Phili 3 | ZmbSC | STEP | Ku bikinɛ, babotwa naanɛ, mwimɛmɛ monda mwa Mwaame. Biisi bingobee kɔɔtɔkɛa bibakunyee mee; kwinu, bitabaɛchɛ motema.

Philippians 3

Kilisito ne we kobaelwa

1 Ku bikinɛ, babotwa naanɛ, mwimɛmɛ monda mwa Mwaame. Biisi bingobee kɔɔtɔkɛa bibakunyee mee; kwinu, bitabaɛchɛ motema. 2 Mwailɔlɛa ne imbwa, mwailɔlɛa ne ngambi cha bea, mwailɔlɛa ne sakubɛmbɛ ya bea. 3 Bae na baa bae ne sakubɛmbɛ yee Motema wa Kakua, tutwiyaya ne mamɛngɛ monda mwa Kilisito Yɛsu, ndɛɛkɔ, totobaela bye kɛ lɔkɔba, 4 Mee nawaenee kobaela bye kɛ lɔkɔba. Ngoba ne kobaela bye kɛ lɔkɔba, kuusi mondo ungaongwa kombaa kwanɛ. 5 Ingɛ ne ko sakubɛmbɛ, nabɛmbiwa lusu lwe kinaanɛ, wɛ kɛɔngɔ ke Isilaɛli, mu mukinda wa Bɛnjamɛ, Moebulania we Baɛbulania, ko Salia Mufalisayɔ, 6 ko kosakasaka namɔnyɛɛ Kanisa manɛnɛ, ko koketa bitokonda Salia, kuusi ibɛchi. 7 Alakini biisɛ bibɛɛ ikonja kwanɛ, mee na kubichimbecha ko kokonja Kilisito. 8 Nasɔmɔa biisɛ bokata ko bwaachi bwe kocheba Kilisito Yɛsu Mwaame waanɛ; koetea awɛ nachimbechee biisɛ, na kubimɔa bwe tubi ko kokonja Kilisito. 9 Namɔɛkɛ monda mwaakɛ, siwaenaya koongwa ne bɔnyɛmu botokonjekana koetea Salia, alakini bototokea ku iekekeo lyanɛ monda mwa Kilisito, bɔnyɛmu botokee kwa Kakua koetea iekekeo lyanɛ. 10 Namochebe awɛ ne bɔkɛtɛ bwe kuubuka kwakɛ, kwisambya ko manɛnɛ maakɛ, naeyane ne kokwa kwakɛ. 11 Kɔmɔa naolee naa ne ko meke njea kukuubuka kwe bakwo. 12 Ndɛɛkɔ itɛ nasoolea kɔ kɔbɔnga, ɔbɛɛ koongwa we kiinɛkinɛ, nae mo kosakoa meende kɔ kɔmɔa itɛ nakwate bye bondobondo lea ikomo lengetee mee kokwateka na Kilisito Yɛsu.

Kulikitea kɔ lɛbɔngɛ

13 Ee babotwa naanɛ, sitwibaeka itɛ nasokwata bye bondo bondo, nae mo koketa keemo kɛmɔɔsa, koebela bisoeta ne kwifɛkɛɛnya ko byee kombaa. 14 Nae mokoenda meende naolee kɔ lɛbɔngɛ, kokonja biemo bitokonjekana ko mbea mekoo ya Kakua monda mwa Yɛsu. 15 Bae be kiinɛkinɛ, toongwe na elya saki; kende ku bikinɛ muusi niito kɔmɔɔsa, Kakua otamoangweche bikinɛ. 16 Ko bobo, ana asoolea bae, tɔɛndɛ moende ɔmɔɔsa. 17 Babotwa naanɛ, mombeye nɛ kɔlɔla baa batɔɛnda koeyana na boa bɔɛndayɛ bae kombaa kwinu. 18 Babua bɔtɔmɔa baanu, batɔɛnda mo boangani ne mote we maakanu wa Kilisito, namosaoleaye, kabee nasosaola mo kolela 19 Batabɔngɛɛ nɛ kɔɔnɛka, yaabɔ ngisi ne ikundu lyabɔ, boombe bwabɔ ne mu bia bitɔbaɛcha masɔni, batɔɛnja ngani chabɔ ne mu biemo bye mɔsɛngɛ. 20 Kombanga yiito, bae nɛ bɛɛnɛ be iyoo, ko boa toe mo koendecha Moolochi wiito, Mwaame Yɛsu Kilisito, 21 awɛ otatuule mobee wiito we masɔni koongwa mobee we boombe, kɔ bɔkɛtɛ boa botoketa awɛ biisɛ biemo koongwa mose mwaakɛ.