Mar 16 | ZmbSC | STEP | Aeta lusu lwe sabatɔ, Malia we Makitalɛna, na Malia ina Yakɔbɔ, na Salɔmɛ, na koola malasi ko koya kwalise mobee wa Yɛsu.

Mark 16

Yɛsu usuubuka ko bakwo

(Mat 28:1-8; Luk 24:1-12; Yɔa 20:1-10)

1 Aeta lusu lwe sabatɔ, Malia we Makitalɛna, na Malia ina Yakɔbɔ, na Salɔmɛ, na koola malasi ko koya kwalise mobee wa Yɛsu. 2 Lusu lwe yinga mɛkyɛɔ, aba chooba mo koolelea, baa babakachi na kɔkyɛla ko manda. 3 Babɛchaya baya baibocha: «Kea kɛwɛ kee ku mukinda we manda, naani otatungumuela akyo?» 4 Baɔcha bɔbɔ kɔmɔa lea iwɛ lyabɛchaya lekataa. Alakini aendoa abɔ miisɔ, akaɛ alya na kɔmɔa liusia kutunguuka.

5 Baa babakachi aingea abɔ mo manda ^{▼▼Manda che bamɔ Bayula ndechabɛchaya mo matɛkɛ cha chafɔiwaya ne mo mawɛ, kwe naa ne mondo we mwɛchɔ ne usuingea mwakaɛ mɔ kɔɛnda.}, na kosanga mwaana we mwamoome usuchikana saa ndome wawaa kanjo ya kɛnya «tɔɔ!» Amɔmɔa abɔ na kukuumuka nɛ bɔɔba. 6 Olya mwaana we mwamoome na kobasaolea: «Mootenaya! Natocheba itɛ moe mo koenga Yɛsu we Nasalɛti, olya wachia abɔ ko mote we maakanu. Ndaekee ana, usuubuka. Mwilɔlɛ banu bɛɛnɛ a iboa lyamobekee abɔ. 7 Kɔ bɔbɔ moya kwasaole Pɛtɛlɔ ne Baeyechwa bakinɛ itɛ osobaiyambeela Kalilaya. Koa ne kotamɔmɔɛ banu boa bobasaolee awɛ.»

8 Akaɛ alya baa babakachi na koola ko manda mo kochoka, babɛchaya mo kochanja ne kokanakana byabua. Mɔ bɔɔba bwabɔ bwabua, ndebaɔcha keemo ko mondo naa ne ɔmɔɔsa.

Yɛsu osoolea Malia we Makitalɛna

(Mat 28:9-10; Luk 24:1-12; Yɔa 20:11-18)

[ 9 ^{▼▼Bɔlɔlɛɔ bwe 9-20 buusi mu tuchimba twabua twe kaɛ.} Aolea lusu lwe Yinga mambombe kusia Yɛsu kuubuka, na komoolea Malia we Makitalɛna olya walikita awɛ masombo mosambo. 10 Malia na koya kwaoleche lea ilɔngɔ ko baeyechwa ba Yɛsu. Baa babɛchaya mo komolelea Yɛsu ne lobaba lwabua. 11 Ne aungwa abɔ Malia kobasaolea itɛ Yɛsu oe mwɛchɔ, ne ɔsɔmɔa, ndebaimenya.

Yɛsu osoolea baeyechwa bakɛ babee

(Luk 24:13-35)

12 Kɔmɔngɔ kwa boa, Baeyechwa babee ba Yɛsu babɛchaya mo koya ko kalya. Yɛsu na kobaolea mu lukinɛ luungi. 13 Abɔ na kɔɔtɔka kwasaole bakinɛ baeyechwa lea ilɔngɔ. Alakini na abɔ bwakaɛ ndebabaimenya.

Yɛsu osoolea ndomwa chaakɛ ikumi ne ɔmɔɔsa

(Mat 28:16-20; Luk 24:36-49; Yɔa 20:19-23; Ndo 1:6-8)

14 Kusia Yɛsu na koolea ndomwa chaakɛ ikumi ne ɔmɔɔsa abɛchaya abɔ mo kolya. Na kobaemoka byabua kɔmɔa baena Iekekeo ne metema, kabee ko kokoba kwe metema yaabɔ. Wabaemoka kɔmɔa ndebaimenya makomo me baa bamɔmɔa kɔmɔngɔ kwe kuubuka kwakɛ. 15 Kubɔngɛɛ, Yɛsu na kobasaolea: «Moyake mɔ mɔsɛngɛ ɔɔsɛ, kwasaole Ilɔngɔ Lyaachi ko bando basɛ.» 16 Ɔɔsɛ otaimenye ne kwinwa mbuu otaoloke. Alakini, olya otaasi ndakaimenye, olya otakonje manɛnɛ.

17 Lɔla bisinga bitasindekeche baa bataimenye: «ku chiina lyanɛ, batalikite masombo, ne bataɔchɛ ndeme chikinɛ. 18 Batabunde njɔka, ɔbɛɛ basɔsɔa sumu, bikabakete keemo. Batabɛ mo koolosa balwachi ko kɔbatɛchɛa manja.»

Yɛsu osokobechwa kwiyoo

(Luk 24:50-53; Ndo 1:9-11)

19 Asia Yɛsu kobasaolea baeyechwa bakɛ maɔ makomo, na koendiwa kwiyoo, na koya kwachikane ko saa ndome ya Kakua. 20 Baeyechwa na koya kwasaole Ilɔngɔ Lyaachi kɔsɛ. Mwaame Yɛsu wakambaya nabɔ amɔɔsa ne kɔbaɛbɛcha bɔkɛtɛ bwe koketa melendo, kokoangwecha itɛ makomo maɛbɔ mo kosaolea bando ne maeko.]