‏ Numbers 11

TOPA Panin Meikuang

1Tu-in mihonte amau haksatna thu hangin TOPA zakin phun uh a, amah in a zak ciangin a hehsuak hi. Tua ciangin TOPA panin amaute lakah mei kuanga a giahphual uh kimkhat a kangtum hi. 2Mipite in Moses a koh uh ciangin, amah in TOPA tungah thu ngen-a, mei a mit hi. 3Tua ciangin amaute lakah TOPA mei kuang ahi manin tua mun Taberah a kici hi. ^a

TOPA Panin Vamim

4 Amaute laka mi laklawhte in an dang duhin uisan uh a, Israel mite kap kikin, “I nek ding sa nei beek leeng maw! 5A man nei lo a Egypt a i nek ngasate phawk si hang - tangmaite, dawnpawlte, lo-uih neute, lo-uihsante le lo-uih kangte zong phawk si hang! 6Ahi hangin tu-in i ankam lim nawn lo hi; hih manna longal adang lah mu ngei lo hang a!” a ci uh hi. ^b

7 Manna pen nannan tang tawh kibanga, singnai a sun hi. 8Mihonte pai kawikawi-in tuate khawm uh a, angawina tawh gawi-in ahikeh sum sungah a su uh hi. Amaute in beelin a huan kei uh leh mohphengin a bawl uh hi. Tua hi a olive thau-a kibawl na khat bangin a lim hi. 9Zanin giahphualah daitui a kiat ciangin manna zong a kia hi.

10 Mite a innkuan un amau buk kongkhak ciatah a kah uh Moses in a za hi. TOPA heh lua mahmah a, Moses a lauthawng hi. 11Amah in TOPA kiangah, “Bang hangin na nasempa hih bangin lauthawngsak na hi hiam? Ken nang lungkimloh nadingin bang sem a, hih mipite khempeuh vangik kei hong suan na hi hiam? 12Hih mipite khempeuh kei paiisa ahi hiam? Amaute ka ta sa na hi hiam? Naucingnu in naungeek a puak bangin amaute ka angah pua-in a pute uh tungah kiciama na khapsa gamah amaute pua dingin bang hanga hong gen na hi hiam? 13Hih mite khempeuh adingin sa koi pan ngah thei ding ka hi hiam? Amaute kei tungah kapkapin, ‘Ka nek ding uh sa hong pia in,’ ci uh hi. 14Hih mite khempeuh ka cih nading ka thei kei hi; kei adingin haksa lua hi. 15Hici banga kei nong bawl ding leh tu mahmah in hong that in - na mai-ah maipha ka ngah leh - kei siatna hong tuaksak kei in,” a ci hi. ^c

16 TOPA in Moses tungah, “Mipite laka ulian, a makai-a na theih Israel-te upa sawm sagih ka kiangah hong paipih in. Amaute nang tawh hong dinkhawm theih nadingun Kikhopna Puanbuk ah amaute paisak in. 17Tua lai-ah kei hong paisukin kong hopih dinga nang tunga om Kha lakhia in amaute tungah Kha ka guang ding hi. Mipite haksatna nang guak in na puak loh nadingin amaute in nang hong dawn ding uh hi. ^d

18 “Mite tungah, ‘Zing cianga sa ne dingin kithawi kholin kisiangthosak un. Na kah uh ciangin TOPA in hong za hi, “I nek ding sa nei lel peuh leng! Egypt pan i paikhiat buangin,” na ci uh hi. Tu-in TOPA in sa hong pia dinga, na ne ding uh hi. 19Note in ni khat hiam, ni nih hiam, ni nga hiam, ni sawm hiam, ni sawm nih hiam bek ne loin 20na ikkhiat dong, na kih dongun kha khat hul na ne ding uh hi - bang hang hiam cih leh note laka om TOPA na nial uh a, ama mai-ah kapin, “Bang hangin Egypt nusia i hi hiam?” na ci uh hi,” ci in,” a ci hi.

21 Ahi hangin Moses in, “Hih lai-a pasal tul zagukte lakah ka dinga nang in, ‘Kha khat hul a nek ding uh sa amaute ka pia ding hi,’ na ci hi. 22Amaute in tuuhonte le bawnghonte kigo leh kham ding uh ahi hiam? Amau adingin tuipi sunga ngasa khempeuh kiman khin leh kham ding uh ahi hiam?” a ci hi.

23 TOPA in Moses kiangah, “TOPA ban tom lua ahi hiam? Tu-in ka thugen a manin a tun le a tun loh na mu ding hi,” a ci hi. ^e

24 Tua ciangin Moses paikhia-a mipite tungah TOPA gensate a gen hi. Amah in a upate uh sawm sagih paipih a, amaute puanbuk kimkotah a dingsak hi. 25Tua ciangin meii lakah TOPA paisuk a, ama tunga Kha lakhia-in upa sawm sagihte tungah tua Kha a guan hi. Amaute tungah Kha a khawl ciangin amaute in thu genkhol uh a, tua bangin a gamta kik b nawn kei uh hi.

26 Ahi zongin, a min uh Eldad le Medad mi nih giahphualah a om lai uh hi. Upate sungah amaute kihel napi puanbuk pan a paikhia kei uh hi. Tua hi napi amaute tungah zong Kha khawl a, giahphualah thu a genkhol uh hi. 27Moses kiangah tangvalno khat va tai-a, “Edad le Medad in giahphual ah thu genkhol uh hi,” ci-in va ko hi.

28 A neutunga kipan Moses a huhpa Nun tapa Joshua ding toin, “Ka topa Moses aw, amaute khawlsak in!” a ci hi. ^f

29 Ahi hangin Moses in, “Nang kei tangin haza na hi hiam? Ken TOPA mite khempeuh in kam sang henla TOPA in ama Kha amaute tungah guan leh ka cizaw a!” a ci hi. 30Tua ciangin Moses le Israel upate giahphual ah a ciah kik uh hi. ^g

31 TOPA kiang pan huih nungkhia-in tuipi panin vamimte a mut hi. Giahphual kimkotin ni khat lampaina ciangah leitung pan pi a thum bang a sahin tuate b a kiasuk hi. 32Tua ni le tua zan tawntung le a zing ciang, mite paikhia in vamim a khawm uh hi. Homer c sawm sanga tawmzaw a khawm a om kei uh hi. Tua ciangin amaute in giahphual kimkot ah tuate a pho uh hi. 33Ahi hangin sa a hai laitak uh a kivalh theih ma-in mite tungah TOPA a heh suaka gimna nasiapi tawh amaute a vat hi. 34Tua ahi manin tua mun Kibroth Hattaavah d kici hi, bang hang hiam cih leh tua lai-ah amaute in an dang a lunggulh lua mite a vui uh hi.

35 Kibroth Hattaavah panin mipite Hazeroth ah zinin tua lai-ah a teng uh hi. ^h