Mar 6 | ZomZIV | STEP | Tua mun nusia in Jesu le a nungzuite ama tenna khua ah a pai uh hi.

‏ Mark 6

Pahtawina Ngah Lo Kamsangpa

1 Tua mun nusia in Jesu le a nungzuite ama tenna khua ah a pai uh hi. 2 Sabbath a tun ciangin synagogue sungah thuhilh kipana, ama thugen a za mi tampi in lamdang a sa uh hi. ^a

Amaute in, “Hih mipa in hih nate koi pana a ngah ahi hiam? Nalamdangte nangawn a bawl theih nadingin ama tunga kipia hih pilna bang ahi hiam? 3 Khutsiampa hi lo ahi hiam? Mary tapa hi-a, James, Joseph ^{▼▼6.3 Greek ah Joses, Joseph tawh kilamdang lo}, Judas le Simon-te sanggampa hi lo ahi hiam? A saggam numeite ei tawh teng khawm uh hi lo ahi hiam?” a ci uh hi. Tua ciangin ama tungah amaute a lungkim kei uh hi. ^c

4 Jesu in amaute kiangah, “Kamsangpa ama khua sung, ama tanau-te lak le ama inn sung bekah a kipahtawi kei hi,” a ci hi. 5 Tua lai-ah amah in mi cina tawmkhatte tungah a khut nga-in a damsak lohngal nalamdang khat beek a bawl thei kei hi. 6 Amah in amaute uplahna lamdang a sa hi. ^d

Jesu in Sawm-le-nihte Sawlkhia

Tua ciangin Jesu, khua khat pan khua khatah thuhilhin a vak kawikawi hi. 7 Sawm-le-nihte ama kiangah sama, kha gilote ^{▼▼6.7 Greek ah nin} tungah thuneihna pia-in nihta nihta-in a sawlkhia hi. ^f

8 Amah in amaute a lamlahna hih bang ahi hi: “Na khualzinna ua na zat dingun ciangkhut longal an ahi zongin, thung-ip ahi zongin, kawnggak sungah sum ahi zongin bangmah pua kei un. 9 Khedap bulh unla ahi hangin puantungsilh keng thuah kei un. 10 Inn khatpeuh ah na lut uh ciangin tua khua na nusiat mateng uh tua inn ah tam suak un. 11 Note hong ngai lo, na thu uh a ngai nuam lo munte na nusiat uh ciangin amaute langa teci panna-in na khepek ua leivuite singkhia un,” a ci hi. ^g

12 Amaute paikhia uh a, mite a kisik nadingin thu a hilh uh hi. 13 Amaute in dawi tampi hawlkhia uh a, cina tampite sathau nilhin a damsak uh hi. ^h

Baptize-pa John Ngawng Kitan

14 Jesu min kithei khawk khin ta ahi manin Kumpi Herod in zong hih thu a za hi. Mi pawlkhatin, ^{▼▼6.14 Khutgelh masa pawlkhatah amah in gen} “Baptize-pa John misisa tho kika, tua hangin amah in nalamdang bawl theihna vangliatna nei ahi hi,” a ci uh hi.

15 Adangte in, “Amah Elijah hi,” a ci uh hi.

Pawlkhatte leuleu in, “Tang lai-a kamsangte banga kamsangpa khat ahi hi,” a ci uh hi. ^j

16 Ahi hangin Herod in hih thu a zak ciangin, “A ngawng ka tanpa John misisa tho kik hi!” a ci hi. ^k

17 Ahang in, John mat dingin Herod mahmah in thu pia-in hensak-a thong sungah a khumsak hi. A nau pa Philip zi a suh nu Herodia hangin hih banga a hih ahi hi. 18 John in Herod kiangah, “Na sanggampa zi na suh thukham tawh kituak het lo hi,” a cici khin zo hi. 19 Tua ahi ciangin Herodia in John hua-in a that nuam hi. Ahi hangin tuanu in amah a that thei kei hi. 20 Bang hang hiam cih leh John mi thumaan le misiangtho khat ahilam Herod in thei ahi manin amah kihta in a hu hi. Herod in John thu a zak ciangin amkham mahmah ^{▼▼6.20 Khutgelh masa pawlkhat ah ama’n na tampi sem} napi ama thugen a ngai nuam hi. ^m

21 A nunungna-ah a hun hoih khat a om hi. Herod in a suah ni-in ama uliante le galkapmangte le Galilee makaite an a vak hi. 22 Herodia’ tanu sungtumin lama, tuanu in Herod le a nitak-an nekpih lenglate a lungkimsak hi. ⁿ

Kumpipa in numeino kiangah, “Na deih peuhpeuh hong ngen in, kong pia ding hi,” a ci hi. 23 Amah kiciama, “Ka kumpi gam phel khat dong nong nget peuhpeuh kong pia ding hi,” ci-in a kamciam hi.

24 Tuanu paikhia-in a nu kiangah, “Bang ngen ding ka hi hiam?” a ci hi.

Amah in, “Baptize-pa John’ lutang,” ci-in a dawng hi.

25 Kumpipa kiangah numeino manlangin paipah a, “Tu mahmah in kuangdai-in Baptize-pa John lutang nong piak ding ka deih hi,” ci-in a ngen hi.

