Mar 13 | ZmbSC | STEP | Abɛchaya Yɛsu mo koola konjɛ kwɛ Ɛkalu, ɔmɔ ko baeyechwa bakɛ na komobocha: «Ee Mweyechi, lɔla makɛ mawɛ maachi! lɔla maabo mama maachi!»

Mark 13

Yɛsu ososaola kɔɔnɛka kwe Ɛkalu

(Mat 24:1-2; Luk 21:5-6)

1 Abɛchaya Yɛsu mo koola konjɛ kwɛ Ɛkalu, ɔmɔ ko baeyechwa bakɛ na komobocha: «Ee Mweyechi, lɔla makɛ mawɛ maachi! lɔla maabo mama maachi!» 2 Yɛsu na komosaolea: «Ɔtɔmɔa maa maabo manaka? Kokasae iwɛ mo nganda mwe iwɛ likinɛ litaasi lekasunjulwe.»

Manɛnɛ makaba kombaa kwe kɔɔtɔka kwa Yɛsu

(Mat 24:3-14; Luk 21:7-19)

3 Abɛchaya Yɛsu buchikane mo nganda mwe keembe kye Misɛituni kɔlɔlana nɛ Ɛkalu, Pɛtɛlɔ, na Yakɔbɔ, na Yɔana, na Andele na komobanga kwabɛchaya awɛ ikɛɛsa. Na komobocha: 4 «Tosaolea, mama makomo makaeteka keke keeko ne bike bisinga batamɔɛ itɛ bibi biisɛ bingaketeka?» 5 Kɔ bɔbɔ Yɛsu na kobangoa kobasaolea: «Mɔbɛ miisɔ, mondo naa ne ɔmɔɔsa ndamɔɛngaya. 6 Kɔmɔa bando babua bakabechaya ku chiina lyanɛ, ne kɔɔchɛ itɛ: ‹Mee ne Kilisito!› Bataɛngɛ bando babua. 7 Ataungwaye banu mangunungunu me bita, mɔbɛchaya ne keangaa. bie bwaachi bibyɔ biolee, alakini biikabɛ byɛ kɔbɔnga. 8 Kɛbɛɔ ne kɛbɛɔ bitachiane, boombe ne boombe na abo botachiane. Kotaongwe koa na kono katɛndɛa mɔ mɔsɛngɛ, ne kotaongwe njaa. Bia biisɛ bitaongwe bwe kobangoa kwe lobaba lwɛ lusumɛ.

9 «Alakini baanu mɔbɛ miisɔ. Kɔmɔa batamotaeke ku biboo bye bakoo, kɔmɔa bamɔmɔnyɛ manɛnɛ. batabakomoaye mo masinakɔki, ne kobachaaya kombaa kwe bakoo bɛ mɔsɛngɛ, ne kombaa kwe nombe koetea chiina lyanɛ. Kɔ bɔbɔ, motaongwe mo kobasingeecha chiina lyanɛ kombaa kwabɔ. 10 Bieko, bie bwaachi Ilɔngɔ Lyaachi letasaoliwe ku bibɛɔ biisɛ. 11 Ne atamukumaye abɔ, ko kobachaa ko batɔbɛmba makomo, mɔbɛchaya mu kwibocha motaɔchɛ eke, alakini mɔɔchɛ bitakonje banu a kɛɔ kyanya, kɔmɔa itɛ, maɔ makomo maakatoke ko banu bɛɛnɛ, Alakini Motema wa Ama ne otabaɛchɛ. 12 Mobotwa naakɛ ne mondo otamooche ko kokwa. Isa mwaana otaoche mwaana waakɛ, ne baana na abɔ, batatuuluke baangani be ba isabɔ ko kobachiekya. 13 Mɔtakɔniwɛ ne bando basɛ kombanga yaanɛ, alakini olya otakemye motema ne kwibɔngɛɛ, otaoloke.»

Manɛnɛ makoo makoo

(Mat 24:15-28; Luk 21:20-24)

14 «Maɔ masu mɔtamɔɛ olya utwitaniwa ‹Mokoo wɛ kɔɔna.› ^{▼▼Yɔɔla Lan 9:27; 11:31; 12:11.} osobekwa mwiboa letaasi awɛ ndatowaena koongwa. (Ɔtɔyɔɔla mama makomo ochebe bitɔɔcha amɔ.) Ko bobo bataongwe ku Yulɛa bachokee ku biembe 15 na olya ɔtabɛ a nganda yee ndabo, ndaikaya kabee ku kwingea mo ndabo yaakɛ kwaende keemo, 16 na olya ɔtabɛ ko masio ndaɔtokaya kabee mo ndabo kwaende ikɔti lyaakɛ!

