Dan 6 | ZomZIV | STEP | Darius in a kumpi-gam sung uk dingin gamkhen-uk 120 koiha

hPn 32:1; Ne 2:3

i Da 3:27

j Tp 19:18-19

k Da 3:4

‏ Daniel 6

Humpinelkai Kua sungah Daniel

1 Darius in a kumpi-gam sung uk dingin gamkhen-uk 120 koiha 2 amaute tungah a uksawn dingin mi thum koihin tuate lakah khatna Daniel dingin a lungkim hi. Kumpipa a sup loh nadingin gamkhen-ukte tungah tuate in thuneihna nei uh hi. 3 Tua thu vaihawmpite le gamkhen-ukte lakah Daniel kivatuam diaka, kumpipa in a gambup a uksak dingin a geel hi. 4 Hih thu hangin thuvai-hawmpite le gamkhen-ukte in Daniel mawhsak nadingin a kumpi nasepna ah encikin mawhzon uh hi; ahi hangin bangmah cih thei lo uh hi. Amah muanhuai-in ngentela na lopthop sep lo ahi manin nawngkaisak nading a mu zo kei uh hi. 5 A tawpna ah tua mite in, “Hih Daniel pen a Pasian thukham tawh kisai-in bang khatpeuh hih ding i hi kei ngal leh amah i mawhmat nading thu khatpeuh i mu zo kei ding hi,” a ci uh hi. ^a

6 Tua ciangin thuvai-hawmpite le gamkhen-ukte kipawlin kumpipa kiangah paikhawm uh a, “Kumpipa Darius aw, na khan sawt hen! 7 Kumpipa aw, nangmah in thukip khat bawlin, tu-a kipan ni sawmthum sungin nang longal mi khatpeuhin pasian khatpeuh ahikeh mi khatpeuh tungah thungen a om leh humpinelkai kua sungah kilawn ta hen, ci lecin a, tua thukiptakin kizui leh ci-in ko kumpipa thuvai-hawmpite, uliante, gamkhen-ukte, thudotte le ukpite khempeuh ka vekun ka thukim uh hi. 8 Kumpipa aw, tu-in tua thukip suaksak inla Media-te le Persia-te upadi a kikhel loh bangin a kikhel loh nadingin lai-in gelh in” a ci uh hi. 9 Tua ciangin Kumpipa Darius in thukip a gelh hi.

10 Daniel in tua thukip kihawmkhia khin zo hi, cih a theih ciangin Jerusalem lam nga-a kongvangneu kihong, ama omna inntung inndei ah a pai hi. A hih ngei bangin ni khatin thumvei khukdinin thu ngen-a a Pasian tungah lungdam a ko hi. 11 Tua ciangin hih mite a honin va pai uh a Daniel in Pasian huh nading a nget laitak a tuak uh hi. 12 Tua ciangin amaute kumpipa kiangah pai-in a thukip suahsak tawh kisai hopih uh a: “Tu-a kipan ni sawmthum sungin mi khatpeuh, nang tung longal pasian khatpeuh ahikeh mi khatpeuh tungah thungen a om leh, “Kumpipa aw, humpinelkai kua sungah kilawn ta hen, cih thukip hawmkhia khin hi lo na hi hiam?” a ci uh hi.

Kumpipa in, “Thukip a kiplai hi - Media-te le Persia-te upadi tawh kizui-in a kikhel kik thei nawn lo ding ahi hi,” ci-in a dawng hi. ^b

13 Tua ciangin amaute in kumpipa kiangah, “Judah salte lakah Daniel kicipa khat in, kumpipa aw, nang le nangma gelhsa thukip a thusim kei hi. Ni khatin thumvei thu ngen lai hi,” a ci uh hi. 14 Kumpipa in hih thu a zak ciangin a lungdong mahmah hi; Daniel hutkhiat sawma nitum dongin a hotkhiat theih nading a ngaihsun hi. ^c

15 Tua ciangin mite a honin kumpipa kiangah pai uh a, “Kumpipa aw, Mediate le Persia-te upadi tawh kizui-in kumpipa in a suahkhiatsaksa thukip ahikeh thukhote a kikhek theih loh lam phawk in,” a ci uh hi. ^d

16 Tua ciangin kumpipa in thu pia a, amaute in Daniel paipihin humpinelkai kua sungah a lawn uh hi. Kumpipa in Daniel kiangah, “A tawntunga ama na na sep na Pasian in nang hong hukhia ta hen!” a ci hi. ^e

17 Suangtumpi khat khukin humpi-nelkai kuavang a huk khit uh ciangin Daniel omzia a kikhel theih loh nadingin kumpipa in a seal khetna zungbuh-in ciamteh a, a uliante zungbuh-in zong a ciamteh uh hi. 18 Tua ciangin kumpipa a inn ah ciah a, bangmah ne loin, ama ading gualnopna bangmah a bawlsak kei hi. Tuaci-in a ihmu thei kei hi. ^f

19 Khuavak phetin kumpipa tho a, humpinelkai kua ah a paipah vingveng hi. 20 Tua kuavang gei a tun ciangin aw lingsa in, “A nungta Pasian nasempa Daniel aw, a tawntunga ama na na sep na Pasian in humpinelkaite panin hong hukhia hiam?” a ci hi. ^g

21 Daniel in, “Kumpipa aw, na khan sawt hen! 22 Ka Pasian in a vansawltak hong sawlin amah in humpinelkaite kam a humsak hi. Ama muhna ah mawhpeng ka hi manin hong liamsuah kei uh hi. Tua tham loin kumpipa aw, na mai-ah bangmah ka khial kei hi,” a ci hi. ^h

23 Kumpipa lungdam lua a, humpinelkai kua sung pan Daniel a kaihkhiat nadingun thu a pia hi. Humpinelkai kua sung pan Daniel a kikaihkhiat ciangin a Pasian a muan manin a ci tungah liamma khat beek a kimu kei hi. ⁱ

24 Kumpipa thupiakna bangin a maan lopi-a Daniel a hekte a zite le a tate teng uh tawh kipaipih in humpinelkai kua sungah kilawn khawm hi. Amaute humpinelkai kua taw zong tu man loin humpinelkaite in bawh uh a, a guhte khempeuh uh a balzan gawp uh hi. ^j

25 Tua ciangin Kumpipa Darius in gam sung buppi ah mite, minamte le pau nam tuamtuamte tungah lai paisak a: ^k

“No tungah daupaina lianpi tung ta hen! ^l
26 “Thukip khat kong piak inah: Ka kumpi-gam mun tuamtuama mite khempeuh in Daniel Pasian kihta in a zahtak pelmawh ding uh hi. ^m
“Ahang in, amah a nungta Pasian hi a,
a om tawntung ahi hi;
a kumpi-gam kisusia ngeilo dinga,
ama ukna a bei ngei kei ding hi. ⁿ
27 Amah in hu-in honkhia hi;
vante le leitungah lim le
a lamdangte a bawl hi. ^o
Amah in humpinelkaite vangliat na panin
Daniel a hukhia hi,” ci-in a gelh hi.

28 Tua ciangin Darius le Persia mi Cyrus ^{▼▼6.28 Ahikeh Darias, tua in Cyprus kumpi sep sung ahi hi.} in kumpi a sep hun sungin Daniel a lamzang mahmah hi.