Mark 8

Yɛsu ɔsɔɛbɛkya bando tununu tonachi

(Mat 15:32-39)

1Kɔ maɔ masu, bando babua na kukumbakana kabee. Abɛɛ abɔ bakee ne kaebwa, Yɛsu na kwitana baeyechwa bakɛ na kobasaolea: 2«Natokwea baa bando basɛ lokwa kɔmɔa masokokya masu masato nae nabɔ amɔsa, ne baekee kabee naa ne kaewa kachiinini. 3Ne kɔ bɔbɔ sikaɔsɔnɛ kolaana nabɔ ingɛ baanalya, kɔmɔa babalɛka ne njaa mo njea, kɔmɔa babua asambea abɔ batokee njɔɔ.»

4Baeyechwa bakɛ na komosaolea: «Mwaame, ana ae bae nde mwilongo, koni kotakonjee bae biewa bye kɔɛbya baba bando basɛ?» 5Yɛsu na kobabocha: «Moe ne mikati engaa?» Ne abɔ itɛ: «Mosambo.»

6Yɛsu na kosaolea bando itɛ bachikane ase. Awɛ na koenda elya mikati mosambo ne komebukabuka ne koseka Kakua. Kusia na kɔɛcha baeyechwa bakɛ, kɔmɔa baabanyee bando. Baeyechwa nabɔ, na komeabanya ko bando basɛ. 7Babɛa nɛ tɔmwɛa tuchiinini. Yɛsu na kosekoa Kakua kombanga yee toa tɔmwea, ne kobasaolea baeyechwa bakɛ batoabanye. 8Baa bando basɛ na kolya nɛ kɔɛbwa. kusia ne baeyechwa na kɔtɔa mabumbu masaea, na kochekya bimbaka mosambo. 9Bando balya bia biewa, keemo ke tununu tonachi, kusia Yɛsu na kobalaa. 10Akaɛ alya na kokobea mo boato ne baeyechwa bakɛ na koya ko kalya ke Talimanuta.

Bafalisayɔ basoenga kisinga

(Mat 16:1-4)

11Kɔmɔngɔ kwe bɔbɔ, Bafalisayɔ na koolelea Yɛsu na kobangoa kota naakɛ meango. Na kɔmɔɛlɛka mɔ kɔmɔɛngɛa obaketee kisinga kɛmɔɔsa ko koangwecha itɛ bɔkɛtɛ bwakɛ bototoka ne kwa Kakua ikɛɛsa. 12Yɛsu na kokanakana byabua ne kɔɔcha: «Ko eke banu bando be mano masu motokonda kɔmɔa kisinga? Kiinɛkinɛ naomosaolea kuusi kisinga naa ne kɛmɔ ketaangwechwe baanu!»

13Kusia Yɛsu na kosambokana na baa bando, na konena mo bwaato, na koya ikinɛ nganda yee kichibachiba.

Mesako ya bea yee Bafalisayɔ ne ya Ɛlɔlɛ

(Mat 16:5-12)

14Baeyechwa ba Yɛsu baba basoebeela koenda mikati, alakini baba ne mukati ɔmɔɔsa ikɛɛsa mo bwaato. 15Yɛsu na kobasaolea: «Mɔbɛchayɛ mukwilɔla ne mesako ya bea yee Bafalisayɔ ne ya Ɛlɔlɛ.»

16Baa baeyechwa na kobangoa kosaoleana: «Oe mɔ kɔɔcha bobo kɔ kɔmɔa tuusi ne mikati.»

17Yɛsu na kocheba makomo mabɛchaya abɔ mɔ kɔɔcha, kɔ bɔbɔ awɛ na kobabocha: «Ko eke motosaoleana itɛ muusi ne mikati? Muunaungwa ɔbɛɛ kocheba? Na boono metema yiinu ekee kabee nɛ kɔnyɛma? 18Moe ne miisɔ alakini mɔtɔmɔa? Ne moe ne matwe alakini mutuungwa? Motoeyoka 19itɛ abɛchaye mee mu kubuka elya mikati etanu yaɛbɛcha bando tununu totanu? Ko bobo, atɔlɛɛ banu mabumbu masalee, Mochekye bimbaka binga?» Abɔ itɛ: «Ikumi na bibee.» 20Awɛ na kobabocha kabee: «Na elya mikati mosambo nayo, ndeyaɛbya bando tununu tonachi! Ne atɔlɛɛ banu mabumbu masaea, Mochekye bimbaka binga? Abɔ itɛ: «Mosambo.» 21Kɔ bɔbɔ Yɛsu na kobabocha: «Na boono muunaungwa?»

