Deu 4 | ZomZIV | STEP | Israel aw, tu-in za in; thukipte le thukhamte no kong hilh ding hi. Na pate uh Pasian TOPA in note hong piaksa gam ah lutin la-a na ten theih nadingun zui un.

‏ Deuteronomy 4

Thumang Dingin Thu Pia

1 Israel aw, tu-in za in; thukipte le thukhamte no kong hilh ding hi. Na pate uh Pasian TOPA in note hong piaksa gam ah lutin la-a na ten theih nadingun zui un. 2 Note kong thupiak banah behlap kei unla zong dokkhia loin note kong piak TOPA note Pasian thupiakte zui un.

3 Baal Peor ah TOPA sepsa na mitun na mu zo uh hi. TOPA note Pasian in Peor a Baal nung a zui peuhmah susia a, 4 ahi hangin TOPA note Pasian a lenkip khempeuh tuni dong na nungta uh hi.

5 En un, note luta na lak ding uh gam ah na zuih theih nadingun TOPA ka Pasian in kei hong thupiak bangin thukipte le thukhamte kong hilh zo hi. 6 Hih in minamte tungah pilna le theihtelna hong lak dinga, hih thukip a za khempeuh in, “Hih minam liante a pil le a theitel mi taktak ahi hi,” hong cih nadingun limtakin zui un. 7 TOPA eite Pasian tungah thu i nget peuhpeuh ciangin i kiangah a om bangin, amau pasiante a kianga om bang minam lian om ahi hiam? 8 Tuateh tuni-a note mai-a kong khun thukham teng banga amaan thukip le thukham a nei ding zah-a lian bang minam dang om ahi hiam? ^a

9 Kidawm tapeuh un, na nuntak laitengun na mit ua na muhsate uh na mangngilh loh nading uh le na lungsim uh tawh a kipelh loh nadingin no le no kikem cinten un. Na tate uh hilh unla amau zong a tate uh hilhsawn uh hen. 10 Horeb a TOPA note Pasian mai ah na din lai-un amah in kei tungah, “Mite in ka thugenna za-a, leitungah a nuntak laitengun kei hong zahtak theih nading uh le a tate uh a hilhsawn theih nadingun ka mai-ah mite kikhawmsak in,” hong cih ni mangngilh kei un. 11 Mual kuang in vante dong mahmah bana meiivom le khuamial sahpi a om laitakin note in hong naihin mualbul ah na ding uh hi. 12 Tua ciangin meikuang lak panin TOPA in note hong hopih hi. Kam pauna awte na zak uh hangin bangmah lim na mu kei uh hi; aw bek ahi hi. 13 Note tungah hih thukhun, Thupiak Sawm hong genkhia-in na zuih nadingun thu hong pia-a, tua ciangin suangpek nih tungah a gelh hi. 14 Jordan na kantan khit uh ciangin na neih ding uh gam ah na zuih ding uh thukipte le thukhamte note kong hilh dingin TOPA in kei lam hong lak hi. ^b

Milim Biakna Kikham

15 Horeb a meikuang lak pan TOPA in note hong hopih ni-in na khat peuhpeuh lim na mu kei uh hi. Tua ahi ciangin 16 note hong siasak ding na khatpeuh tawh a kisun milim bawl loin lim na seek kei ding uh a - numei lim ahi a pasal lim ahi zongin, 17 leitunga om ganhing khatpeuh lim ahi a, huih laka leng vasa khatpeuh lim ahi zongin 18 leitham a bokvak ganhing khatpeuh lim ahi a, tui sunga om ngasa khatpeuh lim tawh ahi zongin a kisun lim na seek loh nadingun kidawm mahmah un. 19 Tuateh vanlam entoin - vantunga na khempeuh - ni, kha, aksite na muh uh ciangin vankikhupsin nuai-a minamte khempeuh tungah TOPA note Pasian in a piak nate lamah kihei-in bia-in kun kha kei un. 20 No na hi uh leh TOPA in hong la in, sik haltuina pummei, Egypt panin hong paikhiatpih a, ama gouluah dingin tu-a na om bangun hong omsak hi. ^c

21 Note hangin kei tungah TOPA heh-a, kiciam takpi khin ahi manin Jordan gun kan loin TOPA note Pasian in na luah dingun hong piak gam hoih ah ka lut kei ding hi. 22 Hih gam ah kei ka si ding hi; Jordan ka kantan kei ding hi; ahi hangin note in na kantan ding uh a, tua gam hoih na la ding uh hi. 23 TOPA note Pasian in no tawh a bawl thukhun na mangngilh khak ding uh kidawm un; TOPA note Pasian in a kham na khatpeuh tawh a kisun lim bawl kei un. 24 Ahang in, TOPA note Pasian in a haltum mei, a aam Pasian ahi hi. ^d

