Luk 20 | ZmbSC | STEP | Lɔmɔ lusu Yɛsu wabɛchaya mɔ Ɛkalu mo koeyecha bando Ilɔngɔ Lyaachi. Bakoo be basia ne baeyechi be Salia kɔmɔɔsa ne bakoo bɛ mɔsɛngɛ bamoyea na komobocha:

‏ Luke 20

Boombe bwa Yɛsu bɔɔkɔniwa

(Mat 21:23-27; Mali 11:27-33)

1 Lɔmɔ lusu Yɛsu wabɛchaya mɔ Ɛkalu mo koeyecha bando Ilɔngɔ Lyaachi. Bakoo be basia ne baeyechi be Salia kɔmɔɔsa ne bakoo bɛ mɔsɛngɛ bamoyea na komobocha: 2 na komosaolea: «Tosaolea naani okotomee koketa bia biemo, nɛ kɔ bɔkɛtɛ bwa naani kutubiketa awɛ?»

3 Awɛ na kobasaolea: «Na mee bwakaɛ; ningababocha lɛmɔ ikomo, monjaolee: 4 Bɔkɛtɛ bwe kwina bando mbuu bwa Yɔana botokee kwa naani? Kwa Kakua ɔbɛɛ ko bando?»

5 Ko boa abɔ na kwiɔchɛa asambea abɔ: «Ingɛ tosomosaolea itɛ bɔkɛtɛ bwakɛ botokee kwa Kakua, otatoboche: ‹Ko eke banu ndemwaimenya Yɔana?› 6 Ingɛ tɔsɔɔcha itɛ botokee ko bando, bando basɛ batatolalee mawɛ, kɔmɔa batuimenya basɛ itɛ Yɔana wabɛchaya ne ndɛnda ya Kakua.»

7 Kɔ bɔbɔ abɔ na komosaolea itɛ bacheba kotokee bɔkɛtɛ bwa Yɔana. 8 Yɛsu na kobasaolea: «Na mee kabee sikabasaolee kɔ bɔkɛtɛ bwa naani kotoketa mee bii.»

Kisimo kye babyachi babea

(Mat 21:33-46; Mali 12:1-12)

9 Yɛsu na koseboa kosaolea bando keke kisimo: «Ɔmɔ mondo na kobyaa isio lye misabibu, na kulisia ko batɛmi be misabibu, awɛ na koya lwɛndɔ kɔ mɔsɛngɛ wa lɛa ko masu babua. 10 Aolea keeko kye kokaola, awɛ na kotoma mokambi waakɛ ɔmɔɔsa ko baa batɛmi be misabibu bamɔɛchɛ lyaakɛ chabo lye mebyao. Baa batɛmi na kumututa na kɔmɔɔtɔsa mabɔkɔ bokata. 11 Mwɛɛnɛ we isio na kobatomea ukinɛ mokambi, abɔ na kumututa nɛ kɔmɔbengɛa, kɔmɔngɔ na kɔmɔɔtɔsa mabɔkɔ bokata. 12 Mwɛɛnɛ we isio na kobatomea kabee mokambi wasato, amobocha abɔ, na komoanda, ne komokosoa ko mbanda yee isio. 13 Ko boa mwɛɛnɛ we isio lye misabibu na kɔɔcha: ‹Nakete booni? Ndatome mwaana waanɛ otokonda mee; kende batamɔnyɛmyɛ.› 14 Amɔmɔa batɛmi be misabibu, abɔ na kɔɔcha asambea abɔ: ‹Mɔlɔlɛ moyani we lee isio; tumuchie kɔ bɔbɔ totaleyane.› 15 Abɔ na kumubunda, komoocha ko mbanda yee isio na kumuchia.»

Kusia Yɛsu na kobabocha: «Booni botakete mwɛɛnɛ we isio lye misabibu ko baa batɛmi? 16 Awɛ otabake, ne kusia njɛngɔ baa batɛmi, ne ko bakinɛ batɛmi.»

Aungwa bando bɔbɔ; abɔ na kɔɔcha: «Makomo boe mamɔ matooleleaya naa nalyo!»

17 Yɛsu na kobalɔla ne kobasaolea: «Toto tuchimba twa Kakua totoenga kotosaolea eke?
‹Iwɛ lyakosolwa ne baaboki
letae ne iwɛ lekataa lye moota we koanga.› ^{▼▼Yɔɔla Nem 118:22.}

18 Olya otakee mo nganda mwa lɛɔ iwɛ ɔtabɛnjɛkɛ, na olya otakeele alyo letamwikinye.»

Biitowaena kolamboa molambo ko mokoo wɛ mɔsɛngɛ?

(Mat 22:15-22; Mali 12:13-17)

19 Akaɛ alya bakoo be basia ne baeyechi be Salia na koenga njea yee kumubunda, kɔmɔa bacheba itɛ Yɛsu watɛcha kɛɔ kisimo ne kombanga yaabɔ, abɔ na kotena bando. 20 Abɔ na koondea Yɛsu; abɔ na komotomea bando batɔmɔɛka bwe be lokani ko komokwatesa mɔ mɛɔcha, ko boa bakonje njea yee komoolecha ko bakoo bɛ mɔsɛngɛ. 21 Baa bando na komobocha: «Mweyechi, totocheba itɛ waanga kɔɔcha ne koeyecha makomo me kiinɛkinɛ, ndɔtɔlɔla lulungi lwe mondo, otoeyecha kiinɛkinɛ botoekya Kakua. 22 Tatosaolea: Salia yiito etotosaolea kolamboa molambo kwa Kaisali ɔbɛɛ ndɛɛkɔ?»

