Rev 18 | ZomZIV | STEP | Hih teng khit ciangin vansawltak adang khat, vantung pan hong paisuk ka mu hi. Amah in thuneihna lianpi nei-a, a thupina in leitung a tangsak hi.

‏ Revelation of John 18

Babylon Pukna

1 Hih teng khit ciangin vansawltak adang khat, vantung pan hong paisuk ka mu hi. Amah in thuneihna lianpi nei-a, a thupina in leitung a tangsak hi. 2 Amah in nakpi takin:

“Puk ta! A Lian Babylon puk ta! ^a
Tuanu dawite kua suaka,
kha gilote ^{▼▼18.2 Greek ah nin} le
a nin, a huathuai vasate zualna mun, suak zo hi. ^c
3 Ahang in, minamte khempeuh in
a angkawmnate-a mi a haisak zu dawnin kham ta uh hi. ^d
Leitung kumpite in amah tawh angkawm uh a, ^e
leitung sumbawlte in ama noptatluatna a hauhlawh uh hi,” a ci hi.

4 Tua ciangin vantung panin aw dang khat in:

“Ka mite aw, ama mawhnate ah na kihel khak loh nadingun,
ama gimnate na thuak khak loh nadingun ^f
tuanu sung pan hong paikhia un; ^g
5 ahang in, a mawhnate, van banin kicianga, ^h
Pasian in a gamtat khialhnate ciamteh zo hi, ⁱ
6 Ama piaksa bangin amah pia kik un;
ama hihsa zah nih amah pia kik un.
Ama hai pan mah in a zah nih leihbeh un. ^j
7 Noptatna le minthanna amah le amah a kipiak zahzah,
gawtna le dahna amah pia un. ^k
A lungtang ah amah kisathei a,
‘Kumpinu-in ka tu hi; meigong ka hi kei a,
ka thum ngei kei ding hi,’ ci hi. ^l
8 Tua ahi manin ni khat sungin ama gimnate ahi: ^m
sihna, thumna le kialpi-te in tuanu a khuplet ding hi.
Ama tunga thukhen Topa Pasian thahat ahi manin tuanu,
mei-ah kikhultum ding hi. ⁿ

9 “Amah tawh angkawm-a, ama nop tatna a zangkhawm leitung kumpite in tuanu kihalna meikhu a muh uh ciangin amah kah in a thum ding uh hi. 10 Ama thuaksiatna kihta in a gamlapi ah ding ding uh a:

“‘Gimna! Gimna! O khuapi lian,
O vangliatna khuapi Babylon!
Nai khat sungin na siatna hong tung veh!’ci-in kap ding uh hi.

11 “Leitung sumbawlte kapin a thum ding uh hi. Bang hang hiam cih leh amau sumbuk van: 12 kham, ngun, suang manpha le kep manphate; saihadial hoih, a-ausan, nai le a dupsan puante, sing namtui namkim le saiha tawh kibawl na namkim, sing manpha, sumngo, sik le suangngo; 13 sumbuk van, singzungthak, masala, gim namtui paknamtui khaa le sathau namtui, lenggahzu le olive thau, annel limci le mangbuh; ganhon le tuuhon; sakolte le lengte le mihingte pumpite le khate, kuamah in a lei nawn kei hi. ^o

14 “Amaute in, ‘Na lunggulh mahmah gah in nang hong nusia ta hi. Na hauhna le na thupina khempeuh in mual khum-a, a kimu kik nawn kei ding hi,’ ci ding uh hi. 15 Tuanu tungah hih nate zuaka, a hauhna uh a ngah sumbawlte, ama thuaksiatna kihta in a gamla pekah a ding ding uh hi. Amaute thumin kap ding uh a: 16 “‘Gimna! Gimna, O khuapi lian,

saihadial hoih, a-ausan le
adupsan tawh kizem a, kham,
suang manpha le kep manpha tawh a tee siasua! ^p
17 Nai khat sungin tua bang hauhna lianpi kisia tazen maw!’ ci-in a kapkhia ding uh hi. ^q

“Tembaw ukte khempeuh, tembaw-a khualzinte khempeuh, tembaw nasemte le tuipi pana kivak nading a zongte khempeuh a gamlapi pekah a ding ding uh hi. 18 Tuanu a katna meikhu a muh uh ciangin amaute in, ‘Hih khuapi lian bang, khuapi om ngei hiam?’ cikhia ding uh hi. 19 Amaute in a lutung uhah leivui lawn ding uh a, thumin kapin:

“‘Gimna! Gimna, O khuapi lian,
tuipi tunga tembaw nei khempeuh in a hauh lawh! ^r
Tuanu hauhna nai khat sungin kisia zo tah! ^s
20 Vantung aw, ama hangin nuam in!
Misiangte, sawltakpite le kamsangte aw, nuam un! ^t
Amah in note hong bawlsiatna hangin Pasian in ama tungah thu khen zo hi,’ ci ding uh hi,” a ci hi.

21 Tua ciangin a thahat vansawltak khat in an gawina suang lian cia a pha suangmai khat tawma tuipi sungah lawn in:

“Babylon khuapi lian hih bangin
ngong bawlin kisusia dinga,
a kimu kik nawn kei ding hi.
22 Harp tumte le lasiamte, tamngai mutte le pengkul mutte awging
nang sungah kiza kik ngei nawn lo ding hi. ^u
Nang sungah khutsiam kuamah
kimu kik ngei nawn lo ding hi.
Nang sungah angawina suang ging
a kiza kik ngei nawn kei ding hi. ^v
23 Nang sungah meivak khat zong kivak kik ngei nawn lo ding hi.
Nang sungah mopipa le mo aw
kiza kik ngei nawn lo ding hi. ^w
Na sumbawlte, leitung miliante vive ahi hi. ^x
Nang bumna in leitung minam khempeuh lam pialsak khin hi
24 Ama sungah kamsangte, misiangte le ^y
leitang tunga kithatsate khempeuh sisan kimu zo hi,” a ci hi. ^z