Luk 8:26-39 | ZmbSC | STEP | Kɔmɔngɔ kwa bibyɔ, Yɛsu ne baeyechwa bakɛ na koabokea mɔ mɔsɛngɛ we Bakɛlasi, ikinɛ mbanga yee mɔsɛngɛ we Kalilaya.

Luke 8:26-39

Yɛsu osoolola mondo we masombo

(Mat 8:28-34; Mali 5:1-20)

26 Kɔmɔngɔ kwa bibyɔ, Yɛsu ne baeyechwa bakɛ na koabokea mɔ mɔsɛngɛ we Bakɛlasi, ikinɛ mbanga yee mɔsɛngɛ we Kalilaya. 27 Aika Yɛsu mo bwato, mondo ɔmɔ we mo kaa kalya, na kwisɛɛna mɔsɛɛsɛ mwaakɛ. Ona mondo wabɛa ne masombo masu mabua. Wabɛchaya munduu. Ndabɛchaya kabee mu kuchikaa ko ndabo, waichikaneaya ne ko manda. 28 Amɔa awɛ Yɛsu, na kokandoka, na kwilaala mo bikɛta bya Yɛsu, na kokandoka itɛ: «Yɛsu Mwaana wa Kakua we Kwiyoo Njɔɔ mwe biisɛ, ne keke ketonenga nao? Natwiyaya koe awɛ, ndongetaya bwabea.» 29 Waɔcha bɔbɔ kɔmɔa Yɛsu wabɛa ususia kosaolea lea isombo leole mo olya mondo. Lea isombo lyabɛa mu kumukuula kɛsɛ ne keeko. Kabee, bando babɛchaya mo komokaka nɛ mɛyɔɔ ndabuusukaya, na utubikutuaya. Lyakaɛ lea isombo lwamusukuaya koya a iboa ataasi bando.

30 Yɛsu na komobocha: «Chiina lyao ne naani?» Awɛ itɛ: «Ndongo.» Waɔcha bɔbɔ kɔmɔa wabɛa usubundwa ne masombo mabua. 31 Maa masombo na kwiyaya kwa Yɛsu ndabasukuaya mo mochongo.

32 Alya abɛchaya mɔchɔa we ngoobe chabua, chalechaya mo nganda mwe keembe. Maa masombo na kwiyaya kwa Yɛsu omasaolee maingee mu chia ngoobe. Awɛ na komatoma. 33 Masombo na koola mo olya mondo na kwingea mu chia ngoobe. Olya mɔchɔa wa chia ngoobe na kwika mbeo mu kichibachiba. Akaɛ alya, acho na kokeela amɔ na kwina.

34 Amɔa baa basangi ba chia ngoobe boa na kochokea mo kalya ne ko mangɛnɛ, kwasaole bando lɛɔ ilɔngɔ. 35 Bando na koya kwamɔɛ makomo maeteka. Aolea abɔ kwabɛa Yɛsu, na kosanga masombo masoola olya wabɛa namɔ, oe buchikae mo meende ya Yɛsu. Wabɛa osowaa ngubɔ, kabee wabɛa otae mwɛchɔ. Baa bando na kuungwa bɔɔba. 36 Bando baimɔɛna byaeteka, na kosaolea bando bakinɛ bwaoloka olya mondo wabɛa ne masombo.

37 Chɔ bando basɛ bɛ mɛsɛngɛ yee mɔsɛɛsɛ mwe mɔsɛngɛ we Bakɛlasi na kɔɛngɛa otoke mɔ mɔsɛngɛ waabɔ kɔmɔa baungwa bɔɔba bwabua. Aɔ Yɛsu na kwingea mo bwato, ɔɔtɔkɛ kwatokea awɛ. 38 Na olya mondo watokiwa ne masombo na kɔɛngɛa oyake na Yɛsu. Yɛsu na kɔmɔɔtɔsa na komosaolea: 39 «Ɔtɔka ko ndabo yao kwasaole bando melendo esokoketea Kakua.» Olya mondo na koya mo kalya mo kosaolea bando biisɛ bimoketee Yɛsu.