Mar 14 | ZmbSC | STEP | Kwasaela ne masu mabee koolea lusu lwe Pasaka ne lwe mikati etaasi kɔtɛwa bisunga bye mikati. Bakoo be Mapatili ne baeyechwa be Salia na koenga njea che kukuma ku bwise Yɛsu kɔmɔa bamuchie.

Mark 14

Kaɔlɛ ke kuchia Yɛsu

(Mat 26:1-5; Luk 22:1-2; Yɔa 11:45-53)

1 Kwasaela ne masu mabee koolea lusu lwe Pasaka ne lwe mikati etaasi kɔtɛwa bisunga bye mikati. Bakoo be Mapatili ne baeyechwa be Salia na koenga njea che kukuma ku bwise Yɛsu kɔmɔa bamuchie. 2 Kɔmɔa baɔchaya: «Tumubundaya lusu lwe ketokoyo bando baochaya moocho.»

Mwamokachi ɔmɔ usuiteela Yɛsu malasi

(Mat 26:6-13; Yɔa 12:1-8)

3 Aba Yɛsu ko Bɛtania, na kwingea mo ndabo ya Simɔni wee baacha; abɛchaya Yɛsu mo kolya, ɔmɔ mwamokachi na koolea ni ichupa lya sengwa ne iwɛ lyaachi, lyachaa bɛɛ ne malasi me ibɛi lekataa masɛngwa ne maloba me mote we malalo. Awɛ na kubuka lea ichupa na kumwiteela Yɛsu mo motwe. 4 Bando bamɔchi asambea baa babɛchaya alya na koemoka na kwiɔchea: «Ko eke kɔɔna maa malasi? 5 Nde mingaolekiwa mu linali ngama chisato, ^{▼▼Linali mia chisato: Twabɛchaya tombambaa twe kulipa ngambi songe metondoo.} kusia, na koabanyea bakɛna!» Kɔ bɔbɔ na koemokea olya mwamokachi byatɔba. 6 Yɛsu na kobabocha: «Ko eke kotoemokea baanu ona mwamokachi? Mɔmɔlɛkɛɛ byakɛ kɔmɔa awɛ osongetea keemo kya chacha. 7 Bakɛna bataongwaye mwingya mwiinu masu masɛ. Kabee motowaena kobakwasa kyanya kɛsɛ ketokonda baanu, alakini mee mɔɔkabɛ naanɛ masu masɛ. 8 Oona mwamokachi osoketa kɛɔsɔnɛɛ awɛ koketa, kɔmɔa usuisa malasi kɔ lɔkɔba lwaanɛ kombaa, ko kosangya kochekwa kwanɛ. 9 Kiinɛkinɛ natobasaolea: mɔ mɔsɛngɛ ɔɔsɛ kotaɔchiwɛ Ilɔngɔ Lyaachi, batasimbokechaye bikete bya ona mwamokachi. Kɔ bɔbɔ, bando ndebakamoebela.»

Yula Isikaliɔta osoenga njea yee kolamboa Yɛsu

(Mat 26:14-16; Luk 22:3-6)

10 Kɔmɔngɔ kwe bɔbɔ, Yula Isikaliɔta ɔmɔ ko baa ikumi na babee, na koya ko bakoo be Mapatili, kɔmɔa obalamboele Yɛsu. 11 Kɔmɔngɔ kwe kumuungwa, abɔ na kɔmɛma byabua. Na komobaecha itɛ batamɔɛchɛ tombaambaa. Kɔ bɔbɔ Yula na koenga kyanya kyaachi ketowaena koocha Yɛsu.

Yɛsu osolya biewa bye Pasaka ne baeyechwa bakɛ

(Mat 26:17-25; Luk 22:7-14,21-23; Yɔa 13:21-30)

12 Lusu lwe kombaa lwe bitokoyoo bye mikati etaasi ne bisunga bye mikati na koolea. Loa lusu, ne lwa yengoaya abɔ mɛkɔkɔ che kolya ko Pasaka. Baeyechwa ba Yɛsu na komobocha: «Koni kotokonda awɛ tokosangyee biewa bye Pasaka?»

13 Yɛsu na kotoma baeyechwa bakɛ babee, ne kobasaolea: «Moyake mo mosomba, motasange ɔmɔ mwamoome oe bochae kebongo kye maache, momoyee. 14 Ne mo ndabo etaingee awɛ, mosaolea mwɛɛnɛ we ndabo itɛ: ‹Mweyechi ɔsɔɔcha itɛ: ‹a leke iboa letalee mee Pasaka ne baeyechwa baanɛ.› 15 Olya mwɛɛnɛ we ndabo otabaangoeche kyumba kɛmɔɔsa kekatala kye mo nganda, monda mwa kea kyumba, motabange biemo biisɛ biosangwa bwaachi, alya ne atatosangyee banu biewa bye Pasaka.»

