachiba ne balɔbi na kwika mɔ kɔɔya makia maabɔ. 3 Yɛsu na kokobea mɔ bɔmɔ bwato, bwabɛchaya bwa Simɔni, na kosaolea Simɔni uisɔkyɛ bwato nɛ mɔkɔngɛ, na kuchikaa, na koeyecha kea ketongo.

4 Asia Yɛsu kɔɔcha, na komosaolea Simɔni: «Isɛɛnya bwato mo maache ma manika, na mwikye makia minu mo maache, nɛ kɔlɔba mwɛa.» 5 Simɔni na komosaolea: «Mweyechi, tokambee kɔ bɔkɛtɛ butu bɔɔsɛ ndetwakonja keemo, kɔmɛɔcha yao, ndaikye makia mo maache.»

6 Abɔ na kwikya makia mo maache, na kubunda mwɛa wabua, abe abe makia mabɛa mangabɛmbɛka. 7 Na kɔlɔbɔa basambe nabɔ babɛchaya monda mwe bukinɛ bwato, babake kwa bakwase. Aolea basambe nabɔ, abɔ na kochekya bwato bɔsɛ bobee nɛ mwɛa, abe abe koenga kwina. 8 Alya amɔa Simɔni Pɛtɛlɔ bia, awɛ na kokea mo meende ya Yɛsu, na kɔɔcha: «Mwaame, ndokea, kɔmɔa nae ne mondo wee bwabea.»

9 Simɔni na baa basɛ babɛchaya naakɛ, bakanakana byabua ku kibuichi kyɛ mwɛa wakonja abɔ. 10 Yakɔbɔ na Yɔana, baana ba Sɛbɛlayɔ, babɛchaya mo kokamba kɔmɔɔsa na Simɔni. Abɔ kabee bakanakana byabua. Yɛsu na kosaolea Simɔni: «Ndotenaya; ano ano otabɛ mɔlɔbi we bando.»

11 Aɔtɔsa abɔ bwato kɔ mɔkɔngɛ, na kusia biisɛ, na koyea Yɛsu.

Yɛsu osoolosa mondo wee baacha

(Mat 8:1-4; Mali 1:40-45)

12 Lukinɛ lusu, Yɛsu wabɛchaya mɔ kamɔ kalya ka ɔyɔ mɔsɛngɛ. Ɔmɔ mondo wa chaa ne baacha na kwikeecha. Amɔa awɛ Yɛsu, na kokea bingukumanya kombaa kwakɛ, na kwiyaya: «Mwaame, wasokonda, mbɔnya mwɛchɔ.» 13 Yɛsu na koenda kɔ kɔbɔkɔ, na kumubunda na kɔɔcha: «Natokonda, sokoka!» Akaɛ alya, baacha na komotoka. 14 Yɛsu na kɔmɔɛbɛcha itɛ: «Ndosaoleaya mondo bia bikoolelee. Kombaa, yaaka kwaiangoeche kwa musia kooloka kwao. Oocha biochwa bwasiela Musa mo makomo ma Kakua, ku kusingeecha kooloka kwao. ^{▼▼Ingɛ mondo osoololwa baacha, biengye oyake kwailangoeche ko mapatili kokoangwecha itɛ osooloka; ko bobo batamwimenye kabee mwingya bakinɛ bando. Yɔɔla Law 13:45-46; 14:1-32.}»

15 Ɔbɛɛ bɔbɔ, boombe bwa Yɛsu, na konyaa kɔsɛ, bando babua na kukumbakanaya ku kumuungwa ne koololwa ne ingwo chabɔ. 16 Awɛ na kwisɔka ne bando na koya ataasi bando ku kwiyaya kwa Kakua.

Yɛsu osoolola mondo walɛbɛa bibando

(Mat 9:1-8; Mali 2:1-12)

17 Lɔmɔ lusu, Yɛsu wabɛchaya mo koeyecha. Bafalisayɔ ne baeyechi be Salia babɛchaya ase mo kea ketongo. Batokaya mo tolya tɔɔsɛ twe Kalilaya, ne Yulɛa na toa twe Yɛlusalɛma. Yɛsu wabɛchaya mo koolola balwachi kɔ bɔkɛtɛ bwa Mwaame Kakua. 18 Bamɔ bando baolea, mo kochaa mondo walɛbɛa bibando mu kipɔyɔ. Baenga njea yee kumwingecha mo ndabo bamobeke kombaa kwa Yɛsu. 19 Ndibakonja iboa kukumwingecha kɔmɔa bando baba ne kubua. Ko boa, abɔ na kokobea a nganda ya elya ndabo. ^{▼▼Bamɔ Bayula, mo koaboka mabɔ, babɛchaya mo koanja mete mo nganda, kɔmɔngɔ na koasea ne kobomba.} abɔ na kuunjua lɛmɔ iboa na kumwikya asambea bando kombaa kwa Yɛsu, oe mu kipɔyɔ kyaakɛ. 20 Alya amɔa Yɛsu, kuimenya kwa baa bando, awɛ na kosaolea olya molwachi itɛ: «Ee munjinanɛ, bwabea bwao bosoebeelwa.» 21 Ne baeyechi be Salia, ne Bafalisayɔ, na kobangoa manungunungu na kɔɔcha: «Moke mondo ona ɔtɔbɛngɛa Kakua? Naani unaebeela bwabea ataasi Kakua mwɛɛnɛ?» 22 Yɛsu wacheba ngani chabɔ, na kobabocha itɛ: «Ko eke kotochombya banu ngani mo metema yiinu? 23 Monjaolee: Keke ne kyalɛnga asambea bibi bibee kɔɔcha: ‹Bwabea bwao bosoebeelwa› ɔbɛɛ kɔɔcha: ‹Taoka, ɛnda›? 24 Natokonda mochebe itɛ mee Mwaana we Mondo nae nɛ bɔkɛtɛ bwe koebeela bwabea moono mɔ mɔsɛngɛ.» Kwibɔngɛa, Yɛsu na kosaolea olya walɛbɛa bibando: «Mee ne ɔsɔɔcha, enda kipɔyɔ kyao ne ɔtɔka kwao!»

