Psa 90 | ZomZIV | STEP | Pasian mipa Moses thungetna Topa, kote akhang akhanga ka tenna uh mun na hi hi.

1 Topa, kote akhang akhanga
ka tenna uh mun na hi hi. ^a
2 Mualte a suah ma, ^b
leitung le leitung mite a kibawlkhiat ma-in
atawntung pan atawntung dongin nang Pasian na hi hi.
3 Mihingte leivui suaksak kikin,
“Mihing tapate aw, leivui ah ciah kik un,” na ci hi. ^c
4 Ahang in, nang muhna ah kum tul khat in
a beisa ni khat
ahikeh zana vil khat bang bek ahi hi.
5 Mite, sihna ah ihmu in na phiatkhia a; ^d
amaute zingsanga lopa dawnthak a bang uh hi -
6 zingsangin a thak a mengkhia zongin
nitak ciangin vulin a keugawp hi. ^e
7 Na hehna in kote hong kangtum a,
na lungkimlohna in kote hong lausak hi.
8 Ka tatkhialhnate uh na mai-ah na koih a,
ka mawhsimnate uh na omna khuavak ah na koih hi. ^f
9 Ka nuntak sung nite uh na thangpaihna nuai-ah beimang a,
ka nuntak sung kumte uh tauna-in ka beisak uh hi. ^g
10 Ka nuntak sung nite uh kum sawmsagih sawt a - ^h
ka hat uh leh kum sawmgiat a sawt hi; ⁱ
tua hinapi tua hun sung kikal ^{▼▼ 10 Ahikeh tua hi napi tuate ahoih pen} lungkham hun le dah hun hi-a, ^k
tuate manlangin bei-in ka lengmang uh hi. ^l
11 Na hehna vangliatzia kua in thei ahi hiam?
Ahang in na thangpaihna ahileh na kihtakhuai zah mah in lian hi. ^m
12 Pilna lungsim ka neih theih nadingun ⁿ
ka nuntak sung nite uh simzia hong hilh in. ^o
13 TOPA aw, hong kileh kik in. Bangtan sawt lai ding na hiam? ^p
Na nasemte hong khuatuah in.
14 Ka nuntak sungun lungnopna la sa-in ka kipah theih nadingun
zingsangin na itna kip tawh hong taiisak in.
15 Kote nong gimsak ni zahzah le
lungkhamna ka tuah uh kum zahzah mah kote hong kipaksak in.
16 Na nasemte tungah na sepsate hong kilak henla,
amau tate tungah na thupina kilak hen. ^q
17 Eite Topa Pasian angvanna ^{▼▼ 17 Ahikeh melhoihna} eite tungah hong khawl henla;
i khuta i septe ei adingin kipsak hen -
hihi, ka khut ua ka septe uh kipsak in. ^s