16 Baa Baeyechwa na koya mo mosomba. Aolea abɔ moa na kosanga biisɛ bwabasaoleaya Yɛsu bwaachi. Na kobangoa kosangya biewa bye Pasaka.

17 Aolea kyɔlwa, Yɛsu na koolea ne Ndomwa chaakɛ ikumi ne babee. 18 Aba abɔ kɔ mɛsa bae mo kolya, Yɛsu na kɔɔcha: «Kiinɛkinɛ natobasaolea, ɔmɔ asambea banu otolya naanɛ, otangoche.»

19 Ndomwa aungwa abɔ bɔbɔ na koemoka byabua, na kobocha ɔmɔ ɔmɔ: «Ɔyɔ na mee?» 20 Awɛ na kobasaolea: «Oe ne ɔmɔɔsa ko baanu ikumi na babee, olya utuunda naanɛ kɔmɔɔsa mo saani. 21 Mee Mwaana we Mondo ndachiewe kɔlɔlana ne bwaanga kɔɔcha Tuchimba twa Kakua kombanga yaanɛ. Lokwa ko olya mondo otangoche. Bingaba bwaachi kɔ ɔyɔ mondo ndangaboteka!»

Ilya le koeyoka Mwaame

(Mat 26:26-30; Luk 22:14-20; 1 Kɔl 11:23-25)

22 Abɛchaya abɔ mo kolya, Yɛsu na koenda mukati, kɔmɔngɔ kwe kwiyaya Kakua, na kumubuka, na kɔbaɛbɛcha ne kɔɔcha: «Moende, ona ne mobee waanɛ.» 23 Kusia, na kubunda kebacha, kwiyaya kwa Kakua, ne kɔbaɛbɛcha. Basɛ na kɔsɔa. 24 Kusia na kobasaolea: «Mama ne masi maanɛ me ilaani lya Kakua, mataiteke kɔkɔɛbɔa bando babua. 25 Kiinɛkinɛ natobasaolea itɛ sakasɔa kabee lifai ɛka atasɔɛ mee boyaboya mo boombe bwa Kakua.»

26 Asia abɔ koemba nembo che koseka Kakua na kokobea ko keembe kye Misɛituni. ^{▼▼Abɛchaya Bayula bausia kolya biewa bye Pasaka baembaya Nembo 115-118.}

Yɛsu ɔsɔɔcha ɔsɔɔcha itɛ Pɛtɛlɔ otamotone

(Mat 26:31-35; Luk 22:31-34; Yɔa 13:36-38)

27 Kusia Yɛsu na kosaolea baeyechwa bakɛ: «Banu basɛ motanjangameke, kɔmɔa byakunyewa:
‹Ndachie mosangi,
nɛ mɛkɔkɔ ɛɛsɛ etamwaokane.› ^{▼▼Yɔɔla Sak 13:7.}

28 Alakini, ataubuke mee, ndabaiyambeele ko Kalilaya.»

29 Pɛtɛlɔ na komosaolea: «Ɔbɛɛ basɛ batakosangameke, mee ndɛɛkɔ.» 30 Yɛsu na komosingeecha: «Kiinɛkinɛ natokosaolea, mu butu bwe leno, kombaa kwe ngɔkɔ kobeengaana ngongobwa chibee, otaongwe osondona ngongobwa chisato.»

31 Alakini Pɛtɛlɔ na koseboa kɔɔcha: «Mee ngɔmɔa basɛ ɔbɛɛ kokwa kɔmɔɔsa nao ndakwe. Alakini kokotona, sikakotone naa ne bichiinini.» Abɔ basɛ na kɔɔcha bwakaɛ bɔbɔ.

Yɛsu usuiyaya kwa Kakua koa Kɛtɛsɛmani

(Mat 26:36-46; Luk 22:39-46)

32 Kɔmɔngɔ kwe bɔbɔ Yɛsu ne baeyechwa bakɛ na koolea ku iboa lɛmɔ lyaitaniwa Kɛsɛtɛmani. Na kobasaolea: «Motachikane ano na mee naye kwaiyaye kwa Kakua.» 33 Awɛ na koya na Pɛtɛlɔ, na Yakɔbɔ na Yɔana. Awɛ na kobangoa kwikakanya ne kochabwa motema. 34 Na kosaolea: «Motema waanɛ ɔsɔbɛbɛlwa byatɔba bye kunjia, kɔ bɔbɔ muchikane ano kaboombo.» 35 Kusia na kukwisɔka ne ndambokwa chikɛɛkɛ, na kokea bingukumanya. Na kwiyaya kwa Kakua itɛ, ingɛ bitaɔsɔnɛkɛ, kea kyaanya kye mayombe keemooleleaya. 36 Awɛ na kɔɔcha: «Abba ^{▼▼Abba Ɛtɔɔcha itɛ «Tati».}, Tati, kwao biisɛ bitɔɔsɔnɛka. Kea kebacha kye mayombe kiisɔkyɛ naanɛ. Ko kokonda kwao ne koketeke, alakini ndɛɛkɔ kokonda kwanɛ.»