25 Akaɛ alya, kombaa kwe bando basɛ, awɛ na kotaoka, na koenda kipɔyɔ kya kɛsɛaya awɛ ka koya kwakɛ mo koseka Kakua. 26 Bando basɛ na kokanakana byabua, na koseka Kakua, na kochaa ne bɔɔba itɛ: «Tɔsɔmɔa melendo leno.»

Yɛsu usuitana Lawi

(Mat 9:9-13; Mali 2:13-17)

27 Kɔmɔngɔ kwe maa makomo, Yɛsu na koola mo ndabo na kɔmɔa, ɔmɔ otolambwesa molambo wee chiina lya Lawi ^{▼▼Lawi Ɔbɛɛ Matayɔ. Yɔɔla Mat 9:8 Nɛ bitɔɔcha ayo.}, wabɛɛ a iboa lyaakɛ le kɔɛngɛa molambo. Yɛsu na komosaolea: «Mbyea!» 28 Lawi na kotaoka, kusia biisɛ na koyea Yɛsu.

29 Kɔ mɔngɔ Lawi na kosangyea Yɛsu ketokoyoo kyanaka mo ndabo yaakɛ. Monda mwa elya ndabo mwabɛa balambwisi be molambo babua kɔmɔɔsa ne bando bakinɛ babechaya mo kolya nabɔ. 30 Amɔa Bafalisayɔ ne baeyechi be Salia be ndongo yaabɔ na kɔsɔnɛkɛa baeyechwa ba Yɛsu, na kobangoa kɔɔcha itɛ: «Ko eke kotolya baanu ne kɔsɔa amɔɔsa na baa batɔɛngɛa moombo ne bae ne bwabea?»

31 Yɛsu na kobasaolea itɛ: «Bando bae ne maɛma baatoenga munganga, balwachi ne batomoenga. 32 Sabaaka kwaitane bando baachi kombaa kwa Kakua, nabaaka ne kwaitane bando babea baoloke kotoka bwabea bwabɔ.»

Bamɔ Bafalisayɔ bae mɔ kɔɔcha na Yɛsu

(Mat 9:14-17; Mali 2:18-22)

33 Bamɔ Bafalisayɔ na kosaolea Yɛsu itɛ: «Baeyechwa ba Yɔana ne biito, batwiyaya kotaasi kolya ne kɔsɔa, be kwao bae mo kolya ne kɔsɔa.»

34 Yɛsu na kobasaolea: «Mutuninga itɛ muunaɔsɔna kuchibea baa baitaniwee ko ketokoyoo kye ilangya itɛ balechaya ne moome mwɛɛnɛ we ilangya kɔmɔɔsa nabɔ? Kuusi! 35 Keeko ketabe, olya moome mwɛɛnɛ we ilangya, otatoswe asambea abɔ. Mo maɔ masu ne ataikɔnɛkyɛ abɔ kolya.»

36 Yɛsu na kobasaolea bwakaɛ kee kisinga: «Kuusi mondo otokoka kɔbɛmba kyunda kye ngubɔ meyameya na kɔkɛtɛcha ku ngubɔ yee kaɛ. Ndasoketa bɔbɔ, kyunda kye ngubɔ meyameya kekabundane bwaachi na kea kye kaɛ. 37 Bwakaɛ, kuusi mondo ɔtɔɔsɔna kwiteela lifai leyaleya monda mwee mosao wɛ kɛkɔba ^{▼▼mosao wɛ kɛkɔba Bayula babechaya mo kokaa lifai lyabɔ mɔ mesao yee bikɔba biyabiya, kɔmɔa abyo bingaateka ɔbɛɛ lifai lesoemba. Babechaya mo koketa bobo kɔmɔa mesao yee bikɔba bye kaɛ, byaba biɔlɛbɛa, kabee byekoateka lobeo. Kɛɔ kisinga kɛtɔɔcha bobo: makomo maeyecha Yɛsu maba mayamaya mataasi kutuungwana na bikete byabea bye kaɛ.} kye kaɛ waba mosao wasɛngiwa nɛ kɛkɔba kye mbuchi. Olya otoketa bɔbɔ, otatome lea lifai leyaleya koata elya mesao, lifai letaiteke, ne mesao ɛtaɔnɛkɛ bokata. 38 Bie bwaachi lifai leyaleya liingee mo mosao wɛ bikɔba biyabiya. 39 Kuusi mondo ɔɔsɔa lifai lye kaɛ otakonde kabee kɔsɔa lifai leyaleya. Kɔ kɔmɔa otaɔchɛ itɛ: ‹Lifai lye kaɛ ne lyaachi koeta!›»