Philippians 1

Kɔɛcha mɔyɔ

1Paɔlɔ na Timɔtɛɔ, bacha ba Yɛsu Kilisito, ko basɛ bae ba ama monda mwa Yɛsu Kilisito, batochikaa mo mosomba we Filipɔ, ko bakoo ne ko basangi: 2Lokwa ne nyaa kotoka kwa Tati Kakua ne kwa Mwaame wiito Yɛsu Kilisito biongwe niinu.

Kwiyaya kwa Paulɔ

3Naswimɛma na Kakua waanɛ ko kyaanya kɛsɛ ketobaeyoka mee. 4Mɔ kɛsɛ kyaanya, nae mo kobaindoa banu basɛ nɛ kɛmɛmɔ mu kwiyaya kwanɛ 5Kɔ kɔmɔa isamba linu ne Ikomo lya Kakua kobangoa lusu lwe kombaa na leno 6Naswimenya itɛ, olya obangoee monda mwiinu moemo mwaachi, otamusieche ku lusu lwa Yɛsu Kilisito. 7Bie bwaachi ko mee kobaeyoka banu basɛ, kɔ kɔmɔa moe ne iboa mo motema waanɛ, banu bae naanɛ kɔmɔɔsa mo kekako ne mu kwiɔchɛa ne mɔ kɔɛcha Ikomo mwɛchɔ, moe banu basɛ ne kɛɛchwa ko lokwa lokonjee mee.

Maɔngɔ ma Paɔlɔ ne me meemo yaakɛ

8Kakua otocheba bwaachi itɛ, natobakonda banu basɛ byɛ sɛsɛ ne kokonda kotokonda Yɛsu Kilisito. 9Kɔ bɔbɔ, nae mo kwiyaya, kokonda kwinu kokoe lusu ku lusu mo bichebe ne mu kuungwa, 10kɔ kɔchɔnjɔa byɛ sɛsɛ, kɔ bɔbɔ mɔbɛ bando ba Kakua ne bataasi ne byabea ku lusu lwa Yɛsu Kilisito, 11bachaa ne bimuka bye kiinɛkinɛ bitotoka kwa Yɛsu Kilisito, ko boombe ne kosekiwa kwa Kakua. 12Natoekya mochebe ee babotwa naanɛ itɛ, bingolelee mee bibɛɛ ne ku kusukua Ikomo lya Kakua leye kombaa, 13Bitochebekana ne ndabo ya mwaame ne bando basɛ itɛ, kekako kyanɛ kee ne ku chiina lya Yɛsu Kilisito. 14Ne babua babotwa niito monda mwa Mwaame, batɛchiwɛɛ motema koetea kekako kyanɛ, batɛchɛɛ kɔɛlɛka kosaola Ikomo lya Kakua kotasi bɔɔba. 15Bamɔchi kabee, batosaola Kilisito ko kawa ne ko meango, bakinɛ batosaola Kilisito ne motema mwaachi. 16Baba batokamba mo kokonda, batocheba itɛ, nae ano ne mɔ kɔɔchɛa Ilɔngɔ Lyaachi. 17Bakinɛ batosaola Kilisito ko meango, ndɛɛkɔ ko motema mwaachi, mo kokonda kosekecha tɔngɔnjɔ ko kekako kyanɛ. 18Ne eke? Ɔbɛɛ ko meke njea, ko manu ɔbɛɛ ku kiinɛkinɛ, Kilisito oosaoliwa, kɔ bɔbɔ, naɔmɛma. Kabee, ndamɛmɛ. 19Natocheba itɛ, bia biisɛ bitabɔngɛɛ ne kɔ mwɛchɔ waanɛ koetea kwiyaya kwinu ne kokwasa kwe Motema wa Yɛsu Kilisito, 20Kɔmɔa botoendecha mee ne saki ne iekekeo lyanɛ, sikaungwɛ masɔni, alakini ko leno aɔ kɔ lɔsɛ, ne kiinɛkinɛ ko motema, Kilisito otasekiwe mɔ lɔkɔba lwaanɛ, koetea lokwo aɔ mwɛchɔ waanɛ. 21Kwanɛ, mwɛchɔ ne Kilisito, kokwa ne ikonja. 22Kɔ bɔbɔ, ingɛ mwɛchɔ wɛ lɔkɔba unambɛcha kabee kyaanya ke koketa meemo myaachi, nae bokangwe kɔsɔbɔa. 23Natae ne a mambakambaka: ko mbanga ɛmɔ, nae ne saki yee koya ne kuchikaa na Kilisito; bibyɔ ne binaba byaachi. 24Alakini, ko mbanga ikinɛ, bie bwaachi koe baanu, naongwe mwɛchɔ. 25Nae ne kiinɛkinɛ itɛ: natocheba nabɛɛ niinu, ne kuchikaa niinu ko baanu koya kombaa ne ko kɛmɛmɔ ke kuimenya kwinu, 26ko boa, kɔɔtɔka ne kɔmɔɛka kwanɛ kombaa kwinu koongwe keemo keyakeya kye kwiseka kwinu monda mwa Yɛsu Kilisito.

Keboka kye kuimenya

27Mɔɛndɛ bwaachi boengye ne Ikomo lya Kilisito, ko boa namɔɛ, ingɛ nasoolea kwinu, aɔ naungwe, ingɛ siisi kɔmɔɔsa niinu itɛ, mosoemana ko motema ɔmɔɔsa, mu kuchiana ne motema ɔmɔɔsa ku kuimenya kwe Ikomo Lyaachi. 28Nde kwilɛkɛa kokangechiwa ne baangani niinu, bia ne koangoecha itɛ bauchimbea, koe baanu bitoangoecha kooloka, na bia bitotoka ne kwa Kakua 29bie ne ko lokwa lɔɛchiwɛɛ banu, biisi ikɛɛsa ku kuimenya Kilisito, alakini bie kabee ko komokonjea manɛnɛ. 30Alya, moe mu kuchiana kyakaɛ keboka kɛmbɔichi baanu mo kosekemeka ne kekee mee mo kosekemeka.