Num 23 | ZomZIV | STEP | Balaam in, “Hih lai-ah biakna-tau sagih hong dawhsak inla, kei adingin bawngtal sagih le tuutal sagih hong bawlsak in,” a ci hi.

atg 14:30

‏ Numbers 23

Balaam Thusuak Masa

1 Balaam in, “Hih lai-ah biakna-tau sagih hong dawhsak inla, kei adingin bawngtal sagih le tuutal sagih hong bawlsak in,” a ci hi. 2 Balaam cih bangin Balak in hih a, biakna-tau khatah bawngtal khat le tuutal khat ta a pia hi. ^a

3 Balaam in Balak kiangah, “Ka paikhiat kalin hih na biakna kiangah na om in, TOPA in kei hong kimuhpih nuam kha ding hi. Kei tunga hong lah peuhpeuh kong gen ding hi,” a ci hi. Tua ciangin amah pawnlak munsang khatah a paikhia hi. ^b

4 Pasian in amah na dawn a, Balaam in, “Biakna-tau sagih ka dawh khin-a, tau khatah bawngtal khat le tuutal khat ka pia khin hi,” a ci hi.

5 TOPA in Balaam kam sungah thu muam-a, “Balak kiangah pai kik inla amah hih thu pia in,” a ci hi. ^c

6 Tua ciangin ama kiangah pai kik a, a biakna gei-ah Moab uliante khempeuh tawh amah a dingkhawm a mu hi. 7 Tua ciangin Balaam in a thusuak pulak a: ^d

“Balak in Aram panin kei hong paipih a,
nisuahna mualte panin
Moab kumpipa in hong paipih hi.
Amah in, ‘Jacob hong hamsiatsak in;
hong pai inla Israel mawhsak in,’ ci hi.
8 Pasian hamsiat loh amaute
bang ka ci hamsiat theih ding hiam? ^e
TOPA mawhsak loh amaute
bang ka ci mawhsak thei ding hiam?
9 Asannate panin amaute ka gal-et a,
suangpi dawn panin amaute ka mu hi.
A tuam ten mite ka mu a, amau le amau
minam khata a kisim lote ahi uh hi. ^f
10 Tua in Jacob leivui sim thei-in,
Israel sehli suah sehkhat sim zo ding ahi hiam?
A thumaan mi sih bangin kei hong sisak inla
ka hun tawpna amaute aa bangsak in,” a ci hi. ^g

11 Balak in Balaam kiangah, “Kei bang hong cih na hi hiam? Ka galte hamsiat dingin nang kong sam hi, ahi hangin bangmah cih loin amaute thupha na pia zawsop hi!” a ci hi. ^h

12 Amah in, “TOPA in ka kam sunga hong guan thu gen pelmawh lo ding ka hi hiam?” ci-in a dawng hi. ⁱ

Balaam Thusuak Nihna

13 Tua ciangin Balak in a kiangah, “Amaute na muh theih nading a mundang khatah kei hong zui in; a khenkhat bek na mu ding hi, a vekpi uh hi nai lo hi. Tua lai panin hong hamsiatsak in,” a ci hi. 14 Tua ciangin Zophim gamlaka Pisgah dawna paipih a, tua lai-ah biakna-tau sagih dawhin tau khatah bawngtal khat le tuutal khat ta a pia hi.

15 Balaam in Balak kiangah, “Hua lai-a amah tawh ka kituah sung na biakna kiang hih lai-ah na om in,” a ci hi.

16 TOPA in Balaam na dawntuah a, ama kamah thu muamin, “Balak kiangah pai kik inla hih thu amah pia in,” a ci hi. ^j

17 Tua ciangin ama kiangah pai kik a, a biakna gei-a Moab uliante tawh amah a dingkhawm a mu hi. Balak in, “TOPA in bang ci hiam?” ci-in a dong hi.

18 Tua ciangin a thusuak pulak a:

“Balak, tho inla ngai in;
Zippor tapa aw, ka thugen za in.
19 Pasian pen zuau gen dingin mihing hi lo a, ^k
a lungsim kheng themthum dingin mihing tapa zong ahi kei hi.
A cihsa hih lo ding ahi hiam?
A khapsa tangtun lo ding ahi hiam?
20 Thupha piak ding thupiakna ka ngah zo hi;
amah in thupha pia khin hi, ken ka khel thei kei hi. ^l
21 “Jacob sungah kamsiatna kimu lo-a,
Israel sungah lungnoplohna a a om kei hi.
TOPA amaute Pasian amaute tawh omkhawm hi;
amaute lakah Kumpipa a kiko hi. ^m
22 Pasian in amaute Egypt panin paikhiatpih a;
amaute in gam bawngtal tha a paii uh hi. ⁿ
23 Jacob langah bumna om lo-a,
Israel langah aisanna a om kei hi.
Tu-in keimah in Jacob kiang le Israel kiangah,
“Pasian sepsa mu in!” a ci ding hi.
24 Tua mite humpinelkai pi a bang uh hi;
amaute a sa matsa a nek ma ^o
sisan a dawn khit matenga a ommawk thei lo
humpinelkai bangin a diangdiang uh hi,” ci hi.

25 Tua khit ciangin Balak in Balaam kiangah, “Amaute hamsiat kei inla thupha lah pia kei in!” a ci hi.

26 Balaam in, “TOPA cih peuhpeuh ka hih kul hi, hong ci hi lo ka hi hiam?” ci-in a dawng thi.

Balaam Thusuak Thumna

27 Tua ciangin Balak in Balaam kiangah, “Hong pai dih in, a mundang khatah hong paipih lai dih ning. Tua lai panin amaute nong hamsiatsak ding Pasian lungkim kha thei ding hi,” a ci hi. 28 Tua ciangin Balak in gamval a kimuhsukna Peor dawnah Balaam a paipih hi. ^p

29 Balaam in, “Hih lai-ah biakna-tau sagih hong dawh inla bawngtal sagih le tuutal sagih hong bawl in,” a ci hi. 30 Balaam gensa bangin Balak in hihsak a, tau khempeuh ah bawngtal khat le tuutal khat ta a pia hi.