Phile | ZmbSC | STEP |

Philemon

Kwinokea

1 Mee Paɔlɔ, oe mo kekako ko mbanga ya Kilisito Yɛsu, natukunya ona mokanda kɔmɔɔsa na Timɔtɛɔ mobotwa niito. Tutukukunyea awɛ Filɛmɔ, ngondwa yiito ne sambe niito we meemo, 2 ne kanisa katuumbana mo ndabo yao, ne motamba wiito Apia na Alikipo, utuchiana niito bita kɔmɔɔsa. 3 Tɔtɔbaɛngɛɛa lokwa ne nyaa kotoka kwa Isito Kakua ne Mwaame wiito Yɛsu Kilisito.

Kokonda ne nyaa ya Filɛmɔ

4 Natoseka Kakua waanɛ masu masɛ ingɛ nasokoeyoka awɛ Filɛmɔ mu kwiyaya kwanɛ. 5 Kɔmɔa natuungwa botokoseka abɔ ku kwimenya Mwaame Yɛsu, ne bwaanga awɛ kokonda bando basɛ ba Kakua. 6 Nae mɔ kɔɛngɛa Kakua itɛ lea isamba lee niito koetea iekekeo lito, lekokwase kocheba maachi masɛ maanga niito mo koongwa kwito amɔɔsa na Kilisito. 7 Mobotwa naanɛ, koa kokonda kwao kuusukua bando ba Kakua kokonja bɔkɛtɛ. Nɛ kɔ bɔbɔ naswimɛma byabua ne koyobea.

Paɔlɔ osoachea Ɔnɛsimɔ

8 Ko bobo, koetea isamba lee niito na Kilisito, nae nɛ bɔkɛtɛ bwe kokosaolea letowaena awɛ koketa. 9 Naa nɛ bɔbɔ, kwiyaya ne kotokonda mee kwiyaya koetea kokondana koe niito. Mee Paɔlɔ natae mununu, ne kabee natae mo kekako kombanga ya Yɛsu Kilisito. 10 Natwiyaya ko mbanga yee mwana waanɛ Ɔnɛsimɔ, obotee mee mu iekekeo abɛɛ mee mo kekako. 11 Kaɛ kaɛ awɛ ndakoketea keemo, mo leno otakoketee awɛ na mee bwakaɛ. ^{▼▼Mu Kikiliki Ɔnɛsimɔ nɛ kɔɔcha itɛ otoketa keemo.}

12 Bono, nasɔkɔɔtɔsɛa awɛ; oe ne boe ibae lyanɛ mee mwɛɛnɛ. 13 Ningakonda Ɔnɛsimɔ otachikae naanɛ amɔsa ko kongwasa a iboa lyao akee mee mo kekako ko mbanga yee kosaola Ilɔngɔ Lyaachi. 14 Sakonda koketa keemo kɛsɛ ketaasi awɛ kokonda. Ɔbɛɛ sakonda kukusukua kongetea byaachi, ningakonda biketeke ko kokonda kwao awɛ mwɛɛnɛ.

15 Kende Ɔnɛsimɔ otangee kosambokana nao ne ko masu makɛɛkɛ, kɔmɔa uchikae naakɛ masu masɛ. 16 Ko leno, awɛ ndaekee kabee moocha ikɛɛsa, otae mondo we kobaelwa koeta moocha; kɔmɔa otae ngondwa. Mee natomokonda byatɔba; naa ne awɛ otamokonde byatɔba koeta. otamokonde bwe mondo, kabee bwe mobotwa niito monda mwa Mwaame.

17 Ko bobo, ingɛ okee mo kombaela bwe sambe nao, mɔsɛkɛɛla bunganjɛkɛɛla awɛ mee mwɛɛnɛ. 18 Ne kende okoketee bwabea, ɔbɛɛ oe ne ilɛni lyao le keemo kɛsɛ, nɛngɛa mee. 19 Mee Paɔlɔ, mee ne usukunya mama makomo nɛ kɔ kɔbɔkɔ kwanɛ: Ndakuute. (Naanga nɛ bɔbɔ natokoeyoa itɛ awɛ oe ne ilɛni kwanɛ, na lea ilɛni nɛ mwɛchɔ wao). 20 Mobotwa naanɛ, natwiyaya kwao, ngwasa ko eena njea ko mbanga ya Mwaame, kɔ kɔngɔbɔa motema boe mobotwa naanɛ monda mwa Kilisito 21 Atukunya mee, natobaela itɛ otanungwe ne koketa koeta byakosaolea mee. 22 kabee, natwiyaya, njangyea bwakaɛ iboa letakyɛsɛaye mee, kɔmɔa natobaela itɛ koetea kwiyaya kwinu Kakua otangɔtɔsɛ kabee kwinu.

Kolaana

23 Epafula wakakiwa naanɛ ko mbanga ya Yɛsu Kilisito utukwinokea. 24 Bwakaɛ bwakaɛ Malikɔ, na Alisitalikɔ, na Lɛma na Luka, banjiniito ne meemo nabɔ, batukwinokea. 25 Lokwa lwa Mwaame Yɛsu Kilisito loongwe niinu.