Yɛsu osoolola mbufu mo kalya ke Bɛtɛsaila

22Kusia, Yɛsu ne baeyechwa baakɛ na koolea mo kalya ke Bɛtɛsaila. Bando na komobea ne mbufu ɛmɔ, na kwiyaya ɔmɔkɔbɔchɛ. 23Yɛsu na kubunda elya mbufu kɔ kɔ kɔbɔkɔ na koya naakɛ anjɛ yee kalya. Na kumulisa masɔki ko miisɔ na kobeka manja mo nganda mwaakɛ. Kɔmɔngɔ na komobocha: «Oe mɔ kɔmɔa keemo?» 24Awɛ mo koelalaa kwiyoo, na kɔɔcha: «Nae mɔ kɔmɔa bando boe mete, alakini bae mɔ kɔɛnda.» 25Yɛsu na kɔmɔkɔbɔcha kabee ku miisɔ. Ko lolo miisɔ maakɛ na kooloka. Awɛ na kobangoa kɔmɔa biemo biisɛ bwaachi. 26Kɔmɔngɔ Yɛsu na komosaolea: «Ko bobo ɔtɔka kwao, alakini ndɛkɔɔtɔka kabee ko kalya.»

Pɛtɛlɔ osochebekya itɛ Yɛsu ne Kilisito

(Mat 16:13-20; Luk 9:18-21)

27Kusia, Yɛsu ne baeyechwa bakɛ na kotoka alya. Abɔ na koya mo tokya toe mɔsɛɛsɛ mwe kalya ke Kaisalia Filipɔ. Abɛchaya abɔ bakee mo lwɛndɔ, Yɛsu na kobabocha: «Ee banuse! Bando bae mɔ kɔɔcha itɛ mee ne naani?» 28Abɔ itɛ: «Bamɔchi bae mɔ kɔɔcha itɛ awɛ nɛ Yɔana Mobatisi. Bakinɛ itɛ awɛ nɛ Ɛlia. Ne bakinɛ itɛ oe nɛ ɔmɔ we ndɛnda cha Kakua.»

29Kɔ bɔbɔ Yɛsu na kobabocha: «Ko leno, na banu moe mɔ kɔɔcha itɛ mee ne naani?» Pɛtɛlɔ na komosaolea: «Awɛ ne Kilisito!» 30Yɛsu na kobalaa itɛ baɛlɛkaya kosaolea naa nawɛ lea ikomo.

Yɛsu osochebekya ilɔngɔ lye kokwa ne kuubuka kwakɛ

(Mat 16:21-28; Luk 9:22-27)

31Kusia Yɛsu na kobangoa kweyecha baeyechwa bakɛ itɛ: «Mee Mwaana we Mondo, biengye namɔɛ manɛnɛ mo njea chabua. Basangi be Bayula, ne bakoo be Basia amɔsa ne baeyechi be Salia batangɔnɛ, kɔmɔngɔ nachiiwe, alakini mo masu masato naubuke.» 32Maa makomo, Yɛsu wasaolea baeyechwa bakɛ paa paa. Kɔ bɔbɔ, Pɛtɛlɔ na komoota mɔsɛɛsɛ na kobangoa komokandokea. 33Alakini Yɛsu na kɔkɛbɔka na kɔlɔla baeyechwa bakɛ, na kobangoa kokandokea Pɛtɛlɔ: «Awɛ Isombo! Toka ku miisɔ maanɛ! Kɔmɔa, loa lokani lwao lototoka kwa Kakua, alakini loe ne lwɛ kɛ lɔkɔba.»

34Kusia, Yɛsu na kwitana ndongo yee bando amɔsa ne baeyechwa bakɛ, na kobasaolea: «Ingɛ mondo otokonda kombyea, ɔlɛkɛɛ kwikuula awɛ mwɛɛnɛ, alakini ochae mote waakɛ we maakanu ne kombyea. 35Kɔmɔa, otokonda koolola mwɛchɔ waakɛ otamuchimbeche. Na olya otamachimbeche ko mbanga yaanɛ, ne ko mbanga yee Ilɔngɔ Lyaachi, awɛ otamoolole. 36Olya utuchimbecha mwɛchɔ waakɛ, kɔ bɔbɔ otakonje eke ɔbɛɛ oe ne byɛndɔ biisɛ byɛ mɔsɛngɛ? 37Ne mo koenga koolola olya mwɛchɔ waakɛ, otaoche keke?

38«Mochebe itɛ bando ba mano masu, baatɔbɛchaya ne iekekeo, kabee batwikuula na Kakua. Kɔ bɔbɔ, ingɛ mondo otaungwe masɔni ko mbanga yaanɛ, ne kuungwa masɔni ko mbanga yee makomo maanɛ kombaa kwabɔ, na mee Mwaana we Mondo naungwe masɔni ko mbanga yaakɛ kabee ataɔtɔkɛ mee ne meombo yaanɛ ya ama mo boombe bwa Isanɛ.»