Luk 9 | ZmbSC | STEP | Lɔmɔ lusu Yɛsu na kukumbakanya ndomwa chaakɛ ikumi na babee. Awɛ na kɔbaɛbɛcha mwɛchɔ ne bɔkɛtɛ bwe kulikita masombo ne koolola ingwo.

Luke 9

Yɛsu ootoma ndomwa ikumi ne chibee

(Mat 10:5-15; Mali 6:7-13)

1 Lɔmɔ lusu Yɛsu na kukumbakanya ndomwa chaakɛ ikumi na babee. Awɛ na kɔbaɛbɛcha mwɛchɔ ne bɔkɛtɛ bwe kulikita masombo ne koolola ingwo. 2 Awɛ na kobatoma kwasaole ilɔngɔ lye boombe bwa Kakua ne koolola balwachi. 3 Awɛ na kobasaolea: «Kɔ lwɛndɔ lwinu, mochaaya naa nɛ kɛmɔ. Mochaaya naanga nɛ nɔmbɔ, naanga ne mochao, naanga ne biebwa, naanga ne tombaambaa. Mɔbɛchaya ne ngubɔ chibee mɔlwɛndɔ. 4 Ne ndabo ɛɛsɛ etabasɛkɛɛ abɔ, muchikae monda ne bɔtaɔtɔkɛ banu. 5 Ne mo kasɛ kalya katakɔnɛ abɔ kobasɛkɛa, mwitokee. Mo koola amɔ mobakukulee lukunyɛ loe ko meende yiinu. Bia bitaongwe kechebeo kye bwabea bwabɔ.» ^{▼▼Kukukua kausi kotoka ko meende nɛ kɔɔcha itɛ, mondo otomiwee, ndakeesi kabee nɛ lɛni ko olya omotomee abɔ ingɛ ɔɔkɔna ilɔngɔ lemobee nabɔ.}

6 Chia ndomwa na koya; na kochomba kalya ko kalya mo kosaola Ilɔngɔ Lyaachi, ne koolola balwachi ko maboa masɛ.

Keangaa kya Ɛlɔlɛ ku ilɔngɔ lya Yɛsu

(Mat 14:1-12; Mali 6:14-29)

7 Ɛlɔlɛ, wanyaa mɔsɛngɛ we Kalilaya na kuungwa maa makomo masɛ. Kɔ bɔbɔ, awɛ na kututekana motema, kɔmɔa bamɔ bando baɔchaya itɛ, Yɔana Mobatisi usuubuka. 8 Ne bakinɛ itɛ, ndɛnda lya Kakua Ɛlia ne lesobaka. Ne bakinɛ akaɛ itɛ, ɔmɔ asambea ndɛnda cha Kakua che kaɛ ne usuubuka.

9 Ɛlɔlɛ na kɔɔcha: «Mee mwɛɛnɛ ne waɔcha itɛ babɛmbɛ Yɔana motwe. Ko leno, ona mondo utuungwa mee maɔngɔ maakɛ ne naani?» Ko bobo Ɛlɔlɛ na koenga ɔmɔɛ Yɛsu.

Yɛsu osolesa bando tununu totano

(Mat 14:13-21; Mali 6:30-44; Yɔa 6:1-14)

10 Aɔtɔka ndomwa, abɔ na kobangoa kosaolea Yɛsu makomo masɛ maketa abɔ. Kɔmɔngɔ Yɛsu na koyaka nabɔ njɔɔ ne bando, mɔsɛɛsɛ mwe kalya ke Bɛtɛsaila.

11 Ndongo yee bando na kocheba itɛ kɔkɔ abɔ na koyea Yɛsu, abɔ na komoyea. Awɛ na kɔbasɛkɛa na kobangoa kobasaolea makomo me boombe bwa Kakua. Ne baba balwachi asambea abɔ na kobaolola. 12 Aba chooba lingaya, ndomwa ikumi ne babee ba Yɛsu na komoolelea na komosaolea: «Ee Mokoo, ano toe njɔɔ ne kalya. Kɔ bɔbɔ saolea bando bayake ko tolya ne mangɛnɛ mae mɔsɛɛsɛ, baenge kwe kɔkyɛsɛa nɛ byekolya.» 13 Yɛsu na kobasaolea: «Banu bɛɛnɛ mɔbaɛchɛ byekolya!» Abɔ itɛ: «Tuusi ne kyɛndɔ kokoela ena mikati etanu, ne toto tɔmwɛa tobee. Otokonda toye kwaolee baa bando basɛ byekolya?»

