‏ 2 Chronicles 18

Micaiah in Ahab Langah Thugenkhol

1Jehoshaphat in neih le lam hau-a a kipahtawi hi; tu-in amah mahin kitenna hanga kizopna Ahab tawh a bawl hi. 2Kum tawmvei khit ciangin Samaria a Ahab kiangah hawh dingin a paisuk hi. Ahab in amah le a tonpihte tuu le bawng tampi na gawh a, Ramoth Gilead sim dingin a na kun hi. 3Israel kumpipa Ahab in Judah kumpipa Jehoshaphat kiangah, “Ramoth Gilead nong simpih ding hiam?” ci-in a dong hi. ^a

Jehoshaphat in, “Kei le nang a kibang i hi-a ka mite le na mite a kibang ahi hi; gal kong simpih ding hi. 4Ahi hangin “TOPA thu dong masa in,” ci-in Jehoshaphat in Israel kumpipa kiangah a gen hi.

5 Tua ciangin Israel kumpipa in kamsangte - pasal zali - kaikhawm a, amaute tungah, “Ramoth Gilead sim dingin ka kuan ding uh hiam, ahikeh ka thuak lel ding uh hiam?” ci-in a dong hi.

Amaute in, “Pasian in kumpipa khut sungah hong pia ding ahi manin kuan un,” ci-in a dawng uh hi.

6 Ahi hangin Jehoshaphat in, “Hih lai-ah i dot theih dingin TOPA kamsang khat beek om lo ahi hiam?” ci-in a dong hi.

7 Israel kumpipa in Jehoshaphat kiangah, “TOPA thu i dotsak theih ding mi khat om lai hi, ahi hangin amah ka muhdah hi; bang hang hiam cih leh kei tawh kisai a hoih khat beek genkhol ngei lo-a a sia hi tawntung hi. Amah Imlah tapa Micaiah ahi hi,” a ci hi.

Jehoshaphat in, “Kumpipa in tua bang ci kei in,” ci-in a dawng kik hi.

8 Tua ciangin Israel kumpipa in a uliante khat sama, “Imlah tapa Micaiah hong sampak dih un,” a ci hi.

9 Israel kumpipa le Judah kumpipa Jehoshaphat in a kumpi puante uh silhin Samaria lutna kongpi kianga ancilna phual zangah kumpi tokhomin tu uh a, kamsang khempeuh in amaute mai-ah kam a sang uh hi. 10Tu-in Kenaanah tapa Zedekiah in sikkite bawla, “TOPA thugen hih ahi hi: ‘Aram-te a kisiat khit matengun hihte in amaute na pik ding uh hi,’ ci hi,” ci-in a gen hi.

11 Kamsang dangte khempeuh in a kibangin kam a sang uh hi. Amaute in, “TOPA in kumpipa khutah hong pia ding ahi manin Ramoth Gilead simin gualzo in,” a ci uh hi.

12 Micaiah sam dinga pai kamtaipa in ama kiangah, “En in kamsang dangte khempeuh in mi khat gen bangin kumpipa zawh nadingin a gen uh hi. Nang zong amaute aa thukimpih inla a gum lamin pau in,” a ci hi.

13 Ahi hangin Micaiah in, “TOPA nuntakna lo a ka cihinah, ka Pasian in kei tunga hong gen bek ama tungah ka gen thei hi,” a ci hi. ^b

14 Amah a tun ciangin kumpipa in, “Micaiah aw, Ramoth Gilead sim dingin ka kuan ding uh hiam, ahikeh ka thuak lel ding uh hiam?” ci-in a dong hi.

Amah in, “Amaute na khut sungah hong kipia ding hi, sim inla gualzo in,” ci-in a dawng hi.

15 Kumpipa in, “Bangmah dang gen loin thutak bek gen dingin TOPA minin bangzah vei hong kiciamsak ka hi hiam?” a ci hi.

16 Tua ciangin Micaiah in, “Israel khempeuh mualtung ah a cing om lo tuu bangin a kithehthang ka mu a, TOPA in, ‘Hih mite pu nei lo ahi uh hi. Amau inn ciatah lungnuamin ciah uh hen,’ ci hi,” a ci hi. ^c

17 Israel kumpipa in Jehoshaphat kiangah, “Amah in kei tungtangah a hoih khat beek gen ngei lo-a a sia bek gen hi, ci-a hong gen hi lo ka hi hiam?” a ci hi.

