Exo 17 | ZomZIV | STEP | Israel mipi bup Sin Sehnel-gam panin dingkhia uh a, TOPA thupiak bangin mun khat pan mun khatah a zin uh hi. Rephidim ah giahphual sat uh a, ahi hangin mipite tui dawn ding tui a om kei hi.

‏ Exodus 17

Suangpi Pana Tui

1 Israel mipi bup Sin Sehnel-gam panin dingkhia uh a, TOPA thupiak bangin mun khat pan mun khatah a zin uh hi. Rephidim ah giahphual sat uh a, ahi hangin mipite tui dawn ding tui a om kei hi. 2 Tua ciangin Moses tawng uh a, “Ka dawn ding uh tui hong pia in,” a ci uh hi. ^a

Moses in, “Bang hanga kei hong tawng na hi uh hiam? Bang hanga TOPA zia-et na hi uh hiam?” ci-in a dawng hi. ^b

3 Ahi hangin tua lai-ah mipite dangtak uh a, Moses a phunsan uh hi. Amaute in, “Bang hanga dangtaka si dingin kote, ka tate uh le ka ganhingte uh Egypt pan hong paikhiatpih na hi hiam?” a ci uh hi. ^c

4 Tua ciangin Moses in TOPA ko a, “Hih mipite bang cih ding ka hi hiam? Amaute in suangin hong deng dekdek uh hi,” a ci hi. ^d

5 TOPA in Moses kiangah, “Mipite mai-ah pai in. Israel upate pawlkhat tonpih inla, na khutin Nile na satna ciangkhut tawi kawmin pai in. 6 Horeb a suangpi gei na mai-ah ka na ding ding hi. Suangpi sat lecin mite dawn ding tui hong phulkhia ding hi,” a ci hi. Tua ciangin Moses in Israel upate muh in tua bangin a hih hi. 7 Amah in tua mun Massah ^{▼▼17.7 Massah pen zia-et cihna} le Meribah ^{▼▼17.7 Meribah pen kitawng cihna} min a phuak hi, bang hang hiam cih leh Israel-te in tawng uh a, amaute in TOPA zia-et in, “TOPA eite lakah om hiam, om lo hiam?” a ci uh hi. ^g

Amalek-te Kizo

8 Amalek-te kuanin Rephidim a Israel-te sim uh hi. 9 Moses in Joshua kiangah, “I mite pawlkhat tengkhia inla Amalek mite do dingin va kuan un. Zing ciangin mual tungah ka khutah Pasian ciangkhut tawisa in kei ka na ding ding hi,” a ci hi.

10 Moses thupiak bangin Joshua in Amalek-te do-a, mualdawn ah Moses, Aaron le Hur a kah to uh hi. 11 Moses in a khut a liiktoh laisiah Israel-te gualzo uh a, ahi hangin a khut a niamkhiat suk ciangin Amalek-te in a zo uh hi. 12 Moses khut a kham ciangin amaute suang khat la in a nuai-ah koih uh a, amah a tungah a tu hi. Nitum dong a khut a zan suak zawh nadingin Aaron le Hur - khat langkhatah pangin, a lang khatah khat pang uh a, a khutte a domsak uh hi. 13 Tua ci-in Joshua in Amalek galkapte namsau in a zo hi. ^h

14 Tua ciangin TOPA in Moses kiangah, “A kiciamteh den dingin hih thu laizial tungah gelh inla, Joshua zasak pelmawh in, bang hang hiam cih leh van nuai panin Amalek mite phawkna ka phiatsiang kiuhkeuh ding hi,” a ci hi. ⁱ

15 Moses in biakna-tau khat dawh a, TOPA ka Dialkhai ahi hi, ci-in min a phuah hi. 16 Amah in, “TOPA kumpi tokhom dongah khutte kilaamto hi. TOPA in khang sawnsawnte dongin Amalek-te a do ding hi,” ^{▼▼17.16 Ahikeh “Bang hang hiam cih leh khut khat in TOPA} a ci hi. ^k