14 Bando babɛchaya aɔ, banaolea baa baome tununu totanu.

Yɛsu na kobasaolea baeyechwa bakɛ itɛ: «Mobabeke mo bitongo bye makumi matanu matanu.» 15 Baeyechwa na koketa bwabasaolea Yɛsu, abɔ na kobasaolea bachikae. 16 Kɔmɔngɔ Yɛsu na kotomba elya mikati etanu na toa tɔmwɛa tobee, na kɔlɔla mwiyoo, na kosekoa Kakua. Kɔmɔngɔ, awɛ na kɔmɛbɛmbabɛmba na kɔmɛɛcha baeyechwa bakɛ, bameabanyee bando. 17 Baa bando na kolya na kɔɛba. Baeyechwa na kukumbakanya byasaela, abɔ na kochekya bimbaka ikumi na bibee.

Pɛtɛlɔ ɔsɔɔcha itɛ Yɛsu ne Kilisito

(Mat 16:13-19; Mali 8:27-29)

18 Lɔmɔ lusu Yɛsu mukwiyaya ikɛɛsa kwa Kakua ataasi bando, ne baeyechwa bakɛ babɛɛ naakɛ amɔsa. Awɛ na kobabocha itɛ: «Bando bae mɔ kɔɔcha itɛ mee ne naani?» 19 Abɔ na komosaolea: «Bamɔchi bae mɔ kɔɔcha itɛ awɛ nɛ Yɔana Utuina mbuu; ne bakinɛ Ɛlia, bakinɛ itɛ awɛ ne ɔmɔ wee ndɛnda che kaɛ cha Kakua osuubuka.» 20 Aɔ Yɛsu na kobabocha itɛ: «Chɔ na baanu mɔtɔɔcha nɛɛ ne naani?» Pɛtɛlɔ na komosaolea: «Awɛ ne Kilisito watomiwa na Kakua.»

Yɛsu osochebekya kokwa ne kuubuka kwakɛ

(Mat 16:20-28; Mali 8:30–9:1)

21 Yɛsu na kɔɛbɛcha baeyechwa bakɛ itɛ baɛlɛkaya kochebekya naa ne mondo lee ilɔngɔ. 22 Kabee awɛ na koseboa kobasaolea itɛ: «Biengye mee Mwaana we Mondo namɔɛ manɛnɛ mabua, nakɔniwɛ ne bakoo be mɔsɛngɛ, ne bakoo be basia, ne baeyechi be Salia. Nachiiwe, ne lusu lwa sato, naubuke.»

23 Kwibɔngɛa awɛ na kobasaolea basɛ: «Ingɛ mondo otokonda kombyea, uiebelele awɛ mwɛɛnɛ. Uimenye kochaa mote we maakanu waakɛ lusu ku lusu na kombyea. 24 Kɔ kɔmɔa olya otokonda koolola mwɛchɔ waakɛ otauchimbeche. Olya otachimbeche mwɛchɔ waakɛ ku chiina lyanɛ, otamoolole. 25 Kabee ingɛ mondo otaɔsɔnɛ kokonja ikonja lɛsɛ lyɛ mɔsɛngɛ, ingɛ oswichimbecha aɔ kwiɔna awɛ mwɛɛnɛ, otakonje eke? 26 Kɔ bɔbɔ, ɔɔsɛ otaningwe masoni, ne kuungwea ikomo lyanɛ masɔni, na mee Mwaana we Mondo, namuungwe masɔni. Bitaolee bɔbɔ atabe mee mo boombe bwaanɛ, abɔ ne boombe bwa Isanɛ, kabee bwe meombo ya ama. 27 Kiinɛkinɛ natobasaolea itɛ, bamɔ ko baa bae ana baakakwe ingɛ banamɔa boombe bwa Kakua.»