37 Aɔtɔka awɛ a iboa lyasia awɛ baeyechwa bakɛ, na kobasanga baɔkyɛsa. Awɛ na kobocha Pɛtɛlɔ: «Ɛɛ Simɔni, ɔɔkyɛsa? Ndwaɔsɔna kuchikana kaboombo naa ne kyanya kɛmɔɔsa? 38 Chɔ mɔkyɛsaya kabee ne mwiyaye kwa Kakua, mo baɛlɛkiwa, kɔmɔa motema oe nɛ bɔkɛtɛ, alakini mobee ɔsɔlɛbɛa!»

39 Yɛsu na kobasia kabee na koya kwaiyaye, na kɔɔtɔkɛa yakaɛ mɛɔcha. 40 Aɔtɔka awɛ kabee a iboa lyabɛchaya baeyechwa bakɛ na kobabasanga baɔkyɛsa kabee, kɔmɔa miisɔ mabɔ maɔnyɛma nɛ kaɔ. Abɔ na koena bye komosaolea. 41 Aɔtɔka Yɛsu lwasato a iboa lyabɛchaya baeyechwa bakɛ na kobasaolea: «Ee banuse mokee mɔ kɔkyɛsa ne koomona? Kɔbɔnga na kono! Kyanya kesoolea! Mee Mwaana we Mondo ningaochiwa mo mabɔkɔ me bando babea. 42 Motaoke! Toyake! Mɔlɔlɛ olya otangoche ungaolea!»

Kubundwa kwa Yɛsu

(Mat 26:47-56; Luk 22:47-53; Yɔa 18:3-12)

43 Na alya akaɛ okee mɔ kɔɔcha, Yula na koolea, ɔmɔ ko baa ikumi na babee. Wabɛchaya ne mɔɔmba we bando babua babɛchaya ne tonjamba, nɛ nɔmbɔ mo mesani. Baa bando batomiwa ne bakoo be Mapatili, ne baeyechwa be Salia ne bakoo be Bayula. 44 Yula waba ne usia kobasaolea kisinga ketabachebekye. Waba ne ususia kobasaolea kombaa itɛ: «Olya otaɛnyɛ mee, nawɛ, momokwate ne koya naakɛ mo komokongoseka bwaachi.»

45 Aolea Yula kwabɛchaya Yɛsu, akaɛ alya na kumwisɛnɛnɛa ne kɔɔcha: «Mweyechi!» Kusia na kɔmɔɛnya. 46 Baa bando na kumubunda Yɛsu akaɛ alya ne komokaka. 47 Alakini ɔmɔ ko baa babɛchaya alya, akaɛ alya na koolola kipanga kyaakɛ na kɔbɛmba itwe le mokambi we Mokoo we Mapatili.

48 Kusia Yɛsu na kobabocha: «Ko eke kotoba baanu kwambunde mokoenda tonjamba, ne mɛnɔmbɔ bwe bando bae mo koya kwabunde ngiba? 49 Lusu ku lusu nabɛɛ niinu monda mwɛ Ɛkalu mo kobaeyecha, alakini ndemwambunda. Alakini bibi bisoolea ne kɔmɔa byakunyiwa mu tuchimba twa ama biolee.»

50 Akaɛ alya baeyechwa bakɛ na komosangameka ne kochoka. 51 Ɔmɔ mwaana we mwamoome na komoyea, waba wabwaa kabalɛkani, bando na koenga komokwata; 52 awɛ na kusia kaa kabalɛkani, na kochoka munduu.

Yɛsu kombaa kwe keboo kekoo kye Bayula

(Mat 26:57-68; Luk 22:54-55,63-71; Yɔa 18:13-14,19-24)

53 Baa bando na kochaa Yɛsu kombaa kwe Mokoo we Basia. Alya ne abɛa abɔ basukumbakana, bakoo be Mapatili, ne bakoo be Bayula ne baeyechi be Salia. 54 Pɛtɛlɔ wayeaya Yɛsu njɔɔ ne mo kyambaa kye Mokoo we Mapatili. Na kuchikaa amɔsa ne basangi, mɔ kɔóndaa toya.

