‏ Judges 1

Canaan-mi Omlaite Israel in Sim

1Joshua a sih khit ciangin Israel-te in TOPA tungah, “Canaan-te hong simsak dingin kote mai-ah kua pai masa ding hiam?” ci-in a dong uh hi. ^a

2 TOPA in, “Judah a pai ding hi; keimah in amaute khutah tua gam ka pia khin hi,” ci-in a dawng hi.

3 Tua ciangin Judah mite in a sanggam uh Simeon-te tungah, “Ko sehtanhna gama Canaan-te sim dingin no zong hong kuanto un. Ko zong no aa kong kuanpih ding uh hi,” a ci uh hi. Tua ciangin Simeon-te in a kuanpih uh hi.

4 Judah-te in a sim uh ciangin TOPA in amaute khutah Canaan-te le Periz-te pia-a, amaute in Bezek ah mi tulsawm a satlum uh hi. 5Amaute in tua lai-ah Adoni-Bezek mu uh a, amah doin Canaan-te le Periz-te a delhkek uh hi. 6Adoni-Bezek tai-a, ahi hangin amaute in delhin man uh a, a khutpite le a khepite a tankhiat-sak uh hi. ^b

7 Tua ciangin Adoni-Bezek in, “A khutpite le a khepite a kitansak kumpi sawm sagihte in ka sabuai nuai-a anneng a tawm uh hi. Tu-in amaute ka bawlna Pasian in kei tung hong thuk kik hi,” a ci hi. Amah Jerusalem ah puak uh a, tua lai-ah a si hi.

8 Judah mite in Jerusalem zong sim uh a, a la uh hi. Amaute in namsau-in khuapi zo uh a, mei-in a hal uh hi. ^c

9 Tua khit ciangin mualtung gam Negev le nitumna lam mualbulte sim dingin Judah mite a kuansuk uh hi. 10Amaute Hebron (a masa in Kiriath Arba kici) a teng Canaan-te sim dingin kuan uh a Sheshai, Ahiman le Talmai-te a zo uh hi. ^d

11 Tua lai panin Debir (a masa in Kiriath Sepher kici) a tengte sim dingin a kuan uh hi. 12Tuateh Caleb in, “Kiriath Sepher sim-a, a zo penpen ka tanu Acsah tawh ka tengsak ding hi,” a ci hi. 13Caleb naupa Kenaz tapa Othniel in la a, tua ciangin Caleb in a tanu Acsah tawh a kitengsak hi.

14 Ni khat, tuanu Othniel kiangah pai-a, a pa kiangah lo khat a nget dingin amah a a kun hi. Amah a laa tung pan a kumkhiat ciangin Caleb in, “Bang hong hihsak ding ka hi hiam?” ci-in a dong hi.

15 Tuanu in, “Hong hamphat diak in. Negev ah leitang nong pia khin hi. Tuinakte zong hong pia lai in,” a ci hi. Tua ciangin Caleb in tuinak tungnung le tuinak nuainungte a pia hi.

16 Moses sungpa’ suan Ken-te, Arad kiang Negev gam sunga Judah-te Sehnel gama mite laka teng dingin Judah mite tawh Nisuh Khuapi b panin a paito uh hi. ^e

17 Tua ciangin Judah mite a sanggamte uh Simeon-te tawh kuanin Zephath a teng Canaan-te sim uh a, a khuapi a susia c dikdek uh hi. Tua ahi ciangin tua mun Hormah d kici hi. 18Judah mite in Gaza, Ashkelon le Ekron a khuapi le a gam ciat tawh a la e uh hi. ^f

19 TOPA in Judah mite a ompih hi. Amaute in mualtung gam la uh a, ahi hangin zanglei a teng mite zanglei panin a hawlkhia zo kei uh hi; bang hang hiam cih leh amaute in sik sakolleeng a nei uh hi. 20Moses in a khapsa bangin Caleb tungah Hebron kipia a, tua lai panin amaute in Anak tapate thum a hawlkhia uh hi. 21Ahi zongin Benjamin-te in Jerusalem a teng Jebus-te a nawhkhia zo kei uh hi; tuni dongin Benjamin-te tawh Jebus-te a tengkhawm uh hi. ^g

22 Tu-in Joseph innkuante in Bethel sim uh a TOPA in amaute a ompih hi. 23Amaute in Bethel (a masa in Luz kici) thu a kan ding mi a sawl uh ciangin, 24thukante in khuapi pana pusuak mikhat mu uh a, ama kiangah, “Khuapi sunga lut nading hong hilh in, nang a hoihin kong thuk kik ding uh hi,” a ci uh hi. 25Tua ciangin amah in laka, amaute in tua khuapi namsau-in zo uh a, tua mipa le a innkuanpihte a hawi uh hi. 26Tua ciangin Hit-te gam ah pai-a, tua lai-ah khuapi lamin, a min Luz ci-a tuni dongin a kici suak hi. ^h

27 Ahi hangin tua gamah Canaan-te tengsuak uh ahi manin Manasseh in Bethshan, Taanach, Dor, Ibleam, Megiddo mite le a kima tengte khempeuh a hawlkhia kei hi. 28Israel a thahat ciangin Canaan-te zawhthawh thu-in na semsak uh a, ahi hangin a hawlkhiamang khin kei uh hi. 29Ephraim-te in zong Gezer a teng Canaan-te hawlkhia lo uh a, amaute lakah Canaan-te a tengsuak uh hi. 30Zebulunte in zong Kitron le Nahalol a teng Canaan-te hawlkhia lo uh a, amaute lakah a om uh hangin zawhthawh thu-in na a semsak uh hi. 31Asher-te in zong Acco, Sidon, Ahlab, Aczib, Helbah, Aphek, Rehob a tengte hawlkhia lo uh hi; 32tua thu hangin Asher mite pen tua gama teng Canaan mite lakah a teng uh hi. 33Naphtali in zong Beth Shemesh, Beth Anath a tengte hawlkhia lo uh hi; ahi hangin Naphtali-te zong tua gama tengsa Canaan-te lakah teng uh a, Beth Shemesh le Beth Anath a tengte amau adingin zawhthawh thu-a nasemte a suak uh hi. 34Amor-te in mualtung gamah Dante lehnawh uh a zanglei-a a paisuk ding uh a phal kei uh hi. 35Tuateh Amor-te Heres Vum, Aijalon le Shaalbim ah tengsuak uh a, ahi hangin Joseph innkuante a vangliat zawk uh ciangin amaute zong zawhthawhthu-in na kisemsak hi. 36Amor-te gamgi Mom-ai Ciang a panin Sela le agal ciang ahi hi. ⁱ