Mar 15:21-32 | ZmbSC | STEP | Abɛchaya abɔ mo njea na kobanga mondo ɔmɔɔsa waitanewaya Simɔni, mo kotokea ko masio. Oona Simɔni, wabɛchaya we kalya ke Kulɛnɛ, kabee wabɛchaya isa Alɛkisandɛlɛ na Lufu. Bakɔlɔbɔyɔ na komwendekya mote we maakanu kɔ bɔkɛtɛ.

Mark 15:21-32

Yɛsu osobekwa ko mote we maakanu

(Mat 27:32-44; Luk 23:26-43; Yɔa 19:17-27)

21 Abɛchaya abɔ mo njea na kobanga mondo ɔmɔɔsa waitanewaya Simɔni, mo kotokea ko masio. Oona Simɔni, wabɛchaya we kalya ke Kulɛnɛ, kabee wabɛchaya isa Alɛkisandɛlɛ na Lufu. Bakɔlɔbɔyɔ na komwendekya mote we maakanu kɔ bɔkɛtɛ. 22 Baa Bakɔlɔbɔyɔ na kochaa Yɛsu a iboa lyaitaniwaya Kɔlɔkɔta, nɛ kɔɔcha itɛ «a iboa lye Kabacha ke motwe.» 23 Abɔ na kɔmɔɛcha Lifai lyasambiwa ne Manɛmanɛ, alakini awɛ ndalɛsɔa. 24 Kɔmɔngɔ, abɔ na kumuchia ko mote we maakanu. Ngubɔ chaakɛ, na kuchiabanya koetea kasɔbɔsɔbɔ, kɔmɔa bachebe ɔɔsɛ waabɔ otakonje eeni. 25 Atɛcha abɔ Yɛsu ko mote we maakanu, yaba ne saa kɛtɛma yee mambombe. 26 Byakunya tuchimba mo nganda mwe motwe wa Yɛsu, tyachebekya ko eke kwa muchiela abɔ. Bakunya: «Nombe yee Bayula.»

27 Baa Bakɔlɔbɔyɔ batɛcha bwakaɛ ngiba chibee ko Mete yee maakanu mɔsɛɛsɛ mwa Yɛsu, ɔmɔ saa ndome yaakɛ, ukinɛ saangachi yaakɛ. [ 28 Byakunyiwa bya ama nɛ kɔmɔɛka, bitɔɔcha bobo: «Wabaekiwa kɔmɔɔsa ne bando babea.» ^{▼▼Yɔɔla Isa 53:12.}]

29 Bando babɛchaya mo koeta alya, babɛchaya mɔ kɔmɔbɛngɛa na kɔmɔbɛngɛa mo kopokomya metwe yaabɔ na komosaolea: «Ee oona inde waɔchaya itɛ otasunjue ndabo ya Kakua, ne mo masu masato otamɛyɛngɛ kabee! 30 Ko leno uiyolole awɛ mwɛɛnɛ, iikya ko olya mote we maakanu!»

31 Bwakaɛ bɔbɔ, bakoo be mapatili na baeyechi be Salia na kɔkyɛa Yɛsu na kobangoa kɔɔcha asambea abɔ: «Mɔlɔlɛ ɔbɛɛ mo koolola bakinɛ, alakini awɛ mwɛɛnɛ osoomaa kwiolosa. 32 Kɔ bɔbɔ ingɛ awɛ ne Kilisito, Nombe yee Baisilaɛli, uiikye ano ano ko olya mote we maakanu, na bae twimɔɛnɛ ne tumwimenye!». Ɔbɛɛ chia ngiba chachiiwa naakɛ amɔsa ko mete yee maakanu, chabɛchaya nacho mɔ kɔmɔbɛngɛa.