2Ch 10 | ZomZIV | STEP | Rehoboam kumpi suaksak dingin Israel-te khempeuh Shechem ah pai uh ahi manin amah zong a pai hi.

g1Ki 5:14

‏ 2 Chronicles 10

Israel in Rehoboam Lehdo

1 Rehoboam kumpi suaksak dingin Israel-te khempeuh Shechem ah pai uh ahi manin amah zong a pai hi. 2 Nebat tapa Jeroboam in hih thu a zak ciangin (Kumpi Solomon huna tai Egypt ah a om lai hi a,) Egypt panin a ciah kik hi. 3 Tua ciangin amaute in Jeroboam vaikhak uh a, amah le Israel khempeuh Rehoboam kiangah pai-in ama kiangah: 4 “Na pa in kote hakkol gik hong suan hi, ahi zongin tu-in a haksa nasepnate le hakkol gikpi hong suatna na zansak leh nang na ka sem ding uh hi,” a ci uh hi.

5 Rehoboam in, “Ni thum khit ciangin hong pai kik un,” ci-in a dawng hi. Tua ciangin mipite a paikhia uh hi.

6 Tua ciangin Kumpi Rehoboam in a pa Solomon a nuntak lai-a a nasem upate a dong hi. Amah in, “Hih mite ka dawn nadingin bang hong ci ngaihsutpih na hi uh hiam?” ci-in a dong hi.

7 Amaute in, “Hih mite tungah migi-in amaute lungkimsaka amau san theih dingin na dawn leh a tawntungin nangma nasem a suak ding uh hi,” ci-in a dawng uh hi. ^a

8 Ahi hangin Rehoboam in upate piak ngaihsutna nial a, amah tawh a khangkhawm ama nasem khangnote a dong hi. 9 Amah in amaute kiangah, “Bang hong ci ngaihsutpih na hi uh hiam? Hih mite bangci dawn kik ding i hi hiam? Amaute in, ‘Na pa in ko hong suat hakkol zangsak in,’ hong ci uh hi,” a ci hi. ^b

10 Ama khanpih khangnote in, “Nang tunga, ‘Na pa in kote hakkol gik hong suan hi, ahi hangin ka hakkol uh zangsak in,’ hong ci mipite tungah, ‘Ka pa kawng sang in ka khutmeno lianzaw hi. 11 Ka pa in hakkol gik note hong suan hi; ken ka giksakzaw lai ding hi. Ka pa in khauteep hong thuaksak hi; ke’n note ai-kam kong thuaksak ding hi,’ ci in,” a ci uh hi.

12 Tua zawh ni thum ni ciangin kumpipa in, ‘Ni thum ciangin hong pai kik un a cih bangin Jeroboam le mipite Rehoboam kiangah a pai kik uh hi. 13 Kumpipa in mipite khauh takin a dawng hi. Upate ngaihsutpihna nialin 14 khangnote ngaihsutpihna zui-a, “Ka pa in na hakkol uh a giksak hi; ke’n ka giksakzaw lai ding hi. Ka pa in khauteep hong thuaksak hi; ke’n ai-kam kong thuaksak ding hi,” a ci hi. 15 Tua bangin kumpipa in mipi thu a ngai kei hi; ahang in, hih thukawng-kihekna Pasian pan hi-a, TOPA in Shiloh-te Ahijah tawna Nebat tapa Jeroboam tunga a gensa thu a tangtunna ahi hi. ^c

16 Kumpipa in Israel-te thu a nial amaute khempeuh in a muh uh ciangin kumpipa tungah: ^d

“David ah eite in bang tanh nei a, ^e
Jesse tapa ah bang kihelna nei i hi hiam?
Israel aw, na puanbuk ciatuah ciah un!
David aw, na inn nangmah’n cing un!” ci-in a dawng uh hi.

Tua ciangin Israel-te khempeuh inn ah a ciah uh hi. 17 Ahi hangin Judah khuapite sunga a teng Israel-te ahileh Rehoboam mah in a uk lai hi.

18 Kumpi Rehoboam in aana-a nasemte a ukpa Adoniram ^{▼▼10.18 Hebrew in Hadoram, Adoniram tawh kilamdang lo} a sawlkhiat hangin Israel khempeuh in suangin a denglum uh hi. Kumpi Rehoboam a sakollengah tuang man liailiai a, Jerusalem ah a suakta hi. 19 Tua ahi ciangin tuni dong Israel in David innkuante langah a lehdo uh hi. ^g