17 «Mamɔ masu bitabɛ mayombe ko baa be maeme na baa batɔnyɔmya! 18 Mwiyaye biolelaya mwinjɔ. 19 Kɔmɔa, ko maa masu kotaongwe manɛnɛ mataasi manamɔnɛka kobangoa asɛnga Kakua mɔsɛngɛ na leeno. Ne ndikwakaba manɛnɛ me koeyana namɔ. 20 Ne kende Mwaame ndingyaiyeya masu me manɛnɛ kende kungaongwa mondo ungasaa mwɛchɔ. Alakini osomaiyeya kokoolola bando basɔbɔa awɛ.

21 «Kɔ bɔbɔ, ingɛ mondo osobasaolea itɛ: ‹Mɔlɔlɛ Kilisito oe ana!› ɔbɛɛ ‹Oe koa!›, muumwimenyaya. 22 Kɔmɔa kotaolee bando bataitanɛ kwe manu ‹Kilisitɔnɛ› amɔsa ne ndɛnda che manu. Baba basɛ batakete bisinga ne makomo me kokanyakanya, kɔmɔa byasɔɔsɔnɛka baonge naanga ne bando basɔbɔlwa na Kakua. 23 Alakini banu, moongwe miisɔ; kɔmɔa nasɔbaɛbɛcha ku bia biisɛ.»

Kɔɔtɔka kwe Mwaana we Mondo

(Mat 24:29-31; Luk 21:25-28)

24 Yɛsu na koseboa kɔɔcha: «Mo maɔ masu, kɔmɔngɔ kwe kyanya kye mayombe, chooba letabekwe ikunyɛ, songe etachimbeche kɔkɛnya kwakɛ 25 sɔkɔta naacho chitakee kotoka kwiyoo, ne biisɛ bie ne bɔkɛtɛ koa kwiyoo botachinganywɛ. ^{▼▼Yɔɔla Isa 13:10; 34:4.}

26 «Kusia, mo kea kyanya, bando batamɔɛ botabaake mee Mwaana we Mondo kobaka mwikongo, nɛ bɔkɛtɛ bwabua ne boombe. 27 Kɔ bɔbɔ ndatome meombo yaakɛ mbanga chisɛ che mɔsɛngɛ kɔmɔa bakumbakanye bando banɛ basɛ basɔbɔa mee mɔ mɔsɛngɛ ɔɔsɛ.»

Maeyechi kotokea mutini

(Mat 24:32-35; Luk 21:29-33)

28 «Mochebe kisimo ketomoeyecha Mutini: olya mote atoongwa metabe yaakɛ esonaka, ne bisɛsi byakɛ kɔtɔmbɛa, banu motocheba itɛ bowa bungaolea 29 Kabee, atamoɛ banu makomo matokee mee mɔ kɔɔcha masoketeka, mochebe itɛ mee Mwaana we Mondo ningaolea, ne natae kukinda. 30 Kiinɛkinɛ natobasaolea, bando be loo lɔɔka baakakwe basɛ mama makomo minaolea. 31 Iyoo nɛ mɔsɛngɛ bitaete, alakini mɛɔcha yaanɛ ndeyakaeta.»

Kakua ikɛɛsa ne otocheba kɔbɔnga kwe mɔsɛngɛ

(Mat 24:36-44)

32 «Ko kocheba lusu ne kyanya, kuusi mondo naa nɛwɛ otachebe ataolee abyo. ɔbɛɛ meombo yee mwiyoo, ɔbɛɛ na mee Mwaana we Mondo, alakini Tati ikɛɛsa ne otocheba. 33 Mɔbɛ miisɔ! Mwimane ko maboa minu, kɔ kɔmɔa mocheba maa makomo mataolee keke kyaanya. 34 Mao makomo matabɛ boe mondo otoya lwɛndɔ. Olya mondo na kusiela bakambi bakɛ ndabo kɔmɔa bamekongoseke. Na kɔɛcha ɔɔsɛ mondo meemo yaakɛ. Kusia na kosaolea mosangi we mukinda ɔbɛɛ miisɔ. 35 Na baanu moongwe miisɔ! Kɔmɔa mocheba ataɔtɔkɛ mokoo we ndabo: ɔbɛɛ otaolee kyɔlwa, ɔbɛɛ mwingya butu, ɔbɛɛ atobeengana ngɔkɔ, ɔbɛɛ mambombe. 36 Kɔ bɔbɔ, mwilɔlɛ, ndaoleaya kwinu kotaasi baanu kocheba ne komosanga moe mo kaɔ! 37 Bia bisɔɔcha mee alya, natɔɔcha ko basɛ, Moongwe miisɔ!»