18 Micaiah in genbeh lai-a, “Tua ahi ciangin TOPA thugen za un: TOPA a kumpi tokhom tungah tu-a vantung mihonpite a taklam le a veilamah a ding uh ka mu hi. 19Tua ciangin TOPA in, ‘Ramoth Gilead sima, a sih nading mun tua lai-ah kua in Israel kumpipa Ahab va zol ding ahi hiam?’ ci hi. ^d

“Khat in khat gena adang khat in a tuam khat a gen hi. 20A nunung penin kha khat a mai-ah pai-in TOPA mai-ah dinga, ‘Ke’n amah ka zol ding hi,’ ci hi.

“TOPA in, ‘koi ci zia-in,’ ci-in a dong hi.

21 “Amah in, ‘Ka va pai dinga ama kamsangte khempeuh kam ah kha zuau ka va suaksak ding hi,’ ci hi. ^e

“TOPA in, ‘Pai inla hih in, amah zol lecin na zo ding hi,’ ci hi.

22 Tua ciangin tu-in TOPA in na kamsangte khempeuh kam ah kha zuau a koih khin hi. TOPA in na thuak ding gimna a kipsak khin hi,” a ci hi.

23 Tua ciangin Kenaanah tapa Zedekiah paitoin Micaiah maitang a beng hi. Amah in, “Na tunga thugen dingin TOPA pana kha ▼

▼18.23 Ahikeh Kha

in cikin kei hong paisan ahi hiam?” ci-in a dong hi. ^g

24 Micaiah in, “Inn sung tawngah na buk ni ciangin na theikhia ding hi,” ci-in a dawng hi.

25 Tua ciangin Israel kumpipa in, “Micaiah paipihin khuapi ukpa Amon le kumpipa tapa Joash kiangah puak unla 26‘Kumpipa in: bittaka kong tun kik matengin hih pa thong sungah khumin anlum le tuisik longal bangmah pia kei un, ci hi,’ ci-in gen un,” ci-in thu a pia hi.

27 Macaiah in, “Bittaka nong tun kik tak leh, TOPA in kei tungah thu a gen lo ahi hi,” a cikhia hi. Tua ciangin, “No mite khempeuh aw, ka thugen ciamteh un,” a cihbeh lai hi.

Ramoth Gilead ah Ahab Kithat

28 Tua ciangin Israel kumpipa le Judah kumpipa Jehoshaphat Ramoth Gilead ah a kuanto uh hi. 29Israel kumpipa in Jehoshaphat kiangah, “Ken ka mel selin gam sungah va kuan ningin, nang na kumpi puante silh in,” a ci hi. Tua ciangin Israel kumpipa a mel selsa-in gal sungah a kuan hi.

30 Tua laitakin Aram kumpipa in a sakolleng ukte thu pia-a, “Israel kumpipa longal aneu alian khatpeuh tawh kido kei un,” a ci hi. 31Sakolleng ukte in Jehoshaphat a muh uh ciangin,” Hih in Israel kumpipa ahi hi,” ci-in a ngaihsun uh hi. Tua ciangin amah sim dingin a kihei uh hi. Ahi zongin Jehoshaphat kikokhia a TOPA in amah a huh hi. Pasian in ama kiang pan amaute kaikhia hi, 32ahang in, sakolleng ukte in amah Israel kumpipa ahi loh lam a muh uh ciangin a delh nawn kei uh hi.

33 Ahi hangin mi khat in a thal kekin mawk lot a, Israel kumpipa kidalnate kikal a kha hi. Kumpipa in a sakolleng hawlpa kiangah, “Kidona sung pan leng hawlkhia in hong paikhiatpih in; ka liam hi,” ci-in a gen hi. 34Sun nilohin nasiatakin gal kido a, Israel kumpipa a sakolleng tungah kingam in Aram-te lam nga-in nitak dong a om hi. Ni tum ciangin a si ta hi. ^h