Luk 9:28-36 | ZmbSC | STEP | Kɔmɔngɔ kwe masu moanda aɔcha Yɛsu mao makomo, awɛ na koenda Pɛtɛlɔ, na Yɔana na Yakɔbɔ, na konena nabɔ ko ketoo kwaiyaye kwa Kakua.

Luke 9:28-36

Yɛsu osoalolwa lulungi

(Mat 17:1-8; Mali 9:2-8)

28 Kɔmɔngɔ kwe masu moanda aɔcha Yɛsu mao makomo, awɛ na koenda Pɛtɛlɔ, na Yɔana na Yakɔbɔ, na konena nabɔ ko ketoo kwaiyaye kwa Kakua. 29 Abɛɛ awɛ mukwiyaya, lulungi lwakɛ na kutuuka ne ngubɔ chaakɛ na kɔkɛnya byabua. 30 – 31 Akaɛ alya mo koa kɔkɛnya na kɔmɔɛka baa baome babee, Musa na Ɛlia. Baa baabaome baba mɔ kɔɔcha na Yɛsu booni botasieleche awɛ meemo yaakɛ na kokwea mo Yɛlusalɛma. 32 Kɔ kɛɔ kyanya, Pɛtɛlɔ ne banjinakɛ baba baolala kalikɔnyɔ. Babyoka na kɔmɔa boa boombe bwa Yɛsu, na baa baabaome bae mo mwema mɔsɛɛsɛ mwaakɛ. 33 Alɛkɛchana baa babaome na Yɛsu, Pɛtɛlɔ na komosaolea itɛ: «Ee Mwaame, bie bwaachi tuchikane ana. Toaboke bitanda bisato: kɛmɔ kyao, ne kya Musa, ne kikinɛ kya Ɛlia.» Pɛtɛlɔ ndaacheba bya byaɔchaya awɛ.

34 Aba Pɛtɛlɔ okee mɔ kɔɔcha iyoo na kobaka na kobabwekea. Baa baeyechwa na kuungwa bɔɔba amɔa abɔ lea iyoo leobawekea. 35 Mo lea iyoo mwaungweka chuuki lyaba mɔ kɔɔcha itɛ: «Ona ne Mwaana waanɛ we mwaa moome wasɔbɔa mee, momuungweechaye!»

36 Aomoa lea chuuki, Yɛsu na kɔmɔɛka ikɛɛsa. Baeyechwa na kuchikaa nyaa ko makomo masɛ mamɔ abɔ. Kabee kɔ maɔ masu, ndekwaba mondo naa nɛ ɔmɔɔsa wasaolea abɔ maɔ makomo mamɔna abɔ.