26 Kumpipa lungdong lua mahmah a, ahi hangin ama kamciamsa le a nitak-an nekpih a lenglate hangin tuanu a nial nuam kei hi. 27 Tua ciangin amah in John lutang a paipih nading thupiakna tawh mithatpa khat a sawlpah hi. Tua mipa pai-in thong sunga om John ngawng tana, 28 ama lutang kuangdai-in a puak kik hi. Amah in numeino pia-a tuanu in a nu a pia hi. 29 John nungzuite in hih thu a zak uh ciangin pai uh a, a luang la-in han sung khatah a sial uh hi. ^o

Jesu in Tulnga Vak

30 Jesu kimkotah sawltakpite va kikhawm uh a, amau hihsa le a hilhsate uh a ko uh hi. 31 Tua ciangin mipite a ciah le a kuan a tam luat manin an nek hun ding nangawn nei lo uh a, amaute kiangah, “Gamdaihna mun khatah no kia bek in hong zui unla, tawlnga un,” a ci hi. ^p

32 Tua ciangin amau guak gamtawng khatah gunkuang khatin a pai uh hi. 33 Ahi hangin amaute paikhiat a mute in thei uh a, khua khempeuh panin khe-in tai uh a, amaute tun ma-in a na tung uh hi. 34 Jesu lei-ah a tun ciangin mihonpi tampi a mu hi. Amah in amaute khuatuah hi, bang hang hiam cih leh amaute a cingpa om lo tuuhon tawh kibang uh hi. Tua ciangin amaute thu tampi a hilh hi. ^q

35 Tua hunlaitak nitak lam ahi hi. Tua ciangin a nungzuite a kiangah va pai uh a amaute in, “Hih tak gamtawng hi-a khuanung lua mahmah ta hi. 36 Hih kima khuata khuaneute ah pai-in a nek ding uh an a lei theih nadingun mipite ciahsak ta in,” a ci uh hi. ^r

37 Ahi hangin amah in, “Note in a nek ding uh khatpeuh pia un,” a ci hi.

Amaute in ama kiangah, “Tuabang hileh pasal khat, kha giat thaman ^{▼▼6.37 Greek ah denari zanih la in} tak bei ding hi! Kote pai-in tua zah tawh an va lei-in amaute nek ding, pia ding ka hi uh hiam?” a ci uh hi. ^t

38 Amah in, “Anlum bangzah na nei uh hiam? Pai-in va en dih un,”a ci hi.

Amaute in a et khit uh ciangin, “Lum nga le ngasa nih om hi,” a ci uh hi.

39 Tua ciangin Jesu in mipite lopa hing tungah a pawlpawlin a tusak hi. 40 Tua ahi ciangin amaute a zaza, a sawm nganga-in a tu ciptep uh hi. 41 Tua anlum nga le ngasate gel la-a, vantung lam ento-in lungdam a koh khit ciangin anlumte a balkham hi. Tua ciangin mipite a lui dingun a nungzuite a pia hi. Amaute khempeuh lakah ngasate gel zong a hawm hi. 42 Amaute in ne uh a, a kham pikpek uh hi. 43 Nungzuite in anlum le ngasa athem aneng bawmta sawm-le- nih a tawm uh hi. 44 Tua an nete pasal cingteng tul nga a pha hi.

Jesu Tui Tungah Pai

45 Tua khit phetin Jesu in nungzuite gunkuang sungah tuangsaka, ama mai Bethsaida ah paisakin mihonpite a ciahsak hi. 46 Amaute paisan-a, amah thungen dingin mual tungah a pai hi. ^u

47 Nitak ciangin tuilipi laizangah gun kuang om a, amah ahileh lei lakah a om hi. 48 Huih in gunkuang lehmut ahi manin nungzuite in gunkuang nakpi-a a hot uh a mu hi. Zan vil lina pawlin amaute lam zuanin tuilipi tungah Jesu a pai hi. Amaute kheng dektak a, 49 ahi hangin amah tuilipi tunga pai a muh uh ciangin sikha sa in a kikokhia uh hi. 50 Bang hang hiam cih leh a vekun amah mu uh a, a lau mahmah uh hi. ^v

Jesu in amaute kiangah, “Lau kei un! Keimah ka hi hi. Hong kihta kei un,” a cipah hi. 51 Tua ciangin amaute tawh gunkuang tungah kahto a, huih nung a dai kiuhkeuh hi. 52 Amaute in anlum ngate thu theitel lo uh ahi manin lamdang lua mahmah a sa uh hi, amaute lungtang kikhauhsak hi. ^w

53 Amaute galkah uh a, Gennesaret a tun uh ciangin tua lai-ah a gunkuang uh a khih uh hi. 54 Gunkuang pan a pusuah phetun, mipite in Jesu mel a theitel uh hi. 55 Mipite tua kual khempeuhah tai kawi kawi uh a, cinate phek tawh zawngin, amah om hi ci-a a zakna peuhpeuhuah a paipih uh hi. 56 Khuapite khuaneute le gamsung khuate ahi zongin ama paina peuhpeuhah cinate paipih uh a, sum zuakna munte ah a na koih uh hi. Ama puantualpi mongtep ciang beek a lawnsak theih nadingin thum uh a, amah a lawngte khempeuh a dam uh hi. ^x