Mic 6 | ZomZIV | STEP | TOPA thugen ngai un: “Dingin, mualliante tungah na thu uh sung un; mualneute in na thugen uh za uh hen.

‏ Micah 6

TOPA in Israel Mawhsak

1 TOPA thugen ngai un:

“Dingin, mualliante tungah na thu uh sung un;
mualneute in na thugen uh za uh hen.
2 Mualliante aw, TOPA mawhsakna za un; ^a
tawntung leitung bulpite aw, ngai un.
Ahang in, TOPA in a mite tawh thu kinei a,
Israel tawh thu kisel dingin a om hi. ^b
3 “Ka mite aw, ken note bang hong cih ka hi hiam?
Bang hong ci lunggimsak ka hi hiam? Hong dawng un. ^c
4 Egypt panin kong paikhiatpih a,
sala na omna gam panun note kong tankhia hi. ^d
Note hong makaih dingin Moses tawh
Aaron le Miriam zong kong sawl hi. ^e
5 Ka mite aw,
Moab kumpipa Balak hong sawmna ^f
le Beor tapa Balaam dawnna phawk un.
TOPA in thumaanin na a sep lam na theih nadingun Sittim pan Gilgal dong ^g
na khualzinna uh mangngilh kei un,” a ci hi. ^h
6 TOPA mai-ah bang tawi-in va pai-a
a kitawisang Pasian mai-ah bang tawh va kun ding ka hi hiam?
Ama mai-ah meihal biakna ding kum khat apha
bawngno keng ding ka hi hiam?
7 Tuutal tulkhat, sathau gunpite tulsawm tawh
TOPA lungkim ding ahi hiam? ⁱ
Ka khialhnate tangin ka ta upapen le
ka kha mawhna tangin ka pumpi gah pia ding ka hi hiam? ^j
8 Mipa aw, amah in a hoih hong lak zo hi.
Tua hi-a TOPA in nang tungah bang hong kal ahi hiam?
Thutangin gamta inla, lainatna it-in, kiniamkhaitin
na Pasian tawh kalsuan khawm in. ^k

Israel-te Khialhna le Dan Thuaksakna

9 Ngai un TOPA in khuapi ah sam a-
nangma min kihtakna in pilna hi -
“Cianggolh le a Bawlpa ^{▼▼6.9 Hih gual Hebrew in a khiatna kician lo hi.} thudon un.
10 A kheltat innkuante aw,
a muhdahhuai thumaan lo-a kingah goute le
hamsiatsa ephah ^{▼▼6.10 Ephah khat a keu tehna} cing lo-a na ngahte uh mangngilh nai ding ka hi hiam? ⁿ
11 Tawi tehna man lo le a gikna man lo ip
a zangte khahkhong lai ding ka hi hiam? ^o
12 Tuanu’ mihaute ngongtat uh hi;
ama mite zuauphuak uh a, ^p
amaute leii in zuauthu vive a gen hi. ^q
13 Tua ahi ciangin na mawhna hangin
hong susia-in kong siatsak ding ka kipan hi. ^r
14 Na ne ding uh a na kham kei ding uh hi; ^s
na gil uh a kial ^{▼▼6.14 Hih kammal adingin Hebrew ah a khiatna kician lo hi.} veve ding hi.
Na kholkhol ding uh a, bangmah na suahtak kei ding uh hi, ^u
bang hang hiam cih leh na kholte uh namsau ka pia ding hi.
15 Na suan ding uh a, an na la kei ding uh hi;
olive na gawi ding uh a, athau na zangkha kei ding uh hi;
lenggah na suk ding uh a, ahi hangin a zu na dawn kha kei ding uh hi.
16 Omri le Ahab innkuante
ngeina teng na zui uh a, ^v
amaute tang ngeina teng na zui uh hi. ^w
Tua ahi ciangin note, suksiat dingin
kong pia dinga na mite uh kinuihsanin, ^x
minamte in hong linhah ding uh hi,” ^{▼▼6.16 Septuagint; Hebrew in ka mite kisimmawhna} a ci hi. ^z