‏ Numbers 15

Adang Biak-piaknate

1TOPA in Moses tungah, 2“Israel-te hopih inla amaute kiangah: ‘Na ten na dingun kong piak nading gamah na lut uh a, 3TOPA tungah lungkimsakna mei-a hal biakna gimnamtui, tuuhon pan ahi a bawnghon pan ahi zongin TOPA tungah na piak uh a - meihal biakna ahi a, a tuam vilvel a kiciamna ahikeh, utthu-a biaknate ahikeh ansangkhum pawi-a biaknate na piak uh leh - 4tua ciangin a biakna hong paipihpa in TOPA tungah an-a biakna-in sathau hin b khat sehli suah sehkhat tawh helsa annel limci ephah c khat sehsawm suah sehkhat a pia ding hi. 5Meihal biakna ding ahikeh ap nading, tuuno khat tawh lenggahzu hin khat sehli suah sehkhat dawntheih-a biak nadingin a kipia khawm ciat ding hi.

6 “‘Tuutal khat tawh piak khawm ding an-a biakna dingin sathau hin d khat sehsawm suah sehkhat tawh a kihel annel limci, ephah e khat sehsawm suah sehnih, 7le dawntheih-a biakna dingin lenggahzu hin khat sehthum suah sehkhat bawl in. Tua pen TOPA lungkimsakna gimnamtui dingin pia un. ^a

8 “‘TOPA tungah a tuam vilvel a kiciamna ahikeh kilawmtakna biakna f dingin bawngtalno khat meihal biakna ahikeh biakpiakna dinga na bawl uh ciangin 9tua bawngtal tawh an-a biakna-in sathau hin g lang helsa annel limci ephah h khat sehsawm suah sehthum na paipih khawm ding hi. 10Dawntheih biakna dingin lenggahzu hin lang zong keng in. Tua in mei-a kihal biakna TOPA a lungkimsak gimnamtui khat hi ding hi. 11Bawngtalno ahikeh tuutal, tuuno keelno-te zong hih mah bangin kihih ciat ding hi. 12Na bawl zangzah hih bangin na bawl ciat ding hi. ^b

13 “‘Tualsuak mi peuhmah in TOPA a lungkimsak gimnamtui-in mei-a hal biakna a piak ciangin hih nate hih bangin a hih pelmawh ding uh hi. 14Khang sawnsawnte in zong, pemta ahi a, note laka hong tengpak khat ahi zongin TOPA a lungkimsak mei-a hal biakna a piak peuhpeuh uh ciangin note hih bang tektekin a hih pelmawh ding uh hi. 15Note le no laka teng pemtate adingin mihonpite in ngeina kibang a nei ding uh hi; hih in khang sawnsawnte dongin tawntung thuzek ahi hi. TOPA mai-ah note le pemtate na kibang ding uh hi. 16Note le note laka teng pemtate tungah thukham le ngeinakipte a kibangin kizang khawm ding hi,’ ci-in gen in,” a ci hi. ^c

17 TOPA in Moses tungah, 18“Israel-te hopih inla amaute tungah, ‘Kong paipih nading leitang ah na lut uh ciangin, 19tua leitang-a piang ante na nek uh ciangin, TOPA tungah pawlkhat biakna-in na pia un. 20Na anpi uh a masapen panin mohpheng khat biakna-in na pia ding uh a, ancilna pana biakna-in na pia ding uh hi. 21Khang sawnsawnte dongin note in na leitang pan ua piang gah masa panin TOPA tungah biakna-in na pia ding uh hi. ^d

Mawhkhaknate hanga Biaknate

22 “‘Tu-in TOPA in Moses tunga a thupiaknate khatpeuh sawmkhol lo pi-a, a khialh leh- 23TOPA in amah tawna note hong thupiakte khempeuh, TOPA in tuate a piak ni-a kipan khang sawnsawnte donga a kizom toto in a zehphi kha a om leh - 24a kidop lohna hangin mihonpite a gamtat khak leh tua ciangin mihonpi bup in, TOPA a lungkimsak gimnam-tui meihal biakna dingin bawngtalno khat tawh a kisehsa an-a biakna, dawntheih-a biakna le mawhna hanga biakna dingin keel apa khat piakhawm ding hi. 25Israel mipi bup adingin siampipa in thoihdamna bawl dinga, amaute kimaisak ding hi, ahang in, tua pen khialhkhakna hi a, amaute in TOPA tungah mei-a hal biakna le mawhna hanga biakna a pia khin zo uh hi. 26Israel mihonpi bup le amaute laka teng pemtate a kimaisak ding hi, bang hang hiam cih leh tua sawmkhol lo-a tatkhialhna in mipi khempeuh huam hi. ^e

27 “‘Ahi hangin mi khat bek theihlohna hangin a mawh leh amah in mawhna hanga biakna-in kum khat a pha keel anu khat a paipih ding hi. 28Siampipa in TOPA mai-ah theihlohna hanga mawhna a bawlpa adingin thoihdamna bawlsak dinga, ama adingin thoihdamna a kibawl khit ciangin amah kimaisak ding hi. 29Theihlohna hanga kibawl mawhna khatpeuh, Israel mi tualsuak ahi a, pemta ahi zongin a kibang thukham khat kizang ding hi.

30 “‘Ahi hangin TOPA min gendaina-a a mawh teiteite a mipihte panin kikhenkhia ding hi. 31Bang hang hiam cih leh amah in TOPA kammal simmawhin ama thupiakte palsat ahi manin tua mi a kikhenkhia pelmawh ding hi; ama khialhna amah in khu ding hi,’ ci in,” a ci hi. ^f

Sabbath Tanglote Kithat Ding

32 Israel-te sehnel gam ah a om lai-un Sabbath ni-a singtom khat kimu hi. 33Ama singtom laitak a mupa in Moses, Aaron le mihonpi bup kiangah puak-a, 34amah bang kicih ding hiam, kithei lo ahi manin amah a khumcip phot uh hi. 35Tua ciangin TOPA in Moses kiangah, “Tua mipa pel loin a si ding hi, mihonpi bup-in giahphual pua-ah suangin deng pelmawh ding uh hi,” a ci hi. 36Tua ciangin TOPA in Moses a thupiak bangin mipite in amah giahphual pua-ah paikhiatpih uh a, a denglum uh hi. ^g

Puan Mongbawk

37 TOPA in Moses tungah, 38“Israel-te hopihin amaute kiangah, ‘Khang sawnsawnte dongin na puanmong kiu-uhah a mongbawk bawlin a tungah khaudum kikhih ciat ding hi. 39Note in hih puan mongbawkte na en ding uh a, tua ciangin TOPA hong thupiakte khempeuh phawkin, tuate na zui ding uh a, na lungsim uh le na mit uh utluatna zui-in no le no na kizuak loh nading uh ahi hi. 40Tua ciangin ka thupiakte khempeuh man ding ahilam na phawk ding uh a, note Pasian tungah na ki-ap ding uh hi. 41Keimah TOPA note Pasian, Egypt pana hong paikhiatpihpa ka hi hi. Keimah TOPA note Pasian ka hi hi,’ ci-in gen in,” a ci hi. ^h