Yɛsu osoalolwa lulungi

(Mat 17:1-8; Mali 9:2-8)

28 Kɔmɔngɔ kwe masu moanda aɔcha Yɛsu mao makomo, awɛ na koenda Pɛtɛlɔ, na Yɔana na Yakɔbɔ, na konena nabɔ ko ketoo kwaiyaye kwa Kakua. 29 Abɛɛ awɛ mukwiyaya, lulungi lwakɛ na kutuuka ne ngubɔ chaakɛ na kɔkɛnya byabua. 30 – 31 Akaɛ alya mo koa kɔkɛnya na kɔmɔɛka baa baome babee, Musa na Ɛlia. Baa baabaome baba mɔ kɔɔcha na Yɛsu booni botasieleche awɛ meemo yaakɛ na kokwea mo Yɛlusalɛma. 32 Kɔ kɛɔ kyanya, Pɛtɛlɔ ne banjinakɛ baba baolala kalikɔnyɔ. Babyoka na kɔmɔa boa boombe bwa Yɛsu, na baa baabaome bae mo mwema mɔsɛɛsɛ mwaakɛ. 33 Alɛkɛchana baa babaome na Yɛsu, Pɛtɛlɔ na komosaolea itɛ: «Ee Mwaame, bie bwaachi tuchikane ana. Toaboke bitanda bisato: kɛmɔ kyao, ne kya Musa, ne kikinɛ kya Ɛlia.» Pɛtɛlɔ ndaacheba bya byaɔchaya awɛ.

34 Aba Pɛtɛlɔ okee mɔ kɔɔcha iyoo na kobaka na kobabwekea. Baa baeyechwa na kuungwa bɔɔba amɔa abɔ lea iyoo leobawekea. 35 Mo lea iyoo mwaungweka chuuki lyaba mɔ kɔɔcha itɛ: «Ona ne Mwaana waanɛ we mwaa moome wasɔbɔa mee, momuungweechaye!»

36 Aomoa lea chuuki, Yɛsu na kɔmɔɛka ikɛɛsa. Baeyechwa na kuchikaa nyaa ko makomo masɛ mamɔ abɔ. Kabee kɔ maɔ masu, ndekwaba mondo naa nɛ ɔmɔɔsa wasaolea abɔ maɔ makomo mamɔna abɔ.

Yɛsu osoolola mwaana wee ne masombo

(Mat 17:14-18; Mali 9:14-27)

37 Ngɛcha yaakɛ, Yɛsu ne baeyechwa bakɛ basato na kwika kotokea ko keembe. Ndongo mekataa yee bando na komoolelea. 38 Mwingya elya ndongo, ɔmɔ mondo na kokandoka: «Mweyechi, natwiyaya koe awɛ, ngwea lokwa ko ona muulwa waanɛ, kɔmɔa oe ne kita kyanɛ. 39 Isombo letomobunda, akaɛ alya ne lesumusukua kokandoka, kumuchingya bokataa na komoocha luulu ko kanywa; kɔmɔmɔnya manɛnɛ; nalyo letomotoka ko koliineneka. 40 Nasaolee baeyechwa bao, balikite isombo, alakini ndebaɔsɔna!»

41 Yɛsu na kobasaolea: «Banu bando bataasi ne kuimenya ne bwabea. Ndachikane niinu na kuungwa makomo minu mupaka keke kyanya? Mombesee olya muulwa.»

42 Abɛa olya muulwa mo koba koe Yɛsu, akaɛ alya lea isombo na komolaala ase na kumuchingya byabua. Yɛsu na kolekandokea. Awɛ na koolola olya muulwa, na kɔmɔɔtɔsa kwa isakɛ. 43 Bando basɛ na kokanakana byabua kɔ kɔmɔa bɔkɛtɛ bokoo bwa Kakua.

Yɛsu osochekya kabee kokwa ne kuubuka kwakɛ

(Mat 17:22-23; Mali 9:30-32)

Aba bando bakee mo kokanakana ne byaketa Yɛsu, Yɛsu na kosaolea baeyechwa bakɛ itɛ: 44 «Mubunde bwaachi bibi bingamosaolea mee: Mee Mwaana we mondo naochiwe ko mabɔkɔ me bando.» 45 Baeyechwa ndebaungwa bwaachi lee ikomo lyabasaolea Yɛsu. Kɔ kɔmɔa lyaisekiwa kɔɛbɔ baalechebaya. Baungwe nɛ bɔɔba bwe komobocha alyo.

