Numbers 9
Paisanna
1Amaute Egypt pan a paikhiat uh a kum nihna a kha masa in Sinai Sehnel-gam ah TOPA in Moses a hopih hi. Amah in, 2“A kisehsa hunin Israel-te Paisan pawi bawlsak in. 3A kisehsa hun tu kha ni sawm le li ni nitak khuamui-in thukhamte khempeuh le ngeina kipte tawh kizui-in na bawl ding uh hi,” a ci hi. 4 Tua ciangin Israel-te in Paisan pawi a bawl ding uh Moses in gen a, 5amaute in a kha masa a ni sawm le li ni khuamui in Sinai Sehnel-gamah a bawl uh hi. TOPA in Moses a thupiak bang tektekin Israel-te in na khempeuh a hih uh hi. a 6 Ahi hangin amaute pawlkhat in tua ni-in Paisan pawi a bawl thei kei uh hi, bang hang hiam cih leh misi luang hangin amaute a sianglo suak uh hi. Tua ciangin amaute tua ni mah in Moses le Aaron kiangah pai uh a, 7Moses tungah, “Misi luang hangin kote a sianglo ka suak uh hi, ahi hangin bang hanga a kisehsa hunin Israel dangte tawh TOPA tungah biakna hong kipiasak lo ahi hiam?” a ci uh hi. 8 Moses in amaute tungah, “TOPA in no tawh kisai thu hong piakna ka muh matengin na ngak un,” a ci hi. b 9 Tua ciangin TOPA in Moses tungah, 10“Israel-te tungah: Note ahikeh na suante un misi luang hangin nin ahikeh khual a zinkhiat laitakun amaute in TOPA’ Paisan pawi a bawl thei veve ding uh hi. 11Amaute in a kha nihna a ni sawm le li ni khuamui in pawi a bawl ding uh hi. Amaute in tuuno sa, silngo sawh loh anlum le lokha teh a nekhawm ding uh hi. 12Amaute in zingsang dong bangmah sit loin a guh khat zong a sutan kei ding uh hi. Amaute in Paisan pawi a bawl uh ciangin a ngeina khempeuh a zui pelmawh ding uh hi. 13Ahi hangin a sianga kiseh mi khat in khualzin lo napi Paisan pawi a bawl kei leh tua mi a kisehsa huna TOPA biakna-ah kihel lo ahi manin a mipihte panin kikhenkhia ding hi. Tua mipa in ama mawhna gaute a thuak ding hi. 14 “Note lak hong tung pemta khat in TOPA’ Paisan pawi a bawl nop leh a thukhamte le a ngeinakipte zui-in bawl ding hi. No a tualsuakte le pemtate in a kibangin ngeinakip na nei khawm tektek ding uh hi,’ ci in,” a ci hi.Biakbuk Tungsan-a Meii
15 Tecipanna Puanbuk a kilam ni-in meii in biakbuk a tuam hi. Nitak panin zingsang dong biakbuk tunga meii pen mei tawh kibang hi. 16Tua bangin kizomtoin meii in tuama zanin mei tawh a kibang hi. 17Puanbuk tung pan meii a kilaptoh peuhpeuh ciangin Israel-te a dingkhia uh hi; meii kiphuhna mun peuhpeuh ah Israel-te in giahphual a sat uh hi. 18TOPA thupiakna tawh Israel-te dingkhia uh a, ama thupiakna mah tawh amaute giahphual ah a giak uh hi. Biakbuk tungsan ah meii a om laisiah giahphual ah a giak uh hi. 19Biakbuk tungsan ah meii sawtveipi a om ciangin Israel-te in TOPA sawlna mangin a dingkhia kei uh hi. 20Khat veivei biakbuk tungah meii ni tawmvei sung bek a om hi; TOPA thupiak zui-in amaute in giahphual sat uh a, ama thupiakna mah zui-in a dingkhia uh hi. 21Khat veivei tua meii nitak panin zingsang dong bek khawl a, zingsanga a kilaptoh ciangin amaute a dingkhia uh hi. Sun ahi a zan ahi zongin meii a kilaptoh peuhpeuh ciangin a dingkhia uh hi. 22Biakbuk tungah meii ni nih ahikeh kha khat ahikeh kum khat a om tan veivei giahphual ah Israel-te om uh a, a dingkhia kei uh hi; ahi hangin a kilaptoh ciangin a dingkhia uh hi. 23TOPA thupiakna zui-in amaute in giahphual sat uh a, TOPA thupiakna mah zui-in a dingkhia uh hi. Amaute in TOPA thupiak ahi Moses tungtawna ama thupiakna a mang uh hi. c
Copyright information for
ZomZIV