Mat 4 | ZomZIV | STEP | Tua ciangin dawimangpa zia-etna thuak dingin Kha in Jesu gamlakah a pi hi.

‏ Matthew 4

Jesu a Kizia-etna

1 Tua ciangin dawimangpa zia-etna thuak dingin Kha in Jesu gamlakah a pi hi. 2 Sun sawmli le zan sawmli an a tan khit ciangin a gil kial hi. 3 Tua zia-etpa a kiangah va pai-a, “Nang Pasian Tapa na hileh hih suangte anlum suaksak in,” a ci hi.

4 Jesu in, “Mite anlum bek tawh nungta hi loin Pasian kam sung pana pusuak thu khempeuh tawh a nungta hizaw hi,’ ^{▼▼4.4 Tp. 8:3} ci-in kigelhhi,” ci-in a dawng hi. ^b

5 Tua ciangin dawimangpa in amah khuapi siangtho ah paipih-a, biakinnpi khum a sang penna ah a dingsak hi. 6 Dawimangpa in, “Nang Pasian Tapa na hileh tuaksuk dih in. Ahang in:

‘Amah in nang hangin ama vansawltakte thu pia dinga,
na khepekte suang tawh a kisukkhak loh nadingin
a khut uh tawh hong domto ding uh hi,’ ^{▼▼4.6 Ph. 91:11,12} ci-in kigelh hi,” a ci hi.

7 Jesu in, “‘Na Topa Pasian na zia-et kei in,’ ^{▼▼4.7 Tp. 6:13} ci-in zong kigelh hi,” ci-in a dawng hi.

8 Tua khit ciangin dawimangpa in amah mual sangpi dawnah paipih leuleu a, leitunga om kumpi-gam khempeuh le a thupinate a lak hi. 9 Amah in, “Kunin kei nong biak leh hihte khempeuh nang kong pia ding hi,” a ci hi.

10 Jesu in, “Satan, paikhiamang in! ‘Na Topa Pasian bia inla, ama na bek sem in,’ ^{▼▼4.10 Tp. 6:13} ci-in kigelh hi,” a cih san hi.

11 Tua ciangin dawimangpa in amah paisan a, vansawltakte hong pai-in Jesu a don uh hi.

Jesu Thuhilh Kipan

12 Jesu in John thongkiatna thu a zak ciangin Galilee ah a ciah kik hi. 13 Nazareth nusia in Zebulun le Naphtali gamhuam tuilipi gei khata om Capernaum ah pai-in a teng hi. 14 Hih in kamsang pa Isaiah tungtawna kigenkholsa:

15 “Zebulun gam le Naphtali gam,
Jordan gun dunga tuipi zuatna lampi,
Gentile-te tenna Galilee ah,
16 khuamial sunga teng mite in,
khuavak lianpi a mu zo uh hi;
sihna liim gam sunga teng mite tungah
khuavak tang khin ta hi.” ^{▼▼4.16 Isa. 1:1,2} cih thu a tangtun nading ahi hi. ^g

17 Tua huna kipanin Jesu in, “Vantung gam hong nai zo ahi manin kisik un,” ci-in thuhilh a kipan hi.

Nungzui Masate Sapna

18 Galilee Tuipi gei-a Jesu a pai laitakin Peter kici Simon le a nau Andrew-te unau a mu hi. Amaute nga bengte ahi manun tuilipi sungah len a khuh laitak uh ahi hi. 19 Jesu in, “Hong pai unla kei hong zui un. Mihing mante kong suaksak ding hi,” a ci hi. 20 Amau zong a lente uh nusia in amah a zuipah uh hi.

21 Tua pan a paikhiat ciangin unau dang nih, Zebedee tapa, James le a sang gampa John-te a mu hi. Amaute in a pa uh Zebedee tawh len puahin gunkuang sungah a om uh hi. Jesu in amaute a sam hi. 22 Amaute in zong gunkuang le a pa uh nusia pah uh a amah a zui uh hi. ^h

Jesu in Cina Damsak

23 Galilee gam sung tengah Jesu pai kawikawi a, synagogue-te ah thu hilhin, vantung gam lungdamna thuthak hilh-a, cina luna khempeuh a damsak hi. 24 Syria gam sung tengah ama thu a kizel hi. Natna tuamtuam a veite, a na valvalte, dawilutte, sibup natna veite le pumzawte khempeuh Jesu kiangah paipih uh a, amah in a damsak hi. 25 Galilee gam, Decapolis ^{▼▼4.25 Tua pen, Khuapi Sawmte}, Jerusalem, Judea le Jordan gungal gama mihonte in amah a zui uh hi. ^j