Isa 5 | ZomZIV | STEP | Ka itpa ading a lenggui lo phuahna la khat ka sa ding hi: Mualpang lei hoihna khatah ka itpa in lenggui lo khat a nei hi.

‏ Isaiah 5

Lenggui Lo La

1 Ka itpa ading
a lenggui lo phuahna la khat ka sa ding hi:
Mualpang lei hoihna khatah ka itpa in
lenggui lo khat a nei hi.
2 Amah in tua lei tang kal a, suangteng paikhia-in
lenggui hoih pente a suan hi. ^a
A lo sungah buktau khat dawh a,
lengtui sukna khuk khat a to hi. ^b
Tua ciangin lenggah hoih gah dingin lamen a,
ahi hangin lenggah hoih lo gah mawk hi.
3 Tu-in no Jerusalem a tengte le Judah mite aw,
kei le ka lenggui lo kikalah thu khen dih un. ^c
4 Ka lenggui lo adingin ka hihsate longal,
adang bang hih lai ding ka hi hiam?
Lenggah hoih gah dinga ka lamet hi napi
bang dingin a hoihlo bek gah mawk hiam?
5 Tu-in ka lenggui lo ka hih ding zia
kong gen ding hi.
A dai ka phelkhia dinga,
a kisia ding hi;
a kulh ka sukham dinga,
a kituancil ding hi.
6 Lotul ka suaksak dinga kipuah loin kikho lo dinga,
tua lai-ah lingkungte le
thangling kungte a po ding hi. ^d
A tungah guah a zuk loh nadingin
meiite thu ka pia ding hi,” a ci hi. ^e
7 Thahatpen TOPA’ lenggui lo pen
Israel innkuan hi-a, ^f
a lungtunna huan lah
Judah mite ahi hi.
Amah in a thutang dingin lamen napi sisan luanna a mu hi;
thumaanna a lamet hangin lungdonga kahna a za hi.

Gimnate le Thukhennate

8 Mun khat beek awng lo zahin
inn khat le inn khat zoma
lo khat le lo khat a zom leitang tunga ^g
no guak a tengte tungah gimna tung ta hen.

9 Thahatpen TOPA in ka zak tektekin: ^h

“Inn lianpite a hawmin kinusia dinga, ⁱ
inndei lianpipite ah a teng a om kei ding hi.
10 Lenggui lo acre ^{▼▼5.10 Hebrew in hakkol sawm tua in bawngtal hakkol sawm in ni khat a khawhkhop.} sawm ah lenggah-zu bath ^{▼▼5.10 Tua in gallon 6 bang hi thei.(litre 22 bang)} khat piangin,
anci homer ^{▼▼5.10 Tua in seng guk bang (litre 220 bang)} khat ah anhum ephah ^{▼▼5.10 Tua in seng 3/5 bang (litre 22 bang)} khat bek a suak ding hi. ⁿ
11 Zingsangin tho baih a,
a zu dawn ding delhin
zu in a satsak pilpial dong zan sawt dong
a tutkhote tungah gimna tungta hen. ^o
12 Amaute in pawi sungah harp-te le lyre-te,
khuangtate le tamngaite le lenggah-zu nei uh a, ^p
ahi hangin TOPA nasepna thudon loin
ama khutma a zahtak kei uh hi. ^q
13 Tua ahi ciangin ka mite,
theihtelna a neih loh manun sal a suak ding uh hi; ^r
a mi zaliante uh gilkialin si ding uh a, ^s
a mihonte uh dangtakin a keu ding uh hi.
14 Tua ahi ciangin hankhuk ^{▼▼5.14 Hebrew ah Sheol} in a ankam limsak a, ^u
ciangtan om loin a kam ka a; ^v
tua sungah a uliante uh le a mipite uh
kitawng zuazua sa-in nuamsa-in a tumsuk uh hi. ^w
15 Tua hi a, mite kikhiasukin
mihing a kiniamkhiat ding hi;
a kiphasakte mit a niam hah ding uh hi. ^x
16 Ahi hangin Thahatpen TOPA a thutangna hangin kitawisang dinga,
a siangtho Pasian in a thumaanna tawh a siangtho a hihna hong lak ding hi. ^y
17 Tua ciangin tuute in amau lonona-a gamta bangin lopa ne ding uh a, ^z
mihaute’ mun kisiate ah tuunote a gamta ^{▼▼5.7 Hebrew le Septuagint ah mi khualte in ne ding} ding uh hi.
18 Zuauna khauzen-in mawhna kai a, ^ab
leng khauhualpi-in gitlohna kai-in ^ac
19 “Pasian nasep i muh theih nadingin ^ad
amah kinawhsakin manlangsak ni;
i theihtheih nadingin
kinaihsakin
Israel Siangtho Pa ngimna tangtungsak pak ni,” ^ae
a cite tungah gimna tung ta hen. ^af
20 Gitlohna hoih ci a,
migitna hoih lo ci-in ^ag
khuavak tangin khuamial koih a,
khuamial tangin khuavak koih in,
a khum tangin a kha koih in,
a kha tangin a khum a koihte tungah gimna tung ta hen. ^ah
21 Amau mita pil a kisate le
amau muhna-a tei a kisate tungah gimna tung ta hen. ^ai
22 Zu dawna pasal tangte le ^aj
zuhel dawn a siampente ^ak
23 a mawhte golhsum-in khah a, ^al
mawhpengte’ thutanna a nialte tungah gimna tung ta hen. ^am
24 Tua ahi ciangin meikuang in buhtu a liahtum bangin, ^an
meikuang lai-ah lopa keu khulsuk bangin
amaute zungte muat dinga,
a pakte uh leivui bangin a leengmang ding hi; ^ao
ahang in, amaute in Thahatpen TOPA thukham nial uh a,
Israel Siangtho Pa kammal a simmawh uh hi.
25 Tua ahi ciangin TOPA hehna a mite langkhatah kuangin
a khut vikto-a amaute a sattuk hi.
Mual liante kiling a, ^ap
misi luangte kongzinga nin lompi bang hi.
Hizahta khit nangawnin a hehna dam nai lo lai-a, ^aq
a khut a vikto lailai hi.
26 Amah in gamlapi a om minamte adingin dialkhai lek a, ^ar
leimonga omte adingin phit a mut hi. ^as
Hih munah amaute manlangtakin
a pai pah uh hi!
27 Amaute khat beek gim loin kimuktu lo uh a, ^at
kuamah lusu loin a ihmu kei uh hi;
a kawnggak uh zong kol lo a, ^au
a khedap kaih khau uh zong a kitat kei hi. ^av
28 Amau thaltangte hiam a,
a thalte khempeuh uh keksa ahi hi;
a sakol khecinte uh meisuang bangin ^aw
a sakollengpeite uh pingpei a bang hi. ^ax
29 Amaute humpinelkai bangin hawk uh a, ^ay
humpinelkai khanglaite bangin a hawk uh hi.
Amaute humhamin a sa nek ding uh man uh a,
a hu ding kuamah om loin a puakhia uh hi. ^az
30 Tua ni ciangin amaute in
tuipi hawk bangin a hawksan ding uh hi.
Mi khatpeuh in gamsung a et ciangin
khuamial le lungdonna bek a mu ding hi; ^ba
khuavak nangawn meii in liah dinga a mial ding hi.