55 Baa bakoo be Mapatili basɛ ne bakoo basɛ be Lobanja lwe Bayula, babɛa mo koenga Ikomo letaemanee abɔ ko komotaeka Yɛsu, alakini ndebalekonja. 56 Bando babua bamwinyekecheaya makomo me manu, Alakini basɛ ndebabɛchaya ne loleme lɔmɔɔsa.

57 Kusia, bamɔchi mwingya mwabɔ na kotaoka na komoendea makomo mabua me manu itɛ: 58 «Oona mondo bae Tuiungwee oe mɔ kɔɔcha itɛ: ‹Eena Ɛkalu yasɛngwa ne bando. Alakini mee ndamesunjue ne mo masu masato ndaaboke ikinɛ etaasi iinasɛngwa ne bando.›»

59 Ɔbɛɛ bɔbɔ ndebabɛchaya ne loleme lɔmɔɔsa. 60 Kɔmɔngɔ Mokoo we Mapatili na kwimana mwingya mwe bando na kobocha Yɛsu, mama makomo masɛ matukwinyekechea abɔ ndɔtɔɔcha naa ne kyɛndɔ? 61 Alakini Yɛsu na kwibongamea byakɛ nyaa, ndaɔcha keemo. Kabee olya Mokoo na komobocha: «Awɛ ne Kilisito, Mwaana wa Kakua waanga bae koseka?» 62 Yɛsu na kɔɔcha itɛ: «Mee na awɛ, motamɔɛ mee Mwaana we Mondo kuchikaa ko saa ndome ya Kakua we Bɔkɛtɛ. Kabee motambɔɛ kotoka kwiyoo mwikongo.»

63 Mokoo we Mapatili aungwa awɛ bɔbɔ na kwiatea ngubɔ chabwaaya awɛ ne kɔɔcha: «Ne eke kabee bitaenge bae kuungwa ko mondo ona? 64 Chɔ muswiyungwea baanu bɛɛnɛ bɔsɔbɛngɛa awɛ Kakua! mɔtɔɔcha booni?» Bando Basɛ na kɔɔcha itɛ: «Osowaena kokwa.»

65 Bamɔchi asambea baa bando na kumutuela Yɛsu sɔki, abɔ na kumuchibea ku miisɔ, kusia na komokomoa malukumani ne komobocha: «Saola ne naani otokokomoa!» Basangi naabɔ na kubunda Yɛsu ne kobangoa kɔmɔta bikɔni.

Pɛtɛlɔ osomotena Yɛsu

(Mat 26:69-75; Luk 22:56-62; Yɔa 18:15-18,25-27)

66 Abɛchaya Pɛtɛlɔ mu kuchikaa mbanga yee kose kwe kyambaa, ɔmɔ mokambi wemwamokachi we Mokoo we Mapatili na koolea alya. 67 Na kɔmɔa Pɛtɛlɔ oe mɔ kɔɔndaa toya. Olya mwamokachi na komoyongobechea miisɔ ne komosaolea itɛ: «Na awɛ bwakaɛ, ɔbɛɛ na Yɛsu we Nasalɛti!» 68 Alakini Pɛtɛlɔ na kotona ne kɔɔcha: «Me sicheba mamɔ makomo matoenga awɛ kɔɔcha.» Kusia Pɛtɛlɔ na koya anjɛ a mukinda we kyambaa; akaɛ alya moome wɛ ngɔkɔ na kobeengana.

69 Oolya mwamokachi amɔa awɛ Pɛtɛlɔ osoemaa ku mukinda we kea kyambaa na kɔɔcha: Oona ne ɔmɔ ko baa bando! 70 Alakini Pɛtɛlɔ na komotona kabee. Kɔmɔngɔ, baa baba alya na kɔɔtɔkɛa kosaolea Pɛtɛlɔ kabee: «Kiinɛkinɛ, awɛ oe ɔmɔ waabɔ, Kɔmɔa oe mondo we Kalilaya!» 71 Kɔ bɔbɔ Pɛtɛlɔ na kobangoa kotona na kɔɔcha: «Ingɛ nasɔɔcha manu, Kakua ongimoe! Kiinɛkinɛ, olya mondo ɔtɔɔcha banu, mee ngɔmɔa basɛ simocheba!»

72 Akaɛ alya, moome wɛ ngɔkɔ na kobeengana kabee. Pɛtɛlɔ na koeyoka chuki lya Yɛsu lyaɔcha awɛ: «Kombaa kwe ngɔkɔ kobeengana ngongobwa mabee, ɔtabɛ osondona ngongobwa chisato.» Pɛtɛlɔ na kobangoa kolela.