23 Acheba Yɛsu mɔtɛtɛkanya waabɔ, awɛ na kobasaolea: 24 «Monangoeche kingɔlɔngɔlɔ kɛmɔɔsa kye tombaambaa, luungi lolo na lee chiina byakunyiwa ko keke kingɔlɔngɔlɔ ne bya naani?» Abɔ na koyembokea: «Bya nombe Kaisali.» 25 Yɛsu na kobasaolea: «Mɔɛchɛ Kaisali bie bya Kaisali, nɛ kɔɛcha Kakua bie bya Kakua.»

26 Abɔ ndebakonja njea yee komokwatesa mɔ mɛɔcha kombaa kwe bando: mo kokanakana, abɔ na konyamea.

Basandukayɔ basobocha Yɛsu ko mbanga yee kuubuka kwe bakwo

(Mat 22:23-33; Mali 12:18-27)

27 Bamɔchi ko Basandukayɔ (abɔ nɛ batɔɔcha itɛ kuusi kuubuka kwe bakwo) na koolelea Yɛsu na komobocha: 28 «Mweyechi, ungwa byatotomeenya Musa: Ingɛ mobotwa naakɛ ne mondo osokwa, ne kusia mokachi otaasi ndabota naakɛ mwaana, mobotwa naakɛ otayane ona mwalyango ko komobotea mobotwa naakɛ baana. 29 Kwabechaya babotwa mosambo be ikundu lɛmɔɔsa. We kombaa watomba, na kokwa ndekusia mwaana. 30 Wa bee na koyana olya mwalyango, awɛ na kokwa ndasia mwaana. 31 Byaba bɔbɔ ko wabasato naa ne ko basɛ mosambo, basɛ na kokwa ndekusia mwaana. 32 Kwibongee, olya mwalyango na kokwa. 33 Ko boa a kuubuka kwe bakwo, olya mwalyango otaungwe wa naani asambea abɔ? Kɔmɔa abɔ basɛ mosambo bamotomba.»

34 Yɛsu na kobasaolea: «Bando ba keno keeko batotomba ne kɔsɔngwa. 35 Baa bando batamɔɛ Kakua itɛ bataubukɛ ne kowaena kwingea mo boombe boe mokoba, ndebakatomba nɛ kɔsɔngwa. 36 Kɔ kɔmɔa bakakɛɔsɔnɛ kabee kokwa. Abɔ bataongwe boe meombo. Baa ne bataungwe baana ba Kakua kɔmɔa Kakua otabaubue. 37 Musa waɔcha paa paa itɛ bakwo bataubuke. Bibi bitɔchɔbɔlwa mu tuchimba twakɛ tɔtɔɔcha ko mbanga yee kusiekea kwe kichina kye malɛngɛ. Awɛ na kwitana Mwaame itɛ: ‹Kakua ka Abulaamu, Kakua ka Isaka, na Kakua ka Yakɔbɔ.›» ^{▼▼Yɔɔla Kot 3:2,6.} 38 Yɛsu na kɔɔcha kabee: «Kakua ndatoongwa Kakua we bakwo, Kakua we bae mwɛchɔ; kɔmɔa kombaa kwakɛ basɛ bae mwɛchɔ.»

39 Baeyechi bamɔ be Salia na kɔɔcha: «Mweyechi ɔsɔɔcha bwaachi.» Na abɔ ndebaɛlɛka kabee komobocha bakinɛ makomo. 40 Na abɔ ndebaɛlɛka kabee komobocha ikomo.

Kilisito na Lauli

(Mat 22:41-46; Mali 12:35-37)

41 Yɛsu na koseboa kobasaolea: «Ko eke kɔtɔɔcha abɔ itɛ Kilisito ne mwaana wa Lauli? 42 Lauli mwɛɛnɛ ɔtɔɔcha mu kitabu kye Nembo:
‹Mwaame wiito Kakua wasaolea Mwaame waanɛ:
“Chikaa ko saa ndome yaanɛ;
43 ɛka akabeka mee baangani nao koongwa
kiinyeo kyao.”› ^{▼▼Yɔɔla Nem 110:1.}

44 Kende Lauli usumuitana Kilisito ne ‹Mwaame waakɛ› booni botaongwe awɛ mwaana wa Lauli?»

Maani ko baeyechi be Salia

(Mat 23:1-36; Mali 12:38-40)

45 Bando basɛ bakee mo kumuungweecha Yɛsu, awɛ na kosaolea baeyechwa bakɛ: 46 «Mwilɔlɛ ne baeyechi be Salia. Batokondaya kɔɛnda mo kowaa ngubɔ cha lɛa. Kabee batokondaya kwinokewaya nɛ bɔnyɛmu mwingya mwe bando; ne kuchikaa kombaa mo masinakɔki ne mu bitokoyoo be elya. 47 Batobakoa balyangɔ biemo byabɔ biisɛ, kabee batwiyaya kwa Kakua kyanya kya lɛa, kɔmɔa itɛ bamɔɛkɛ kombaa kwe bando. Ko boa Kakua otabamɔnyɛ manɛnɛ matɔba kokoela bakinɛ.»