Naani oe mokoo?

(Mat 18:1-5; Mali 9:33-37)

46 Meango na koola asambea baeyechwa ko kocheba ne naani oe mokoo asambea abɔ. 47 Yɛsu waba oocheba ngani chabɔ. Ko bobo, awɛ na kubunda mwaana muchiinini, na komobeka mɔsɛɛsɛ mwaakɛ. 48 Na kobasaolea: «Olya ɔtasɛkɛɛ mwaana boe ona ku chiina lyanɛ, ɔsɔnjɛkɛɛ mee mwɛɛnɛ. Na olya ɔsɔnjɛkɛa, ɔsɔsɛkɛa olya wa wandoma. Kiinɛkinɛ, olya oe muchiinini asambea banu basɛ, awɛ ne mokoo.»

Otaasi mwangani niinu oe ne mbanga yiinu

(Mali 9:38-40)

49 Na awɛ Yɔana na kɔɔcha: «Mwaame, tɔmɔɛchi ɔmɔ ulikitaye masombo mu chiina lyao. Tomokandee kɔmɔa ndaasi we ndongo yiito.» 50 Yɛsu na komosaolea: «Moomokandeaya kɔmɔa, otaasi moangani niito, oe mbanga yiito.»

Bamɔ Basamalia bakɔna kɔsɛkɛa Yɛsu mo kalya kabɔ

51 Aisɛɛna keeko kya Yɛsu koendiwa mwiyoo, awɛ na koekya byabua koya ko Yɛlusalɛma. 52 Na kotoma kombaa kwakɛ bamɔ banande. Abɔ na koya, na kwingea mo kalya kamɔ ke Samalia ko komosangyea iboa. 53 Bando ba kaɔ kalya na kɔkɔna kɔmɔsɛkɛa kɔmɔa waba nɛ lwɛndɔ lwe koya ko Yɛlusalɛma. ^{▼▼Kobangoa kaɛ Bayula ne Basamalia baba baangani. Kɔ bɔbɔ Basamalia ndebakonda naa ne muyula ɔmɔchi oete mɔ mɔsɛngɛ waabɔ ko koya kwaiyaye kwa Kakua ko Yɛlusalɛma.} 54 Kɔ kɔmɔa bia, baeyechwa bakɛ Yakɔbɔ na Yɔana na kɔɔcha: «Mwaame, otokonda twitane toya kotoka mwiyoo na kusia baa bando yekeyeke?» 55 Yɛsu, na kutuuka koe abɔ, na kobakangea. 56 Kwibɔngɛa, abɔ na koya mo kakinɛ kalya.

Batokonda koyea Yɛsu kwe kiinɛkinɛ

(Mat 8:19-22)

57 Abɛchaya Yɛsu ne baeyechwa bakɛ mo njea, ɔmɔ mondo na komosaolea: «Ndakoyeaye kɔsɛ kotayechaye awɛ.» 58 Yɛsu na komosaolea: «Mekaa ɛtɔbɛchaya ne boomba, nɛ nyɔnyi chitɔbɛchaya ne makɛɛsa. Mwaana we Mondo sitɔbɛchaya ne iboa lyɛ kɔkwɛsa.»

59 Yɛsu na kosaolea ukinɛ mondo: «Byea!» Olya mondo na komosaolea: «Mwaame, ndɛkɛa natayacheka isanɛ.» 60 Yɛsu na komosaolea: «Lɛkɛa bakwo bachekaye bakwo babɔ, awɛ yaaka kwa saole bando boombe bwa Kakua.»

61 Ukinɛ mondo na komosaolea: «Ee Mwaame, ndakoyeaye. Ndendecha natayalaa nɔngɔ yaanɛ.» 62 Yɛsu na komosaolea: «Olya otobangoa kokamba ne lokaso nɛ kɔmɔngɔ, ndatowaena ko boombe bwa Kakua.»