Rev 6 | ZomZIV | STEP | Tuuno in ciamtehna sagihte a masa pen a hon laitak ka en hi. Tua ciangin a nungta ganhing lite khat in kek kia ging bangin, “Hong pai in!” a cih ka za hi.

‏ Revelation of John 6

Ciamtehnate

1 Tuuno in ciamtehna sagihte a masa pen a hon laitak ka en hi. Tua ciangin a nungta ganhing lite khat in kek kia ging bangin, “Hong pai in!” a cih ka za hi. 2 Ka en-a, ka mai-ah sakol kang khat a na om hi! A tunga tuangpa in thal khat tawi a, amah kumpi lukhu khat kipia in, gual zawh a sawm gualzopa bangin a kuan khia hi. ^a

3 Tuuno in ciamtehna nihna a hon ciangin a nungta ganhing nihna in, “Hong pai in!” a cih uh ka za hi. 4 Tua ciangin meikuang banga san sakol khat hong pusuakkhia hi. A tunga tuangpa, leitung pan lemna lakkhiat theihna le mite khat le khat kithahsak theihna vang kipia hi. Amah namsau lianpi khat kipia hi. ^b

5 Tuuno in ciamtehna a thumna a hon ciangin, a nungta ganhing a thumna in, “Hong pai in!” a cih ka za hi. Ka en a, ka mai-ah sakol vom khat a na om hi! A tunga tuangpa in, tawi tehna kop khat a khutah a tawi hi. 6 Tua ciangin a nungta ganhing lite lakah aw khat tawh a kibang khat in, “Ni khat thaman ^{▼▼6.6 Greek in choinix khat (litre khat phial bang hi thei)} dingin mangbuh quart ^{▼▼6.6 Greek dinarius khat} khat le ni khat thaman dingin mangbuh-ham quart ^{▼▼6.6 Greek dinarius khat} thum hi; ahi zongin lenggahzu le sathau siasak kei in!” a cih ka za hi. ^f

7 Tuuno in ciamtehna lina a hon ciangin a nungta ganhing a lina in, “Hong pai in!” a cih aw ka za hi. 8 Ka en a, ka mai-ah sakol daang khat a na om hi! A tunga tuangpa min Sihna kici hi-a, Gawtmun in a nung mahmah ah a zui hi. Amaute in leitung seh li suah seh khat, namsau, kialpi, pulpi le leitung gamsate-a a thah theih nadingin vang liatna kipia hi. ^g

9 Amah in ciamtehna ngana a hon ciangin, Pasian thu hang le citaka teci a pannasate uh hanga kithatte khate biakna-tau nuai-ah ka mu hi. 10 Amaute in, “A siangtho le a thumaan Thuneipipen Topa aw, leitunga tengte thu na khen ding le kote sisan phu na lak ma bang tan sawt lai ding hiam?” ci-in nakpi in a kiko uh hi. 11 Tua ciangin amaute puantual pak khat ciat kipia-a, amaute in a naseppih a sanggamte uh a kithat lai dingte a kim masiah a na ngak lai zek dingun kigen hi. ^h

12 Amah in ciamtehna a gukna a hon laitak ka en hi. Tua laitak, nakpitakin zin a ling hi. Ni, kelmul kigan ippi vom bangin vom a, khapi a bupin sisan bangin san hi. 13 Thei a gah nunungte huihkhauh in a mutpulh bangin vana aksite lei-ah a kia hi. 14 Laizial zial bangin vanpi kizial a, mualpi le tuikulh khempeuh a omna mun pan kikhinkhia uh hi. ⁱ

15 Tua ciangin leitunga kumpite, uliante, galkap mangte, mihaute, thahatte, sila le sila lote khempeuh leihawm sung le mualtung suangpi lakah a bu uh hi. 16 Amaute in mualpi le suangpite kiangah, “Hong vuknelh unla, kumpi tokhom tunga tupa maitang pan le Tuuno thangpaihna panin hong sel un! 17 Bang hang hiam cih leh amaute thangpaihna ni thupi hong tung hi, kua in thuak zo ding hiam?” ci-in a sam uh hi. ^j