25 Tu le ta nei in tua gamah na ten khit nungun - kiheisanin, lim khatpeuh bawlin TOPA note Pasian mit ah gitlohna na sep uh a, amah na hehsak uh leh 26 Jordan kantan a na lak ding uh gamah na mangthang pah ding uh hi, cih note langah ka teci dingin van le lei tuni-in ka sam hi. Tua lai-ah sawtvei teng loin hong kisusia taktak ding uh hi. 27 TOPA in minamte lakah hong thehthang ding a, TOPA hong hawlkhiatte, minamte lakah tawmtawm bek na om ding uh hi. 28 Note in tua laiah mihing in a bawl, khua mu thei lo, khua za thei lo, a ne thei lo, a gimnam za thei lo sing le suang pasiante na bia ding uh hi. 29 Tua lai panin na lungsim khempeuh uh le na hinna khempeuh uh tawh TOPA note Pasian na zon ciang bekun na mu ding uh hi. 30 Note tungah hih na khempeuh hong tungin na lungdon khit uh a ni nunung ciangin TOPA note Pasian kiangah na kileh kik ding uh a, ama thu na mang ding uh hi. 31 Bang hang hiam cih leh TOPA note Pasian in mi a lainat Pasian ahi manin amah in note hong nusia lo dinga hong susia loin kiciamna tawh a kipsak uh, na pute uh tawh a thukhun a mangngilh kei ding hi. ^e

TOPA in Pasian Hi

32 Pasian in mihing a bawl ni-a kipan, note hun mapek tuma hunte kan un; vante mong khat panin mong khat dongah dong un. Hih zah a lian na khatpeuh piang ngei in, hih bang na khatpeuh a kiza ngei peuhmah hiam? 33 Note zaksa bangin mei kuang lakah Pasian ^{▼▼4.33 Ahikeh pasian khat} a pauna aw za-a nungta kua om peuhmah hiam? 34 TOPA note Pasian in zia-etnate, lim piandangte le a lamdangte, gal, a thahat khut le khut zankhiatna tawh ahikeh a lipkhaphuai sepna tawh na muh mahmah un no ading Egypt ah na khempeuh a sep bangin, pasian khatpeuh in na semin minam khat pan minam dang khat lakkhiat sawm ngei ahi hiam? ^g

35 Note in, Pasian ahi TOPA, amah longal adang a om loh lam na theih nadingun hih na khempeuh no hong kilak ahi hi. 36 Amah in note hong sek nadingin van panin ama aw hong zasak hi. Leitung ah a mei lianpi hong laka, meikuang lakah ama kammal na za uh hi. 37 Amah in na pute uh a it manin amau nunga a suante uh teelin ama Ompihna le a lian mahmah thahatna tawh Egypt panin hong paikhiatpih a, 38 na mai panun no sanga a lianzaw, a hatzaw minamte hawlkhia-in amau gamah hong puak-a, na luah dingun hong pia ahi manin, tuni-in hici bangin na om uh hi. ^h

39 Tuni-in tunga van le nuai-a lei ah TOPA in Pasian ahina note lungsim ah theicianin ciamteh un. Adang khat beek a om kei hi. 40 Note le no nunga na tate uh tungah thu hoih in, TOPA note Pasian in na neih den dingun hong piak leitangah sawtpi na ten theih nadingun, tuni-a kong piak ama thukipte le a thupiakte zui un.

Bukna Khuapi

41 Tua ciangin Moses in Jordan nisuahna lamah khuapi thum a sehkhia hi. 42 Mi khat in a ma-in sawmkhol lo napi a vengpa a thah khak leh tua lai-ah tai thei ding hi. Hih khuapite khatpeuh ah tai-in a nuntakna a hon ding hi. 43 Tua khuapite hihte ahi hi: Reuben-te adingin sehnel-gam mualtung zanga om Bezer; Gad-te adingin Gilead a om Ramoth; le Manasseh-te adingin Bashan a Golan ahi hi. ⁱ

Thukham Thupatna

44 Moses in Israel-te mai-a a lui thukham hih ahi hi. 45 Hih ngeina, thukipte le thukhamte, Egypt panin a paikhiat uh ciangin Moses in amaute a piak hi-a, 46 Egypt pana a paikhiat nungun Moses le Israel-te in a zawh uh Heshbon a kumpi a sem Amor-te kumpipa Sihon gam sung ahi, Jordan nisuahna lama om Beth Peor kianga kuam sunga a om laitakun a gen ahi hi. 47 Amaute in Bashan kumpi Og gam Jordan nisuahna lama Amor-te kumpi nihte gam a laksak uh hi. 48 Hih gam Arnon Guam kil-a om Aroer panin Siyon ^{▼▼4.48 Hebrew; Syriac (Tp. 3:9 zong en in) ah Sirion} vum (tuapen Hermon) dong kikhungsuk a, 49 Jordan nisuahna lam Arabah gam khempeuh huamkha-in Pisgah mualdung nuai-a Arabah ^{▼▼4.49 Tua in Si Tuipi} Tuipi dong ahi hi.